1 1 O etatele Iloɓa aɓaka, Iloɓa aɓaka oka Nwaphongo, Iloɓa aɓaka Nwaphongo. 2 O etatele aɓaka oka Nwaphongo. 3 Mbolo isɔ yakyelama nde nɛ, ɓo sɛɛ phe ekpele yɔnɔyɔ nde teyakyelama. 4 Isɔ yaakyelama nɛ ili na ɓomɔɔ, emba ɓomɔɔ phaɓaka moo nwa ɓato. 5 Moo mungyɛngyɛ onte ya enzɔmbi, emba enzɔmbi teikyikoka imozimya. 6 Yaɓaka moto mɔnɔmɔ, owatomaka Nwaphongo: nkombo yɛ yaɓaka Yowane. 7 Iyo aesi iyaɓa nzoka, phɔ awɔlɛ moo, phɔ ya oɓokye ɓato ɓasɔ ɓaanole phɔ yɛ. 8 Iyo mampenza taikaka ɓa moo, kasi ayakaka ya wɔ nde phɔ ya moo. 9 Iloɓa aɓaka nde nwakolo moo nwaya o mokyisi, nwa ngyɛngyɛlɛ moto musɔ. 10 Aɓaka o mokyisi, mokyisi nwakyelama nde nɛ, kasi mokyisi tenwaika nweɓa. 11 Aesi o mokyisi nwɛ mampenza, kasi ɓato ɓɛ teɓaikyi moyamba. 12 Kasi oka ɓamoyambi, ɓaanosi na nkombo yɛ, aɓaphɛ ɓokonzi pha ibutwa ɓana ɓa Nwaphongo. 13 Ɓɛ teɓaika ɓotama na malongo, na na phowa ya nzoto, na na phowa ya moto, kasi na Nwaphongo. 14 Iloɓa amibuye moto ambi ya zala onte ya ɓanga emba towɛni nkyɛmɔ yɛ. Nkyɛmɔ mɛ eli oɓokye, Nwana nde mɔnɔmɔ, owatonda na ngɔlu na na phɛlɛ yauta na Tata. 15 Yowane anwanaka, amba imola phɔ yɛ yokye: “Kyeka owa wɔkɔ nga oɓokye: o sima ya nga, kyeye moto mɔnɔmɔ okondekye, phɔ aɓaka o ɓoo pha nga.” 16 Phɔ nde nɛ owa isɔ, ɓanga ɓasɔ tozwa ngɔlu o ikolo sa ngɔlu. 17 Ɓo Moɓeko nwambyamaka o maɓɔkɔ ma Mose, ngɔlu na phɛlɛ yaya na Yesu Kilisito. 18 Moto mɔnɔmɔ taikawɛnɛ Nwaphongo; kasi Nwana nde yo mɔnɔmɔ oli Nwaphongo, yo oli onte ya Tata, aloteya yo. 19 Kyeka munɔkɔ nwa Yowane imbɛlɛ saɓa yo o Yelusalɛmɛ, wamotomela Ɓayuda ɓangaga ɓa Nwaphongo na ɓalewi phɔ ya imotuna motuna oɓokye: “Wɛ oli nza?” 20 Taika zita, amba wɔ yokye: “Nga sili Kilisito.” 21 Emba ɓamba motuna ɓɛkye: “Wɛ oli nza? Oli Eliya?” Amba buya yokye: “Nga sili Eliya.” - “Oli Moimosi?” Amba buya yokye: “Phe.” 22 Emba ɓamba wɔ nɛ ɓɛkye: “Wɛ ombi ɓa nza? Phɔ tokyɛ imola ɓalotomakyi! Kowɔ ɓo phɔ ya wɛ mampenza?” 23 Amba ya wɔ yokye: “Nali nwɛsi nwa moto okoanwane o isoɓe oɓokye: Ɓɔngya nzela ya Nkolo, ɓo wawɔ moimosi Izaya.” 24 Nzuka ɓato ɓatomaka ɓɛ ɓaɓaka Ɓafalisayi. 25 Ɓamba kula nde motuna ɓɛkye: “Ɓo toɓe Kilisito, naa Eliya, naa Moimosi, phɔ ya ye koɓatisa?” 26 Yowane amba ɓabuyisa yokye: “Nga, naɓatisa na maa. Onte ya ɓɛɛ, moto mɔnɔmɔ ali, ɓɛɛ tomoeɓe, 27 kaye o sima ya nga, sikokyi na iyingola simbi ya bikoto ɓɛ.” 28 Maphɔɔ masɔ mamana malekanaka o Ɓetaniya o mokukulu moyokɔ nwa Yaladɛnɛ, owaɓaka Yowane kaɓatisa. 