1 1 Lnde'e usaxan di'izh wen ten Jesucristo, Xin Dios, 2 lak mke'a profet Isaías sakndo' Dios ndab xa: Una', le'a na' utu'ub dub xa ya' ned ndo' lu gudi'izh di'izh ten na', ndontsa listla kwe be men gal zha ilen lu. 3 Le'a xa wa ikeseyadi'izh ge'e sa bid, uge' gab xa: “Bin parej bega nes ilen Xa Nibe'e. Bkeaso' bega nes ten xa.” 4 Le'a xa wa Juan, xa uyo'o ge'e sa bid. Ulalea' xa be men len nits, no ndab xa ula'a bexa be ta ugap nak bexa, no italea' bexa, ndontsa utsu'u Dios be ke ten bexa. 5 Le'a kwa'ad bexa Jerusalén no bexa idub distrit Judea uto'o ncha'yo'ón di'izh ten Juan. Le'a gor na mgondo' bexa be ke ten bexa, le'a Juan cha ulalea' bexa len nits yowbe'e Jordán. 6 Le'a xab Juan naknde'e gich las came, nsea dub sinch gid nde len xa. Le'a xa ndaw mbit, nsea mzhin ser ndo xa. 7 Ndadi'izh Juan, ndab xa ndo' be men: —Le'a tso'o na' ndee ilen stub xa mas nsak ndo' na'. Le'a na' ni lá isaya' kote ndab~xa wa. 8 Le'a na' nits‑tsa ngolea' bega, ná le'a xa ilen tso'o na' ndee kolea' be men no Espíritu ten Dios. 9 Ngol dub wizh le'a Jesús uto'o gezh Nazaret ten distrit Galilea. Ncha'a Jesús sa nso' Juan, cha ulalea' Juan Jesús len nits yowbe'e Jordán. 10 Le'a gor na uto'o Jesús len nits wa, le'a Jesús uni'í mya'al gibe'a. Le'a Espíritu ten Dios cuent dub palom ncha'la' sa nso' Jesús. 11 No ulen ti Dios gibe'a ndab ndo' Jesús: —Lu nak Xi'ín~na'. Le'a na' nkwea' ladna lu, no ntenno lad na' lu. 12 Le'a Espíritu ten Dios cha mbi'i Jesús ge'e bid sa na'an men. 13 Le'a sa wa uyo'o Jesús dub top ga'al wizh lat be man ge'e wa. We'e ulen maxu'u uzhe'eb mbin preb Jesús nlad maxu'u utsabgix Jesús. Tso'o wa cha ulen be angel ten Dios mla'ach bexa Jesús. 14 Tso'o na mke'a be men Juan litgi'ib, le'a Jesús cha nsea' le'aka Galilea, ukesea uluu xa be men di'izh wen ten Dios ná xte'e nibe'e Dios be men. 15 Ndab xa: —Le'a tiemp yá ngol. Le'a zha inibe'e Dios lado'o be men yá gax nak. Bla'a bego be ta ugap nak bega, no bingea ladna bega di'izh wen ten Dios. 16 Le'a dub gor nchasea Jesús to'o lagun si'il nsalea' Galilea, cha uni'í xa Simón nsea Ndres wit Simón, ndeutsa'ab red ten na len nits, le'a bexa wa xa nsen mbeal. 17 Cha ndab Jesús: —Usankea bega tso'o na', le'a na' uluu xte'e yunjunt bega be men ndo' Dios. 18 Bi le'a gor wa cha mla'a bexa be red ten bexa, cha ncha'ano bexa Jesús. 19 We'e cha usea bexa stub tuzh sa. Cha uni'í Jesús dub xa nsalea' Jacob nsea stub xa nsalea' Juan wit Jacob. Le'a bexa wa ndi'ib ndo' dub barco ndego ramient be red ten na. 20 Cha utezh Jesús itop wit bexa. Le'a bexa wa cha mchanso' xus~na Zebedeo ndo' barco wa no be mos ten bexa. Le'a Jacob no Juan cha ncha'ano Jesús. 