1 1 Gitio noyo suang ru papag ri Jisus Kristus. I Jisus no papag ru raja' Daut, am i Daut papag ri Abragam. Intor ri Abragam suku' ri Daut gitio noyo inggalan ru kinamatuaan ri Jisus: 2 I Abragam ama' ri Isak; i Isak ama' ri Jakub; i Jakub ama' ri Jiuda am pinongkotob nano; 3 I Jiuda ama' ri Piris am i Jirag (ina' nilai i Tamar); i Piris ama' ri Gijron; i Gijron ama' ri Ram; 4 I Ram ama' ri Aminadab; i Aminadab ama' ri Nagason; i Nagason ama' ri Salmon; 5 I Salmon ama' ri Boas; (ina' nali i Ragab); i Boas ama' ri Obid (ina' nali i Rut); i Obid ama' ri Isai; 6 I Isai ama' ru raja' Daut. Intor ri Daut suku' ulun ru Israil inulipon ra pagun ru Babil, gitio noyo inggalan ru kinamatuaan no: I Daut ama' ri Salomo (ina' ri Salomo ti andu' galing ri Uria); 7 I Salomo ama' ri Rigabiam; i Rigabiam ama' ri Abia; i Abia ama' ri Asa; 8 I Asa ama' ri Josapat; i Josapat ama' ri Joram; i Joram ama' ri Ujia; 9 I Ujia ama' ri Jotam; i Jotam ama' ri Agas; i Agas ama' ri Gijkia; 10 I Gijkia ama' ri Manasi; i Manasi ama' ri Amon; i Amon ama' ri Josia; 11 I Josia ama' ri Jikonya am pinongkotob nano poyo ondo' inulipon am inibit giu' ra pagun ru Babil. 12 Kopongo ra ilo inulipon ra pagun ru Babil suku' ri Jisus inanak, gitio noyo inggalan ru kinamatuaan no: I Jikonya ama' ri Sialtiil; i Sialtiil ama' ri Jirubabil; 13 I Jirubabil ama' ri Abigud; i Abigud ama' ri Iliakim; i Iliakim ama' ri Ajur; 14 I Ajur ama' ri Jadok; i Jadok ama' ri Akim; i Akim ama' ri Iliud; 15 I Iliud ama' ri Iliajar; i Iliajar ama' ri Matan; i Matan ama' ri Jakub; 16 I Jakub ama' ri Jusup, ralaki ri Maria. I Maria ti noyo naganak ri Jisus ondo' piawon ri Kristus. 17 Intor ri Abragam suku' ri Daut mokoondo' mopor am apat papag ri Jisus. Mokoondo' poyo mopor am apat papag intor ri Daut suku' ra ilo inulipon ra pagun ru Babil, am mokoondo' poyo mopor am apat papag intor ragili suku' i Kristus inanak. 18 Gitio noyo tunung ru naganakan ri Jisus Kristus. Ina' nano i Maria nakapantamung ilo no ri Jusup. Kaa' kalo poyo nasimpung ilo, i Maria ti maapang intor ra kuasa' ru Ambiluo ri Aki Kapuuno'. 19 I Jusup ti sangulun ondo' masalok mambaal ra motopot, kaa' kalo masaga' io mampakauyu' ri Maria koson mambala' ra ulun masuang. Pamaguangan ri Jusup bukaton no tamung nilono ra kolondo' ulun makatutun. 20 Paat ri Jusup nampaguang koson raginio naginupi io. Pulusat boo ru sangulun malaikat am indagu io ri Jusup, “O Jusup, papag ru raja' Daut, pai' no kalaa' manangandu' ri Maria ti, sabap anak nano intor ra kuasa' ru Ambiluo ri Aki Kapuuno'. 21 Ginio ra maganak i Maria ti sangulun anak ungkuyon am inggalanin mu Io no i Jisus, sabap Io ti mamayag ra ulun Nano intor ra tula nilono.” 22 Ngaangai' ragitio masauk maya' ra ragu ru Tuhan ondo' pinasaboi galing ra nabi, iono, 23 “Maapang ralaa ti am maganak io ra sangulun anak ungkuyon am inggalanin anak ti ri Imanuil.” (Sumugut ra ragu ru ulun ru Ibrani, Imanuil arati' no, “I Aki Kapuuno' mabaya' ritakau.”) 24 Sukal i Jusup am bayaa' no susuban ru malaikat ra inupi nali am ongoyo' no uoto' i Maria. 25 Kaa' kalo liminampit i Jusup ri Maria saboi io nakapaganak. Inggalani' ri Jusup anak no i Jisus.
Prev
Play
Next
Volume
Speed
0.7511.251.52