1 1 Bobu i butantiko bwa meena a bikolue byakua Yesu Kristu wa mu luvyalo lwakua Daudi, kabili waali wa mu luvyalo lwakua Abrahamu. 2 Abrahamu waavyele Izaaki, Izaaki waavyele Yakobo, Yakobo waavyele Yuda ni bakwakue, 3 Yuda waavyele Peresi ni Sera, (nghinabo waali Tamari). Peresi waavyele Esroni, Esroni waavyele Aramu, 4 Aramu waavyele Aminadabu, Aminadabu waavyele Nasoni, Nasoni waavyele Salmoni, 5 Salmoni waavyele Boazi, (nghinabo waali Rahabu). Boazi waavyele Obedi, (nghina waali Ruti). Obedi waavyele Yese, 6 Yese waavyele Likolo Daudi. Daudi waavyele Solomoni, (nghina waali muka Uria). 7 Solomoni waavyele Rehoboamu, Rehoboamu waavyele Abia, Abia waavyele Asa, 8 Asa waavyele Yehoshafati, Yehoshafati waavyele Yoramu, Yoramu waavyele Uzia, 9 Uzia waavyele Yotamu, Yotamu waavyele Aazi, Aazi waavyele Hezekia, 10 Hezekia waavyele Manase, Manase waavyele Amoni, Amoni waavyele Yosia, 11 Yosia waavyele Yekonia ni bakwakue. Pa ozo musita, Baizraeli baali bateekelue buzia mu Babiloni. 12 Pa kyamba kya kutwamua ni kuya kuteekua buzia mu Babiloni, Yekonia waavyele Salatieli, Salatieli waavyele Zerubabeli, 13 Zerubabeli waavyele Abiudi, Abiudi waavyele Eliakimu, Eliakimu waavyele Azori, 14 Azori waavyele Sadoki, Sadoki waavyele Akimu, Akimu waavyele Eliudi, 15 Eliudi waavyele Eliazari, Eliazari waavyele Matani, Matani waavyele Yakobo, 16 Yakobo waavyele Yusufu waupile Maria. Ozo Maria i waavyele Yesu aliwakuutua Kristu. 17 Kutendeka pali Abrahamu mpaka pali Daudi, kwaali nvyalo likumi na ina. Kutendeka pali Daudi mpaka musita ubaile kuteekua buzia mu Babiloni, kwaali nvyalo likumi na ina. Lubaafumine mu Babiloni mpaka musita wa kuvyalua kwakua Kristu, kwaali nvyalo likumi na ina. 18 Kuvyalua kwakua Yesu Kristu kwaali evi: Maria nghina kwa Yesu luali wasakilue na Yusufu, lubaali tebanalaale nakue pamo, Maria waamwenekele waimisi na maka a Mweo Muzuuke. 19 Yusufu waali mulunghami lyonse, kabili taatonene kumumonia Maria busoni pa menso a bantu. Ni pakako, waamwene kuti amukaane mu kafiso. 20 Luali wakilimukulangakana evio, malaika wakua Leza wamumonekela kale Yusufu mu kilooto wamwana, "We Yusufu wa mu luvyalo lwakua Daudi, tekutiina kumutwama Maria kuti abe mukazi obe, pantu leli livumo lyaimisi, emisi na maka a Mweo Muzuuke. 21 Maria waakavyala mwana mwalalume, ozo mwana ukamwinike Yesu, pantu i waakalubula bantu bakue mu bibalo byabo." 22 Bebi byonse byaakitikile evio pa mulandu wa kufikilizia keebo kaalandilue na Mulopue kupitila muli kabika, 23 "Kinundue kyaakeemita ni kuvyala mwana mwalalume. Ozo mwana waakaba wakuutua Emanueli." (I kulanda nangue, "Leza ali pamo ni fwefue"). 24 Yusufu luabuukile, waakitile mwaamwaniine malaika. Wamutwama Maria waya nakue ku nghanda. 25 Inzi taaleele nakue pamo mpaka musita waavyaliiluepo mwana wakue mwalalume. Ozo mwana, Yusufu waamwinikile Yesu.
Prev
Play
Next
Volume
Speed
0.7511.251.52