1 1 Ze guzuloj xtiidxza'c Jesucrist, Xi'n Dios. 2 Guyu tijb bén badëë xtiidx Dios loj ree bejn brii lajman Isaías, bacaaman xtiidx Dios, rëbaman: Naj rxhial tijb bén ned lojl, bén güünchaaw xnejzil. 3 Rguien cha' tijb bén rbidxa' loj yujbidx, rëbaman: “Gol beenchaaw xnejz dux Dad ree, gol guxhal tijb nejz nali.m 4 Zian bi't Waj bén baroobnijs bejn ree, guzujman niz loj yujbidx, abi' rëbaman loj ree bejn guial rayal yayüjn xgab por xtol reeman, yayejc reeman con Dios din gac reeman perdon tiobnijs tëë reeman. 5 Gra ree bén zojb niz Judea, në ree bén Jerusalén brii reeman zicaagdiajg reeman ni rniee Waj, abi' rxhioobdol reeman. Zianz ruroobnijs Waj laa reeman loj guiiw Jordán. 6 Guidxlad camell gojcnë xabaman, abi' lënman bixii tijb cinch guid. Gudawaman bi'tsu con dxijn dajn. 7 Chi guneenëman bejn ree, rëbaman: ―Xichan zëëd tijb bén mazri zojbloj guial lon, ni'qui xgurëchaman ad zajct gaxhiecan guial mazri zojblojman guial lon. 8 Naj curobnijs lëjt con nijs, per laaman guroobnijs lëjt con xSprijt Dios. 9 Lën ree dxejzii guza Jesús luguiedx Nazaret ni riga' niz Galilea, abi' baroobnijs Waj laaman loj guiiw Jordán. 10 Chi bariiman loj nijs guin, laa baguiaa gajcaman bixal xanyabaa, zidguiajt xSprijt Dios zi'c tijb palom xt guijcaman. 11 Dxel biguien cha' bejn xanyabaa, rëbaman: ―Lüj na̱j da Xi'nan, rënan lüj rabaanë' tëën lüj. 12 Dxel binë xSprijt Dios Jesús loj yujbidx. 13 Ni guzuman tiuu dxej tiuu guiaal, loj ree bedoxh. Abi' been xindxab laaman prueb chitëë nuzoobaman xtiidx Dios, guiáad ree xianjl Dios gunaj laaman. 14 Chi mal guyu Waj ladxguiib, wej Jesús niz Galilea bigneeman xtiidxza'c Dios, 15 rëbaman: ―Ma bidxin dxej zëëd xguialrniabee Dios gajxh, zeel gol bayüjn xgab por xtolidi, gol bililadx tëë xtiidxza'caman. 16 La'tgaj caza Jesús ro'nijsdoo Galilea, baguiaaman Simón në bijchaman Andrejs, cuzaal xguijxh reeman lojnijs din guiniaaz reeman bëjl. 17 Abi' rëb Jesús loj reeman: ―Gol tanal naj din gulün lëjt xhienaag guto'pidi bejn par Dios, luar rniaazidi bëjl. 18 Loj hor guin gajc basa'n guijxh rniaaznë reeman bëjl persi zinal reeman Jesús. 19 Guzaman zatibda'n, dxel baguiaaman Jacob con Waj bén na̱j ree xi'n Zebedeo, yu' reeman loj barcw rayüjnchaaw xguijxh reeman. 20 Dxel gurejdx Jesús laa reeman, abi' basa'n reeman Zebedeo loj barcw guin, bén na̱j xdad reeman con ree xmojsaman, guiáad laa reeman zinal reeman Jesús. 21 Chi bidxin Jesús luguiedx Capernaum. Abi' dxej raziiladx ree bejn guyuman lën xyadoo ree bén Israel culüüman laa reeman. 