21 Cha uyote bexa len gezh Capernaum. Le'a ngol wizh ne'e be men, le'a Jesús cha ncha'uluu be men len ni'i sa nzhealbe bexa judio gezh wa. 22 Le'a be men wa ndanseana xte'e ndadi'izh xa, le'a ta ndadi'izh xa wa nluu le'a xa uzhe'eb ndap juers, na'anpa lak nluu be mech ten ley. 23 Le'a len ni'i wa nsob dub xabgi'i nsak gizh tont ncho mbi bxin len lado'o~na. Le'a ta wa uge' ndab ndo' Jesús: 24 —¿Xta'an nsea ugal lu besa, Jesús xa Nazaret? ¿Nati nsea unitndo' lu besa zha? Na' uní ton nak lu, le'a lu xa umbi'i mtu'ub Dios. 25 Le'a Jesús uteyo mbi bxin wa, ndab xa: —¡Kexga lu! ¡Uto'o len lado'o~xa ba'! 26 We'e le'a mbi bxin wa udabi xabgi'i wa, cha utezhat xa, cha uto'o mbi bxin wa len lado'o~xa. 27 We'e le'a itea be men wa ngwanseana, nabdi'izh bexa ndo' be ltsa'a~xa, ndab bexa: —¿Xte'e nak ta ndee zha? Le'a xa nluu dub ta'a ni gol go'ón beuna, no uzhe'eb ndap xa juers, gast be mbi bxin nxobgek ndo' ta ndab xa. 28 Le'a ta li mbin Jesús wa cha uxax mgen idub Galilea. 29 Le'a gor na uto'o bexa len ni'i wa, le'a Jesús ncha'ano Jacob nsea Juan ta lid Simón nsea Ndres. 30 Le'a xnazha'ap Simón nax ncho xlea. Le'a gor na ndab bexa‑yá ndo' Jesús, 31 le'a Jesús cha ubii sa nax xa wa, usen xa ya'a~xa, cha uxiste Jesús xa. Cha bi le'a gor wa mto'o xlea xa, cha msa'a xa ta gaw bexa wa. 32 Le'a gor na ngwa'asla wizh cha nsea te'al, le'a be men ulenno kwa'adpa bexa gizh nsea bexa nsak gizh tont ncho mbi bxin len lado'o~na. 33 Le'a idub gezh men myakjunt to'o ni'i wa. 34 Le'a Jesús myunyakna kwa'adpa be men nsén isando' gealgizh, nsea ulantu'ub Jesús be mbi bxin ncho len lado'o be men wa. Lá ula'a xa ngudi'izh be mbi bxin, geal le'a be ta wa uni'í ton nak Jesús. 35 Ngol gor bi te'alta le'a Jesús ngwaste, cha ncha'a xa dub sa na'an men, sa na ngwa'yadi'izhno xa Dios. 36 Le'a Simón no stapla bexa uto'o ncha'kwa'an Jesús. 37 Ná gor na mzheal bexa Jesús, cha ndab bexa ndo' xa: —Le'a be men we'e itea nkwa'an ga. 38 Le'a Jesús cha ndab: —Ncha'be beuna be gezh gax ndee. Ulu'u na' be men, le'a na' ti'in we'e ndal ndo' gizhliyo. 39 We'e le'a Jesús cha nchasea be gezh idub distrit Galilea, nluu xa be men len be ni'i sa nzhealbe bexa judio, nsea ulantu'ub Jesús be mbi bxin ncho len lado'o be men. 40 Le'a dub wizh ulen dub xabgi'i wats Jesús, dub xa nsa'gea las~na, le'a ta wa dub gealgizh nsalea' lepra. Cha msaxib xa ndo' Jesús, ndab xa: —Tal go nlad yunyakna go na', le'a na' uní le'a ga sunka gan. 41 Le'a Jesús cha mlats ladna xa wa, cha mxo'ob Jesús ya'a~na tso'o~xa wa. Cha ndab Jesús: —Nladka na' yakna lu. Nat myakna lu. 42 Bi le'a gor wa le'a gealgizh wa cha unitndo', cha myakna las~xa. 43 We'e le'a Jesús cha unibe'e ndo' xa, ndab Jesús: —Nat syo'o gan ya' lu. 44 Na'an ton ndo' ná gudi'izh lu xte'e myakna lu. Dubga'al ndo' ule'ay wa' uluu las~lu, le'a lu myaklana. Nsea bi'i be man xnab lak nibe'e ley mke'a Moisés usa'a be men zha nyakna bexa, ndontsa ini'í be men le'a lu myaklana. 45 Ná le'a nes nsea' xabgi'i wa, usaxan ndadi'izh xa ndo' be men xte'e myunyakna Jesús xa. Ta we'e le'a Jesús lá yoota gan ga'al yate ni dub len gezh wa. Sbe'en dub lad sa na'an men ukesea xa, ná le'a be men itea lad uto'o ncha'beka wats Jesús.
Prev
Play
Next
Volume
Speed
0.7511.251.52