1 1 Lo sitsi‑ni dia lá ca benni datia Jesucristu. Lee̱ anque benni datia David, benni datia Abraham lhe. 2 Abraham ucabi tata gue Isaac. Isaac ucabi tata gue Jacob. Jacob ucabi tata gue Judá, adí ca betsibiha lhe. 3 Judá ucabi tata gue Fares, Zara lhe. Nan guecabi nna uca Tamar. Fares ucabi tata gue Esrom. Esrom ucabi tata gue Aram. 4 Aram ucabi tata gue Aminadab. Aminadab ucabi tata gue Naasón. Naasón ucabi tata gue Salmón. 5 Salmón ucabi tata gue Booz. Nan gue Booz nna lábi Rahab. Booz ucabi tata gue Obed. Nan gue Obed nna lábi Rut. Obed ucabi tata gue Isaí. 6 Isaí ucabi tata gue David biꞌini unnabia ca benni Israel. David ucabi tata gue Salomón. Nan gue Salomón nna ucabi nuila gue Urías. 7 Salomón ucabi tata gue Roboam. Roboam ucabi tata gue Abías. Abías ucabi tata gue Asa. 8 Asa ucabi tata gue Josafat. Josafat ucabi tata gue Joram. Joram ucabi tata gue Uzías. 9 Uzías ucabi tata gue Jotam. Jotam ucabi tata gue Acaz. Acaz ucabi tata gue Ezequías. 10 Ezequías ucabi tata gue Manasés. Manasés ucabi tata gue Amón. Amón ucabi tata gue Josías. 11 Josías ucabi tata gue Jeconías tata gue ca betsi biꞌiniha lhe. La idaha nuha atti bedaxxu ca nu Babilonia ca benni Israel bechecan cabi daca lo yu guecaniha. 12 Dequide chi bisincabi Babilonia nna Jeconías nna ucabi tata gue Salatiel. Salatiel ucabi tata gue Zorobabel. 13 Zorobabel ucabi tata gue Abiud. Abiud ucabi tata gue Eliaquim. Eliaquim ucabi tata gue Azor. 14 Azor ucabi tata gue Sadoc. Sadoc ucabi tata gue Aquim. Aquim ucabi tata gue Eliud. 15 Eliud ucabi tata gue Eleazar. Eleazar ucabi tata gue Matán. Matán ucabi tata gue Jacob. 16 Jacob ucabi tata gue José biꞌini uca unbiyuu gue María, nan gue Jesús, Benni anque Cristu. 17 Larcala nna sitá (14) libixxi chi utee desdeba Abraham axta atti uli David. A sitá (14) libixxi chi ute ridú lori leni David axta atti beche ca nu Babilonia ca benni Israel daca lo yu guecaniha. A sitá (14) libixxi chi ute ridú lori desde laniha axta atti bisía Benni anque Cristu. 18 Aní uca atti uli Jesucristuha: María, nan gue Jesús, chiba du José rinnababi biꞌiniha qui utsá nácabi, ttiaca antisla tseꞌe len loescabi nna beni Espíritu gue Tata Do Iyyabaaha bija xiꞌini María. 19 José biꞌini dhi María nna ancabi ttu benni du tsee lebi. Denuala nna bittu raca lebi inne güe benni gue María. Larcala nna belaba le José sigába uquiettabi lo biꞌiniha. 20 Ttiaca laca rulaba lebi unbi aníha, lo bisiela guebi nna beleꞌenbi ttu ingeli udhelha Tata Do Iyyabaaha, nianna rá ingeliha bi: ―José, biꞌini datia David, bittu gasinlu utsá nálu len María‑na, cumu Espíritu gue Tata Do Iyyabaahaba benie qui ujabi unto nujabi‑na. 21 Labi nna cuꞌubi ttu unbiyuuto. Benniha nna quixxalu lee̱ Jesús. Aná gatta lee̱ cumu Ben‑na odile̱ ca benni guee̱ lo nu lä anca tsee runcana. 22 Iyába unní uca qui guaxxína nu chi rá Tata Do Iyyabaaha profeta Isaías. Biꞌiniha nna utixxiꞌabi rábi: 23 Ttu nu rbani uja xiꞌinni, Labi nna cuꞌubi ttu unbiyuuto. Untoha nna gatta lee̱ Emanuel. (Emanuel nna dienna innána: Tata Do Iyyabaaha due len riꞌi.) 24 Atti bebani José nna benbabi nu beni ingeli gue Tata Do Iyyabaaha mandadu unbi, labi nna betsába nábi leni María. 25 Ttiaca läga bisaa loescabi, axta liba dequide chi uli untoha. Labi nna begüebi lá untoha Jesús.
Prev
Play
Next
Volume
Speed
0.7511.251.52