1 1 Jesucristoja sehue Abraham-shama, Davidshama cuta maleleula. Anajajtiu apëpëshamau mamaccatau. 2 Abrahamaja Isaac atata. Isaacja Jacob atata. Jacobja Judá abisiutina matata. 3 Judaja Fares, Zaratina matata. Mammeshamaja Tamar imaccata. Faresja Esrom atata. Esromja Aram atata. 4 Aramja Aminadab atata. Aminadabja Naasón atata. Naasonja Salmón atata. 5 Salmonja Booz atata. Booz amemeja imaccata Rahab. Boozja Obed atata. Amemeja imaccata Rut. Obedja Isaí atata. 6 Isaija rey David atata. Rey Davidja Salomón atata. Salomón amemeja Uriasshama abashti. 7 Salomonja Roboam atata. Roboamja Abías atata. Abiasja Asa atata. 8 Asaja Josafat atata. Josafatja Joram atata. Joramja Uzías atata. 9 Uziasja Jotam atata. Jotamja Acaz atata. Acazja Ezequías atata. 10 Ezequiasja Manasés atata. Manasesja Amon atata. Amonja Josías atata. 11 Josiasja Jeconías abisiutina matata. Anajajtiu ushta Jesucristo apëpëshamau naa matumiu Babiloniajshabëshëuja mabenseuja mabaliuti maelechi. 12 Laticcajsha tütüubëla pesheu Jesucristo cani sehueti bëshshëu. Jeconiasja Salatiel atata. Salatielja Zorobabel atata. 13 Zorobabelja Abiud atata. Abiudja Eliaquim atata. Elia-quimja Azor atata. 14 Azorja Sadoc atata. Sadocja Aquim atata. Aquimja Eliud atata. 15 Eliudja Eleazar atata. Eleazarja Matán atata. Matanja Jacob atata. 16 Jacobja José atata, naa María abba. Mariaja Jesús ameme bëtija “Cristo” imaccatase. Ati maccatauja dyaju naa ‘Dios calashijmijtiti.’ 17 Abraham lihuinaniticcajsha David lihuinaniticcachi catorcetti familiau shamau pëpëshamau. David lihuinaniticcajsha Babiloniajbëshëu mabenseuja judiu mabaliuticcachi maelechi catorcetti familiau shamau pëpëshamau lacha. Israelitau limabaliuticcajsha Babiloniachi, Cristo lisehueticcachi catorcetti familiau shamau yosse pëpëshamau. 18 Anuta sehue Jesucristo. Ameme Mariaja cuhuinanishta José. Lachamatijsha, canimash cuhuinanitijsha, Mariaja mujushi. Mujushi Espíritu Santo ajümatala. 19 Joseja emejmejbëshë shunñe. Nish cusutila maileniti aaptau naa Mariaja mujushitila, cuimaluma calasaniti María, nish anërimash. 20 Lati lachuta cuimalumati, lëtta angelja cancütta ateshemujui naa Dios bacheti ashaajsha. Angelja ashcuta: “José, Davidshama alele, nish shojtomash cahuinanicham María naa anñuja sehueshtatila Espíritu Santo ajümatala. 21 Aëtëjñu cansehueti María, cammaccatacham Jesús naa latija mapuchachashtatila maënnë-tëjsha naa Dios malashijmijtiti” cuta. 22 Amumui achuta imbëtë achaya naa Dios abuibutebeshama lidyajutishcuta cürüs imbëtështatila. Latija ashta: 23 “Lëtta sehueshojaja nish sij-sisëtëtijsha mujushiya iñushta. Ati calimaccatashta Emanuel” ta. Ati maccatauja dyaju ‘Diosja tütü tuhuatina’ ta. 24 Joseja limtaja cahuinani latiji María naa ángel lijandyuju-tishcuta. 25 Lachamatijsha, nish sisëtëmash huinaniu, María liiñuticcachi. Latijsha sehuenñu sehueti, Joseja calimaccata Jesús.
Prev
Play
Next
Volume
Speed
0.7511.251.52