[Bible] Mateo 1

Ana mga Ginikanan ni Jesus

(Lu. 3:23–38)

1 Amo adi ana listaan nyo mga laing inalinan ni Jesu Kristo na alin sa lai ni David na alin man sa lai ni Abraham.

2 Si Abraham ama ni Isaac, si Isaac ama ni Jacob, si Jacob ama ni Juda ag nya sakanyang mga ipatngood. 3 Nagin mga agin man ni Juda ag Tamar sira Farez ag Zera, si Farez ama ni Esrom, si Esrom ama ni Aram. 4 Si Aram amo man ama ni Aminadab, si Aminadab ama ni Naason, si Naason ama ni Salmon. 5 Si Salmon ama ni Boaz (si Rahab ana sakanyang ina usad na Hentil ※ ), si Boaz ama ni Obed (si Ruth ana sakanyang ina), si Obed ama ni Jesse. 6 Si Jesse ama ni Hading David. Nagin agin ni David sa dating sugud ni Urias si Solomon.

7 Si Solomon ama ni Roboam, si Roboam ama ni Abias, si Abias ama ni Asa. 8 Si Asa ama ni Josafat, si Josafat ama ni Joram, si Joram ama ni Uzias. 9 Si Uzias ama ni Jotam, si Jotam ama ni Acaz, si Acaz ama ni Ezeqias. 10 Si Ezeqias ama ni Manases, si Manases ama ni Amon, si Amon ama ni Josias. 11 Si Josias ama ni Jeconias ag nyo sakanyang mga ipatngood. Panaon nyadto nyo pagkaoripun nyo mga Israelita adto sa Babilonia. 12 Pakatapos nyo pagkaoripun sa sakanda adto sa Babilonia, nagin agin ni Jeconias si Salatiel, si Salatiel ama ni Zorobabel. 13 Si Zorobabel ama ni Abiud, si Abiud ama ni Eliakim, si Eliakim ama ni Azor, 14 si Azor ama ni Zadok, si Zadok ama ni Aquim, si Aquim ama Eliud; 15 Si Eliud ama ni Eleazar, si Eleazar ama ni Matan, si Matan ama ni Jacob. 16 Si Jacob ama ni Jose, na sugud ni Maria na ina ni Jesus, na piba'nong Kristo.

17 Kaya poon ki Abraham anggan ki David agko katorsing enerasyon, katorsing enerasyon man poon ki David anggan sa madara ag maoripun yo mga Israelita adto sa Babilonia, nagkaagko pa nin katorsing enerasyon poon nyo maoripun sira sa Babilonia anggan sa panaon nin pagkamundag ni Kristo.

Ana Pagpangagin ki Jesu Kristo

(Lu. 2:1–7)

18 Bagadi yo mga pangyayari kaso ipangagin si Jesu Kristo. Si Maria na sa sakanyang ina ag si Jose nakatalaan nang ikasal. Piro bago pa man sira ikasal, napag-isyan na ni Maria na mabrus iya sa paagi nya kapangyariyan nin Espirito Santo. 19 Piro dail usad na taong matanos si Jose na sakanyang masusugud, ag indi niya muyang mapasupug si Maria, inisip niyang sowayan si Maria nin pailum.

20 Piro abang piparaisip adi ni Jose, nagpakita sa sakanyang pangatorogan yo usad na anghel nin Kagorangnan. Sinabi nyadi sa sakanya, “Jose, agin ni David, indi ika matakot na pakasalan si Maria, ta ana agin na pidara niya alin sa Espirito Santo. 21 Mangangagin iya nin usad na omboy na lalaki ag Jesus ana ipapangaran mo sa omboy ta ililigtas niya ana sakanyang banwaan sa sakandang mga kasa'lan.”

22 Nangyari ana mga bagay na adi tanganing magibo yo sinabi nin Kagorangnan sa paagi nyo Propeta,

23 “ ‘Ki'tun ninyo, magimabrusun ana usad na birhen ag mangangaginun nin usad na lalaki,

ag baba'noon ading Emmanuel’ ”

(ana kaologan nyadi, “Kaiba ta ana Dios”).

24 Kaso mapagmata si Jose, sinonod niya yo sinabi nyo anghel nin Kagorangnan ag pinakasalan niya si Maria. 25 Piro indi niya adi ino'wud anggan indi pa naipapangagin ni Maria yo agin na lalaki. Ag Jesus ana ipinangaran ni Jose sa agin.

※1:5 Hentil:Amo adi ana ba'no sa manga buku Judio.

2017 Translators Association of the Philippines, Inc. and Philippine Bible Society

MATEO 1