1 1 Davidpa churin Salomonpa rikch'anachiy siminkuna, paymi Israel suyupi rey karqan. Kay rikch'anachiy simikunaqa 2 yachaytawan yachachiytawan tarinapaqmi, ancha yachaywan rimasqakunata entiendenapaqmi, 3 allin yachachisqa kaywan tanteaywan kawsanapaqmi, chaninkaqtapas, chaninchaytapas, k'apak-kaytapas ruwaspa, 4 warmakunata yuyaysapaman tukuchinapaqmi, waynakunatapas yuyaychaspa yuyayta hap'ichinapaqmi. 5 Yachayniyoqpas chaykunata uyarispaqa aswan yachayniyoqmi kanqa, yuyayniyoqpas aswan allin yuyaychasqan kanqa. 6 Chay hinapi, rikch'anachiy simitapas mana sut'i kaq simitapas, yachayniyoqkunaq simintapas watuchiyninkutapas entiendenapaq. 7 Yachayniyoq kanapaqqa ñawpaqtaraqmi Señor Diosta manchakuna, mana yuyayniyoqkunaqa pisipaqmi qhawarinku yachaytapas yachachiytapas. 8 Churilláy, uyariy taytaykiq yachachiyninta, kasukullaypuni mamaykiq yachachisqasuykita, 9 umaykipaq t'ika corona hinan kanqa, kunkaykita sumaqchaq walqana hinan kanqa. 10 Churilláy, huchasapakunachus q'otuyta munasunki chayqa, ama kasukuychu. 11 Paykunachus nisunkiku: Haku ñoqaykuwan, runata wañurqachinapaq suyapamusunchis, mana huchayoqta yanqapuni wañuchimusunchis. 12 Wañuy-pacha hina kawsashaqta paykunata millp'uykusun, aya t'oqoman chinkaykuqta hina kaqtapacha oqoykusun. 13 Imaymana qhapaq kaytan tarisun, qechusqakunawan wasinchista hunt'achisun. 14 Ñoqaykuman hinan qanmanpas tupasunki, llapallanchis huk bolsallayoq kasun, nispa chayqa, 15 churilláy, ¡amapuni paykunawan puriysikuychu! Purinankumanta karunchakuy. 16 Paykunaqa mana allinmanmi phawarinku, runata wañuchinankupaqmi usqhanku. 17 Yanqapaqmi toqllata churanku phalaq animalkunaq rikushasqanqa, 18 paykunaqa kikinkupaqmi toqllata churakunku, toqlla churasqallankupitaqmi wañunqaku. 19 Chay hinatan tukukun suwakuyman sonqollikuqqa, chay sonqollikuymi payta wañuchin. 20 Yachaymi callekunapi waqyakun, plazakunapi qaparin, 21 askha runaq kasqankunapin waqyakun, llaqta haykuna punkukunapin chayasqa simikunata riman: 22 Yaw, pisi yuyayniyoqkuna, ¿hayk'aqkamataq pisi yuyayman k'askakunkichis? Yaw, asipayaqkunapas, ¿hayk'aqkamataq asipayaspa kusirakunkichis? Yaw, mana yuyayniyoqkunapas, ¿hayk'aqkamataq yachayta cheqnikunkichis? 23 Anyaykuyniyta maki uyariwaychis, ñoqan yachayniyta mast'arimusqaykichis, simiykunatan yachachisqaykichis. 24 Waqyamurqaykichismi, manataq uyarimuyta munawarqankichischu, makiytan mast'arimurqaykichis, manataq rikuqpas tukuwarqankichischu. 25 Aswanmi llapa kunaykuyniykunata wikch'uykukurqankichis, manan anyaykuyniytapas munarqankichischu. 26 Chaymi ñoqapas muchuqtiykichis asikusaq, hatun llaki chayamusuqtiykichispas kusipayasqaykichis, 27 hatun llaki lloqlla hina chayamuqtin, muchunaykichis muyuq wayra hina chayamuqtin, qankunaman llakipakuypas phutikuypas chayamuqtin. 28 Chaypachan waqyakamuwankichis, manataqmi kutichimusqaykichischu, maskhawankichismi, manataqmi tariwankichischu. 29 Yachaytan cheqnikurqankichis, manan Señor Diostapas manchakuyta munarqankichischu. 30 Kunaykuyniytan wikch'uykukurqankichis, manan ima anyaykuyniytapas chaskikurqankichischu. 31 Mana allin ruwasqaykichispa ruruntan cosechankichis, mana allin yuyaykusqaykichispa rurunwanmi amichikunkichis. 32 Pisi yuyayniyoqkunataqa pantasqallankutaqmi wañuchinqa, mana yuyayniyoqkunataqa llakhi kasqallankutaqmi wañuchinqa. 33 Uyariwaqniymi ichaqa mana imanasqalla tiyanqa, mana imatapas manchakuspalla kawsanqa.
Prev
Play
Next
Volume
Speed
0.7511.251.52