22 Dád radxa loj reeman zi'c rnieenëman laa reeman guial rulüüman laa reeman zi'c tijb bén rniabee, ad rulüütaman zi'c rulüü ree mextr rajc ley. 23 Lën yadoo guin yu' tijb xin yu' xindxab luxdoo, dxejczi guridxa'x rëbix: 24 ―¿Xhie rënl con dunujn, Jesús bén Nazaret? ¿Zëëdil ya zidganijtil dunujn? Nünbeen lüj, ragbeen guial naya nalil najl xi'n Dios. 25 Dxel gudilë Jesús xindxab guin, rëbaman: ―¡Bacwëëz ro'l, barii luxdoo xin guin! 26 Abi' been xindxab guin xin guin zi'c bén rëjtya', zianz gurixdiajx rejs, bariix luxdoo xin guin. 27 Graczi ree bén riga' dád badxaloj reeman, riniabdiidx loj lasa' reeman rëb reeman: ―¿Xhie ree nicüban rulüü bén guin? ¡Con guialrniabee ni rajpaman xt ree xindxab ruzoob xtiidxaman! 28 Tibrajtzi bire'ch xtiidx Jesús guidib niz Galilea. 29 Bariiz reeman lën yadoo guin, binë Jesús Jacob con Waj lidx Simón con Andrejs. 30 Abi' naga' xnasuegr Simón, yu'man xliaadoxh. Dxel bagojn reeman Jesús guial ragxuuman. 31 Abi' gubigaman cwë'man gunaazaman yaaman, gulesaman laaman. Loj hor guin gajc bariiman xliaa guin dxel guzuloj cudëëdaman ni gaw reeman. 32 Chi ma gurej guiaal, binë reeman bénragxuu ree lod za' Jesús, në ree bén yu' xindxab luxdoo. 33 Graczi ree bén luguiedx guin bido'p ruyu lod za' Jesús. 34 Bayüjn Jesús zien ree bén rajc ree gadxagayaa guialguijdx, babëë tëëman zien ree xindxab luxdoo ree bejn. Per ad rudëëtaman mod guiniee ree xindxab guin guial nünbee reex laaman. 35 Bixche Jesús rsildoo, chi ziiz nacay, briiman luguiedx guin wejman tijb luar lod achutczi bejn zojb, persi gurejdx gunabaman Dios. 36 Abi' Simón con ree xcompniaraman bigdiil reeman laaman. 37 Chi badxejl reeman laaman, rëb reeman lojman: ―Gra ree bejn cayguiil lüj. 38 Per rëbaman loj reeman: ―Yo' ree guiedx ni riga' ree gajxh din gulün xtiidxza'c Dios, din par zian zialan. 39 Abi' balüü Jesús xtiidx Dios lën ree xyadoo ree bén Israel guidib niz Galilea babëë tëëman xindxab luxdoo ree bejn. 40 Tijb bén rajc guialguijdx la lepra, gubigaman lod za' Jesús, bazuxibaman lojman rëbaman ―Bal guiënl, zajc yayüjnl naj. 41 Baya Jesús laaman, baqui'man laaman, rëbgajman: ―Rënan, bayajc. 42 Chi gunee Jesús zian, hor guin gajc bayajc bén guin abi' baya xcuerpaman. 43 Dxel bagu'nejz Jesús laaman, rëbaman lojman: 44 ―Bacaagdiajg ni ganin lüj. Achu loj guiëbil guial ma bayajquil. Lojzi bixhioz wej din guguiaaman lüj, binë gon ni rayal chinël loj Dios zi'c gunabee Moisejs, din gagbee gra ree bejn guial ma bayajquil. 45 Per bén guin chi ziaman guzuloj catie'chaman diidx loj gra bejn xhienaag bayajcaman. Zeel ad bile't contzi niu Jesús luguiedx ree, ganax dajn ree raya'nman lod achut bejn zojb. Per gra lad rza ree bejn rej reeman lod za'man.
Prev
Play
Next
Volume
Speed
0.7511.251.52