29 Ɓo yana, aesi ya wɛnɛ Yesu kae bili yo, amba wɔ yokye: “Kyeka Nwana wa mpate wa Nwaphongo okomanya masumu m ɓato.” 30 Eli nde phɔ yɛ nawɔkɔ oɓokye: “O sima ya nga moto okoye kandekye, phɔ aɓaka o ɓoo pha nga. 31 Nga mampenza, simoeɓe, kasi nde phɔ ya imiwɛninya sɛɛ oka Isalayɛlɛ, yango mɛna naesi iyaɓatisa na maa.” 32 Yowane amba wɔ yokye: “Nawɛnɛkyɛ Ɓolɔɓɔ ɓoute o ikolo ndokolo inkotonwenya, ɓoesi yakyɛ tɛmɛ o ikolo sɛ.” 33 Emba nga siikaka moeɓa, kasi owantoma iɓatisa na maa, eli yo o wa wɔ na nga oɓokye: “O wa mowɛnɛ wɛ Ɓolɔɓɔ ɓoute ɓokyɛ tɛmɛ o ikolo sɛ, eli yo o wa moɓatisa na Ɓolɔɓɔ Ɓosantu. 34 Emba nga, nambo wɛnɛ, na wɔ ngakye, iyo ali Nwana wa Nwaphongo.” 35 Ɓo yana, Yowane akulaka ɓa o elele mɛ, yo na ɓaekosi ɓɛ ɓaɓale. 36 Wawɛnɛ yo Yesu katambule, amba wɔ yokye: “Kyeka Nwana wa mpate wa Nwaphongo.” 37 Wamooka ɓaekosi ɓaɓale kawɔ ɓaɓona, ɓamba ɓenga Yesu. 38 Yesu amba ya miekpinya, wawɛnɛ yo oɓokye ɓamoɓengye, amba wɔ na ɓɛ yokye: “Ɓɛɛ kolukye ye?” Ɓamba buya ɓɛkye: “Labi - kyelukye iwɔ ɓokye Moteye -, koɓe bi?” 39 Amba wɔo na ɓɛ yokye: “Yaka wamowɛnɛ.” Emba ɓamba ya kyɛndɛ, ɓamba ya kyɛ wɛnɛ elele ekye ɓe yo, emba ɓamba ya zala nɛ mokɔlɔ mɛ. Yaɓaka phɛnɛphɛ ngonga ya iko. 40 Andele, nwana nyango na Simo Petelo, aɓaka mɔnɔmɔ na ɓaɓale ɓaokaka Yowane na ɓaɓengaka Yesu. 41 O ɓoo pha ɓato ɓasɔ, amba kyɛ zwa nwana nyango Simo, amba wɔ nɛ ykyea: “Towɛni Masiya!” - kyelukye iwɔ ɓokye Kilsito. 42 Amba yakyɛ nɛ oka Yesu. Wamolembetela yo, Yesu yokye: “Oli Simo, nwana wa Yowane, ɓamoeɓanga Sefasi” - kyelukye iwɔ ɓokye Petelo. 43 Ɓo yana, Yesu aesi kyɛndɛ o Galileya. Amba yakyɛ zwa Filipo amba wɔ nɛ yokye: “Imbengye.” 44 Filipo aɓaka moto wa Ɓetesaida, mokyisi nwa Andele na Petelo. 45 Filipo amba yakyɛ vana na Natanayɛlɛ, amba wɔ nɛ yokye: “Towɛni owakoma ɓɛ maphɔɔ mɛ o buku pha miɓeko ma Mose na ɓaimosi: eli Yesu, nwana wa Zozefu owa Nazalɛtɛ.” 46 - Natanayɛlɛ amba wɔ yokye: “O Nazalɛtɛ wakokyi itɔkɔlɔ lowɔ lolaa?” Filipo amba wɔ yokye: “Yaka yakyekye.” 47 Yesua amba ya kyeka Natanayɛlɛ okoye bili yo, amba wɔ na ɓato ɓaɓaka nɛ phɔ yɛ yokye: “Kyeka owakolo moto wa Isalayɛlɛ otoli na ɓɔlɛ.” 48 - Natanayɛlɛ amba motuna yokye: “Konzeɓe bi?” Emba Yesu amba mobuyisa yokye: “Waɓa Filipo saɓoeɓangakye, waɓa wɛ o se ya nwete nwa fige, naewɛnɛkyɛ.” 49 Natanayɛlɛ amba buya yokye: “Labi, oli Nwana wa Nwaphongo, oli mokonzi nwa Isalayɛlɛ.” 50 Yesu amba mobuyisa yokye: “Oanosi nde phɔ nawɔ na wɛ oɓokye naewɛnɛkyɛ o se ya nwete nwa fige. Wamowɛnɛ maphɔɔ maikye malekyi ɓonɛnɛ ileka lolo.” 51 Emba amba kula wɔ yokye: “Phɛlɛ phɛlɛ nawɔ na ɓɛɛ, wamowɛnɛ ikolo siingo, emba ɓanzelu ɓa Nwaphongo ɓaɓaa ɓaute o ikolo sa Nwana wa Moto.”
Prev
Play
Next
Volume
Speed
0.7511.251.52