1 1 Aniy tsʼoqkanta ixtaqaʼutikʼan yu maqancha ixpayankʼan ni Jesucristo. Jesucristo va ixpapanti ni David yu ixpapanti ni Abraham. 2 Ni Abraham lhitsukul istsʼal Isaac, Isaac lhitsukul Jacob, Jacob lhitsukul Judá ali ixtʼalaqaunin. 3 Judá lhitsukul ni Fares ali Zara. Ixnatikʼan va Tamar. Fares lhitsukul Esrom, Esrom lhitsukul Aram. 4 Aram lhitsukul Aminadab, Aminadab lhitsukul Naasón, Naasón lhitsukul Salmón. 5 Salmón lhitsukul Booz, yu ixnati va Rahab. Booz kun ixanati Rut talhitsukul Obed. Obed lhitsukul Isaí. Isaí lhitsukul ni David yu ay jalhachimoʼonuʼ ixjunita. 6 David lhitsukul Salomón tejkan tʼatsukul ixanati aqayntaun xapay yu ixjunkan Urías. 7 Salomón lhitsukul Roboam, Roboam lhitsukul Abías, Abías lhitsukul Asa. 8 Asa lhitsukul Josafat, Josafat lhitsukul Joram, Joram lhitsukul Uzías. 9 Uzías lhitsukul Jotam, Jotam lhitsukul Akaz, Akaz lhitsukul Ezequías. 10 Ezequías lhitsukul Manasés, Manasés lhitsukul Amón, Amón lhitsukul Josías. 11 Josías lhitsukul Jeconías kun ixtʼalaqaunin. Yucha tejkan ni israelitas va laklhaʼankal tachʼinin tus laka putaulan Babilonia. 12 Tejkan ancha ixlaklhaʼankantacha ex ni Jeconías lhitsukul Salatiel. Salatiel lhitsukul Zorobabel. 13 Zorobabel lhitsukul Abiud, Abiud lhitsukul Eliaquim, Eliaquim lhitsukul Azor. 14 Azor lhitsukul Sadoc, Sadoc lhitsukul Akim, Akim lhitsukul Eliud. 15 Eliud lhitsukul Eleazar, Eleazar lhitsukul Matán, Matán lhitsukul Jacob. 16 Jacob lhitsukul José yu ixapay ni María. Yucha va ixnati ni Jesús yu mispakan tacha Cristo, yu Dios lakʼulata tacha Jalhachimoʼonuʼ. 17 Ex chuncha tapasal tampajkautʼati lapanakni yu Abraham tus tejkan tsukul David. Vachuʼ tapasal tampajkautʼati lapanakni yu David tus jalaklhaʼankal tachʼinin ni israelitas laka putaulan Babilonia. Vachuʼ tapasal tampajkautʼati lapanakni tejkan jalaklhaʼankal laka Babilonia tus tejkan tsukul ni Cristo. 18 Tejkan tsukul ni Jesucristo va inchine val. María yu ixnati va ixtalaxaqalatacha para katalatʼatsukul kun José. Ex chuncha mas jantukaʼ ixtalatʼatsukuy yu María va jaʼaynaʼ val kun ixtapʼasta ni Espíritu Santo. 19 Ni José yu ixapay ni María va qalʼox lapanaki ixjunita, va jantu ixjamakʼatsaniputun ni lapanakni. Ex ni yucha va saq ixmakaunputunchoqoy. 20 Ex va chuncha ixpastaktacha tas ixpumakaunlhi. Taval ixmayul ni Jalhachimoʼonu Dios tasunil la ixʼaqlaqavanti, va junil: —José, ixpapanti kʼatʼi ni David, jantu katʼalhan para kalaʼaʼitʼi ni María tacha mixanati. Yu jasʼatʼa kalhitsukuyaʼ va ixnavin ni Espíritu Santo. 21 Yu María kalhitsukuyaʼ qayntaun tsʼal, kʼaʼuneʼe ixtaqaʼuti Jesús. Chuncha kajunkanaʼ va por kalaqmalaqtaxtuyaʼ ni lapanakni la ixtalaqalhinkʼan. 22 Chuncha tapasal va para laqsaval kaval yu maqancha naul ni Jalhachimoʼonu Dios por ni lapanakni yu ixtalaqputeʼey ixchivinti, va naul: 23 Qayntaun jatsiʼi jaʼaynaʼ kunaʼ, kalhitsukuyaʼ qayntaun jasʼatʼa. Ni yucha kajunkanaʼ Emanuel. Anchanu taqaʼuti va naunputun: Ni Dios alinta kun kijnankʼan. 24 Ex tejkan lakpukujchoqolcha ni José, va chuncha makal tacha junil ixmayul ni Jalhachimoʼonu Dios, va laqaʼilcha ni María tacha ixanati. 25 Pero jantukaʼ ixtalatʼatamay tus tejkan lhitsukul istsʼal ni María. Ex chuncha ni José va mukʼanil ixtaqaʼuti JESÚS.
Prev
Play
Next
Volume
Speed
0.7511.251.52