1 1 'Yesu 'Kristo, Naangmini 'Bi-dau, 'duohi-sung 'munpiilee la nga. 2 A'wo ang seu dangyera Ai'zeeya Gbangung bila ni: Nye, n tuniye n tungtuna ka u die i 'yie. Unang na wa dang maali i sori. 3 Nie kanga kokoring tahina mo'sogo 'puong, a yeli: Ye maali Daana son ni ka u i 'siri. Ye maali u soe ka a 'tori. (Ai'zeeya G. 40:3; Maalakai G. 3:1) 4 Joon Ngminikon'suoro daang 'biye mo'sogo 'puong, a inna 'duoho ka niba leu 'yi ba yelibee 'puong, a 'so Ngminikuong ka Naangmini veng ba yelibee kubo. 5 Ka 'Judiiya aning Jeruuselem niba jaa daang 'yi gaa u seng, a ti diera ba yelibee saangbu. Ung daang 'suoribo Ngminikuong Jooridang Math 'puong. 6 Joon daang yeriye kparuu bang 'woo aning nyogima kooni a 'le u sie aning gbani beleti, a da mang oora 'sobo a 'dire siu. 7 Ung daang inna 'duoho, a yera: Nie kanga ang tan kpiengu gaama waanang n 'puoring. N ba sigi ka n 'gbinti 'tengeng a 'lorihi u nagitie bung'lerihi. 8 Yeliminga, maang 'suoriyeng Ngminikuong aning kuong, che una na wa 'suoriyeng aning a Sipegi'yiruu. 9 A 'beri ning ka 'Yesu daang 'yi Naazaret, 'Gaalilii 'puong, ka Joon daang 'sou Ngminikuong Jooridang Mani 'puong. 10 'Yesu ang wa 'yire a kuong 'puong, 'dayeni ung nye sagbama ang 'yuohi. Ka a Sie daang 'sigire u ingang a'wo nangmanii. 11 Ka kokori 'yi sagbani, a yeli: I iye n 'Bi-dau nunginaa. N 'puo peliye i yela yaga jaa. 12 'Dayeni ka Naangmini Sie daang leuhuu a ti kpening mo'sogo 'puo. 13 Ung daang 'bi a mo'sogo 'puong 'beri lijaa'yi, ka Sitaani daang 'pigihuu. Ka u ning mo'duunhi daang 'bi 'be, ka malikihi daang tuna 'kuruu. 14 Bang daang wa nyogi Joon pogi baahi, ka 'Yesu daang wa kpe 'Gaalilii a inna Naangmini naalung 'duohi-sung. 15 A yeli: Wagiri ni ang bing ni paaliyeng. Naangmini naalung pieliyeng. Ye leu 'yi ye yelibee 'puong, a sagi a 'duohi-sung. 16 Sanga ni ung daang 'chene 'Gaalilii Math nuoring, ung nye Saimong aning u yau Aan'duru ang di laangu loora a mani 'puong. 'Bojung ba daang iye 'jingnyogihiba. 17 Ka 'Yesu yeli 'kubo: Ye wa 'tuurimo. N na iyeng ka ye leu i niba ang na nyogiha ninsaaliba a'wo jima. 18 'Dayeni bang bahi ba laanhi, a che 'tuuruu. 19 Ung daang tagi 'yi fling, a nye 'Jeemes, Zeebe'di 'bi-dau, aning u yau Joon. Bang ming bi 'gbori 'puong a maana ba laanhi. 20 'Dayeni ung daang buongba, bang bahi ba ba Zeebe'di aning a tungtuniba ung ngmi pa a 'gbori 'puong, a che 'tuuruu. 21 Bang daang ti kpe Kapeeriniyum, peenhibu daari ung daang kpe Ngming'puohi 'deu a 'wuli. 22 Ka nomaa daang kpeba u 'wulibu ni yela. 'Bojung u daang 'wulibong a'wo nie ang tan berii kpiengu. U ba 'wulibo a'wo a begu karimihi. 