5 1 Jesus, achca runacuna paita caticpi ricushpa, shuc urcuman sicarca; tiyaricpi, pai yachachishcacuna mayanyanurca. 2 Mayanyanucpi Jesus yachachincapac callarirca nishpa: 3 —Cushiyaichic Diosta mutsunchic niccuna, jahua pacha cancunapacmi. 4 Cushiyaichic cai causaipi huacaccuna, cushiyachishca canquichic. 5 Cushiyaichic casi shuncuyuccuna, cai pachata cui tucunquichic. 6 Cushiyaichic Dios munashcata rurasha niccuna, chaita rurancapac Dios cancunata yanapancami. 7 Cushiyaichic shuccunata llaquirishpa yanapaccuna, Dios cancunata llaquirishpa yanapancami. 8 Cushiyaichic chuya shuncuyuccuna, Diosta ricunquichicmi. 9 Cushiyaichic piñanacunata jarcaccuna, Diospac churicuna canquichicmi, 10 Cushiyaichic allita rashcamanta ñacachi tucuccuna, jahua pacha cancunapacmi canca, 11 Cushicuna canquichc ñucaraicu cancunata chicninucpi, piñanucpi, manallita cancunamanta llullashpa rimanucpi. 12 Chashna tucucpi, cushiyanquichic; jahua pachapi cancuna cui tucuna yapa jatunmi canca. Ñaupa causashca profetacunata chai layallata llaquichinurca. 13 Cancuna cai pachapi cachi shina canquichic. Cachi paipac mishquita chincachicpi, ¿imahuan cutillata cachiyanca? Mana imapac balin; jichununlla, runacunaca jaitanun. 14 Cancuna inti shina canquichic runacunapac. Shuc urcu jahuapi tiyac llacta mana pacaipacchu. 15 Shuc chinpusuta mana japichinchic mala ucupi churancapac; jahuapi churancapac japichinchic, huasipi tiyaccunata ricuchincapac. 16 Cancunapac achic runacuna ñaupacpi punchaclla ricurichun, shuccuna cancuna alli rashcata ricushpa, jahua pachapi tiyac Yayata sumacyachincapac. 17 Ñuca mana shamurcanichu camachic quillca rimashcata, profetacuna rimashcatapash anchuchincapac; chaicunata pactachincapac shamurcani. 18 Shuti cancunata nini: Jahua pachahuan cai pachahuan tucuricpipash, camachic quillcapi tiyac illacta pactarinca. 19 Chashna cacpi, maicanpash camachic quillcapi tiyashcata mana pactachicpi uchillapipash, chashna rancapac shuccunata yachachicpi, jahua pachapi puchucai canca; ranti, maicanpash chaicunata pactachicpi, chaicunata pactachincapac yachachicpi, jahua pachapi cui tucuna yapa jatunmi canca. 20 Cancunata nini: Cancuna camachic quillcata yachaccunamanta, fariseocunamanta yaili allicuna mana cashpa, jahua pachaman mana yaicunquichic. 21 Ñaupacunaman cashna rimanurca —cancuna chaita yachanquichic—: "Ama huañuchinquichu; huanuchic runa cautsayachi tucunca". 22 Ranti, ñuca cancunata nini: Shuccunata yanca piñac runa, cautsayachi tucunca. Maicanpash shucta asishpa paita "Upa" nicpi, tucui taripac bula paita taripanunca. Maicanpash shucta piñashpa paita "millai" nicpi, ucupachapi urmanalla tucunca. 23 Can, canpac camarita Diosman apashpa rishpa, shuc runahuan imatapash charishcata yuyarishpa, 24 camarita chaillapita saquishpa, paihuan allichinqui; chai huasha camarita Diosman ricuchina ushanqui. 25 Can shuc runahuan ima llaquitapash charishpa, utcalla paihuan allichinqui, chaira apupacman mana pactashpallata. Mana chashna ruracpica, apu canta polisia nishcaman cunca, polisiaca chunta curralpi canta huichcanca. 