1 1 Itu yo su daptar nu porookian ni Yisus Kristus, mongkupu ni Raja Daud, iri yo mongkupu ni Abraham. 2 Si Abraham amo ni Isak, si Isak amo ni Yakub, si Yakub amo ni Yahuda om kosusulodan niyo. 3 Si Yahuda amo ni Piris om ni Jira. Ino nosiro si Tamar. Si Piris amo ni Ijrun, si Ijrun amo ni Aram, 4 si Aram amo ni Aminadab, si Aminadab amo ni Naasun, si Naasun amo ni Salmun. 5 Si Salmun amo ni Buas. Ino niyo si Raab. Si Buas amo ni Ubid. Ino niyo si Ruut. Si Ubid amo ni Yisai, 6 si Yisai amo ni Raja Daud. Si Raja Daud amo ni Salumu, ino ni Salumu baya' sawo ni Uria nu gulu ri. 7 Si Salumu amo ni Riabiam, si Riabiam amo ni Abija, si Abija amo ni Asa, 8 si Asa amo ni Yusapat, si Yusapat amo ni Yuram, si Yuram amo ni Ujia, 9 si Ujia amo ni Yutam, si Yutam amo ni Aas, si Aas amo ni Ijikia, 10 si Ijikia amo ni Manasi, si Manasi amo ni Amun, si Amun amo ni Yusia. 11 Si Yusia amo ni Yuyakin, om kosusulodan po niyo ri, iya nu pinooda'an nu lobuw Israil so Babil. 12 Si Yuyakin amo ni Sialtil, si Sialtil amo ni Jirubabil, 13 si Jirubabil amo ni Abiud, si Abiud amo ni Iliakim, si Iliakim amo ni Ajur, 14 si Ajur amo ni Jaduk, si Jaduk amo ni Akim, si Akim amo ni Iliud, 15 si Iliud amo ni Iliajar, si Iliajar amo ni Matan, si Matan amo ni Yakub, 16 si Yakub amo ni Yusup, sawo ni Maria minoganak so si Yisus Kristus, iri Raja Nijanji nu Kinoringan. 17 Indadi, kuwai opulu om opat sinolusukan ungkiat so si Abraham sampai so si Daud. Om opulu ya om opat sinolusukan ungkiat so si Daud sampai so pinooda'an nu bansa Israil so Babil. Om ungkiat nu iri, opulu po om opat sinolusukan om nologa' nai' kinopuonakan so si Kristus. 18 Soko itu yo kinopuonakan so si Yisus Kristus. Ino Niyo si Maria pogong ni Yusup, nga dai po nokopuontun nosiro, minomontian-o si Maria ungkiat so kuasa nu Atod nu Kinoringan. 19 Soko iri po mokitototak sono si Yusup momogong so si Maria. Nga pagka otulid inowoon niyo, dai ya pinointolang niyo so lobuw suang padu-padu niyo iiri, so' dai iyo moingin mongoiyu' so si Maria. 20 Laid ni Yusup mongiro-kiro nu padu-padu niyo iiri, nokoupi iyo nu ido susuu'on nu Kinoringan mutangar so iyo nu, “Oo Yusup, solusuk ni Raja Daud! Adang ko yo tumotak momogong so si Maria. Ontuno yo iyo, so' ono yo po pontianon niyo no ungkiat so kuasa nu Atod nu Kinoringan. 21 Muanak iyo nu lolaing kusoi om subai ingoranan mu Iyo so si Yisus, so' Iyo yo su monapul nu lobuw songapan Niyo ungkiat so ponginsaadan nu Kinoringan suat nu koraayan nosiro,” koo susuu'on-i. 22 Nourug ono tayon ong otuman tinangar nu Kinoringan nilombus nu poo'abar Niyo nu gulu ri nu, 23 “Ido roraa momontian om muanak nu lolaing kusoi. Om paawon Iyo so si Imanuil,” koo ri, orati nu Imanuil so tangar Ibrani, “maid-waid Kinoringan so toko”. 24 Norios-o po si Yusup, waido yo niyo tangar nu susuu'on iiri om ontuno yo niyo si Maria. 25 Nga dai po minurompit nosiro musingkopuanak ni Maria nu lolaing kusoi oono. Om nopuanak-o po lolaing oono, ingorani yo ni Yusup so si Yisus.
Prev
Play
Next
Volume
Speed
0.7511.251.52