23 'Beng la ka dau kanga daang bi ba Ngming'puohi 'deu 'puong a tan sibeu. 24 Ung daang tahing a yeli: 'Yesu ang 'yi Naazaret, bahiti. Wala la ing wa kpiera ti yela 'puo? I wayeng ka i wa nyuongti? N bangye nie ang lii. Naangmini Bungpegi'yiruu ni lii. 25 Ka 'Yesu daang 'miing u ingang, a yeli: Tang i nuori, a che wa 'yi u ingang. 26 Ka a sibeu daang 'ihuu loo ung moora yaga jaa. Ka a sibeu 'cheehi aning kokokpiengaa a wa 'yi u ingang. 27 Ka nomaa daang kpe ba jaa yaga jaa, bang jugihi taa, a yera: 'Bo yela la nga? 'Bo 'wuli-paalaa la nga? Ung mang yeli aning berii kpiengu, ka sibee i yeli ang mang 'tu u nuori. 28 'Wieng ka u yela daang buring yaari 'Gaalilii paaluu jaa 'puong. 29 Sanga ni bang daang wa 'yi a Ngming'puohi 'cluing, 'dayeni ka u ning 'Jeemes aning Joon gaa ti kpe Saimong aning Aan'duru 'deu. 30 Che ka maahuu daang kpe Saimong diempoga ung jeng. Bang yeluu u yela 'wieng. 31 Ung gaa u seng a ti nyogi u 'nung, a 'ihuu. Ka a maahuu daang bahuu 'wieng. Ung 'ihi, a tung 'kubo. 32 Ngminaa ang daang wa kpe ka jie suo, bang waaningbaaliba jaa aning niba ang tari sibee u seng. 33 Ka a 'yiri ning u 'muni jaa daang laanhi wa mili a 'di-nuoring. 34 Ung daang nyaa ningjemaa ang tan baalung 'irii jaa, a kari sibee yaga 'ihe baha. U daang ba veng ka a sibee yeli yela, 'bojung a daang bamuung. 35 'Jie ang daang wa tohi nyaabu, ka 'Yesu 'ihi 'yi a ti kpe jie ang sogili, a 'puohi Naangmini 'be. 36 Ka Saimong aning banani ang daang bi u seng kari u boo. 37 Bang wa nyiu, bang yeli 'kuu: Niba jaa buoriing. 38 Ung yeli 'kubo: Ye veng ka ti gaa ji-jaala a ti kpe 'yie ang tohi, ka n ti ing 'duoho beng ming. Bila 'jung mang 'yi. 39 Ung da mang inna 'duoho ba Ngming'puohi 'dering 'Gaalilii paaluu jaang, a da mang kara sibee 'ihe baha. 40 Ka kongkonga kanga daang wa 'Yesu seng, a wa 'gbinti u 'ningbi-tooring, a suhuu, a yeli: Ka inang buora, i na tuong veming ka n nyaa. 41 Ka nimboo daang kpe 'Yesu, ung di u 'nu tie a fiinhuu, a yeli 'kuu: N buorang. Nyaa. 42 'Dayeni ka a kongkongti daang baahi u ingang, ung nyaa. 43 Ung daang kpaahuu kpiengaa kpiengaa a bahuu 'wieng, 44 a yeli 'kuu: Banna, to wa yera yeli nga 'kuro nie jaa. Che i di i minga gaa ti 'wuli Ngming'puohi 'yi-diera a 'ku i nyaabu butmhu 'Moosis ang daang 'ku nuori ka ba 'ku, ka bila i 'sieree 'kubo. 45 Che ung daang 'yi gaa ti 'piili a yera yela yaga jaa, a yaara a yela. 'Haali gba 'Yesu daang ba la tuong na kpe 'yiri jaa 'puo nib a 'ningbiring. Ung kpeling a mo'sogong. Bang daang 'yire jie jaa a waana u seng.
Prev
Play
Next
Volume
Speed
0.7511.251.52