26 Chaimanta mana llucshinqui can dibishcata illacta paganacama. 27 "Ama juchallinquichu" ñaupacunaman rimanurca —chaita alli yachanquichic. 28 Ñuca cancunata nini: Maicanpash shuc huarmita mana alli yuyaihuan ricushpa, paipac shuncupi ña juchallirca chai huarmihuan. 29 Chairaicu, canpac ñahui canta juchallichicpi, chaita surcushpa jichunqui. Canpac aichamanta shuc aichashitu chincaricpi yalli alli canca ama tucui aicha ucupachaman shitai tucuncapac. 30 Canpac maqui canta juchallichicpi, pitishpa jichunqui. Canpac aichamanta shuc aichashitu chincaricpi yalli alli canca ama tucui aicha ucupachapi shitai tucuncapac. 31 Ñaupacunaman caitapash rimanuica: "Shuc runa paipac huarmita jichusha nishpa, maqui llushpichina quillcata paiman cuna can". 32 Ranti, ñuca cancunata nini: Maicanpash paipac huarmita jichushpa, —mana yanca llutarishca cacpi—, paita juchallichin, chai runaca jatun juchata ran; chai huarmihuan casarac runapash jatun juchata aparin, 33 Chashnallata, ñaupacunaman rimanurca nishpa: "Ama llullashpa Diospac shutita rimanquichu; Diospac shutita rimashpai paiman cusha nishcata pactachina can". 34 Ñucaca cancunata nini: Ama imura jurashpa rimanquichichu; mana jahua pacha shutipi, jahua pacha Diospac tiyarina mari can 35 Mana cai pacha shutipi, cai pacha Diospac chaqui samanami can; mana Jerusalen shutipi, Jerusalen jatun Apupac llacta mari can. 36 Ama canpac uma shutipi juraichu; canpac acchata yanayachincapac, yuracyachincapac mana ushanqui. 37 Cancuna rimacushpa, "ari" ninquichic "ari" nmana cacpi; "mana" ninquichic "mana" rimana cacpi. Cancuna yapashca manallimanta shamun. 38 Caitapash quillcara tiyan —ña yachanquichic—: "Maicanpash canpac ñahuita huacllichicpi, canpash paipac ñahuita huacllichinqui; pipash canpac quiruta paquicpi, canpash paipac quiruta paquinqui". 39 Ranti, ñuca cancunata nini: Manallicunata ama jarcaichichu. Shuc ñahuipi canta macanucpi, shuctapash ricuchinqui. 40 Canta apupacman pushanucpi canpac camisata quichuncapac, calsuntapash cunqui. 41 Maicanpash canta nicpi: "Caita apashpa ri chaicama", astalla caruman apashpa rinqui. 42 Maicanpash canta imatapash mañacpi, paiman cunqui, "mañachihuai" nishpa nicpi, ama mitsaichu. 43 Caitapash quillcara tiyan: "Canpac llactamanta caccunata llaquinqui, canta chicniccunata chicninqui". 44 Ranti, ñuca cancunata nini: Cancunata chicniccunata llaquinquichic, cancunata ñacachiccunamanta Diosta mañanquichic. 45 Chashna rashpa, cancunapacjahua pachapi tiyac Yayapac churicuna canquichic. Pai allicuna jahuapi, manallicuna jahuapipash intita llucshichin; allicuna jahuapi manallicuna jahuapipash tamiachin. 46 Cancunata llaquiccunallata llaquishpa, ¿imata cuyai tucunquichic? ¿Manachu chaillata manallicuna ranacun? 47 Cancunapac aillucunallata salurashpa, ¿ima allita ranquichic? Diosta mana ricsiccunapash chaita ranacun. 48 Allicuna caichic, cancunapac jahua pachapi tiyac Yaya alli cashca shina.
Prev
Play
Next
Volume
Speed
0.7511.251.52