1 1 Israel runakunaq Egipto suyumanta lloqsimusqan iskaykaq wataña kashaqtinmi, iskaykaq killaq qallariynin p'unchaypi Sinaí ch'inneqpi Dioswan Tupana Karpapi Señor Diosqa Moisesta nirqan: 2 –Israel llapan runakunata yupay, ayllunkuman hina familiankuman hina sutinmantakama llapan qharikunata. 3 Qanpiwan Aaronpiwanmi yupaspa qelqankichis iskay chunka watayoqmanta wichayman, awqa-tinkuy atiq qharikunata. 4 Sapanka ayllumantan huk umalli yanapasunkichis, 5 chay umallikunan kaykuna: Rubén ayllumanta: Sedeurpa churin Elisur, 6 Simeón ayllumanta: Zurisadaipa churin Selumiel, 7 Judá ayllumanta: Aminadabpa churin Naasón, 8 Isacar ayllumanta: Zuarpa churin Natanael, 9 Zabulón ayllumanta: Helonpa churin Eliab, 10 Josepa miraynin Efraín ayllumanta: Amiudpa churin Elisama, Josepa miraynin Manasés ayllumanta: Peduarpa churin Gamaliel, 11 Benjamín ayllumanta: Gedeoniq churin Abidán, 12 Dan ayllumanta: Amisadaipa churin Ahiezer, 13 Aser ayllumanta: Ocranpa churin Pagiel, 14 Gad ayllumanta: Reuelpa churin Eliasaf, 15 Neftalí ayllumanta: Enanpa churin Ahira, nispa. 16 Chaykunan Israel runakunamanta akllasqa karqan, sapankataq ayllunkupi umalli karqanku. 17 Moisesmi Aaronpiwan sutinmanta akllasqa runakunapiwan huñurqanku, 18 llapan Israel runakunata iskaykaq killaq qallariynin p'unchaypi ayllunkuman hina familiankuman hina, pikunachus ñawpa taytanku kasqanta willakusqankuman hina. Chaymi iskay chunka watayoqmanta wichayman sapanka qharikunata sutinmantakama qelqarqanku, 19 Señor Diospa Moisesta kamachisqanman hina. Chay hinatan Moisesqa Sinaí ch'inneqpi runakunata yuparqan. 20 Iskay chunka watayoqmanta wichayman awqa-tinkuy atiq qharikunatan sutinkumantakama yuparqanku ayllunkuman hina familiankuman hina: Jacobpa phiwi churin Rubén ayllumantan yuparqanku tawa chunka soqtayoq waranqa phisqa pachak qharikunata. 22 Simeón ayllumantan yuparqanku phisqa chunka isqonniyoq waranqa kinsa pachak qharikunata. 24 Gad ayllumantan yuparqanku tawa chunka phisqayoq waranqa soqta pachak phisqa chunka qharikunata. 26 Judá ayllumantan yuparqanku qanchis chunka tawayoq waranqa soqta pachak qharikunata. 28 Isacar ayllumantan yuparqanku phisqa chunka tawayoq waranqa tawa pachak qharikunata. 30 Zabulón ayllumantan yuparqanku phisqa chunka qanchisniyoq waranqa tawa pachak qharikunata. 32 Josepa miraynin Efraín ayllumantan yuparqanku tawa chunka waranqa phisqa pachak qharikunata. Josepa miraynin Manasés ayllumantan yuparqanku kinsa chunka iskayniyoq waranqa iskay pachak qharikunata. 36 Benjamín ayllumantan yuparqanku kinsa chunka phisqayoq waranqa tawa pachak qharikunata. 38 Dan ayllumantan yuparqanku soqta chunka iskayniyoq waranqa qanchis pachak qharikunata. 40 Aser ayllumantan yuparqanku tawa chunka hukniyoq waranqa phisqa pachak qharikunata. 42 Neftalí ayllumantan yuparqanku phisqa chunka kinsayoq waranqa tawa pachak qharikunata. 44 Chaykunatan yuparqanku Moisespiwan Aaronpiwan chunka iskayniyoq umallikunapiwan. Chay umallikunan ayllunkuq rantinpi akllasqa karqanku. 45 Llapan Israel qharikunataq iskay chunka watayoqmanta wichayman awqa-tinkuy atiqkuna 46 soqta pachak kinsayoq waranqa phisqa pachak phisqa chunka karqanku. 47 Leví ayllu familiakunaqa manan wakin ayllukunawan yupasqachu karqan, 48 Señor Diosmi Moisesta nisqa: 49 Israel ayllukunata yupaspaykiqa, aman Leví ayllutaqa yupankichu. 50 Aswanpas kamachikuy simiykuna waqaychana karpapi llank'anankupaqmi churanki, tukuy servicionkunata lliw kaqninkunatawan waqaychanankupaq. Paykunan astanqaku chay karpata tukuy serviciokunatapas. Karpaq muyuriqninpitaq karpakuspa tiyanqaku. 51 Chay karpata astana kaqtinqa, paykunan karpataqa paskanqakupas sayarichinqakupas. Pipas mana Leví runa kashaspa chay karpaman asuykuqqa wañuchisqan kanqa. 52 Israel wakin ayllukunataq t'aqa-t'aqa karpakuspa tiyanqaku, sapanka t'aqa banderantinkama. 53 Leví runakunataq Ñoqawan Tupana Karpaq muyuriqninpi tiyanqaku, chay karpata cuidaspanku, Israel runakuna contra mana phiñakunaypaq, nispa. 54 Hinan Israel runakunaqa Moisesta Señor Diospa kamachisqanman hina lliwta ruwarqanku.
Prev
Play
Next
Volume
Speed
0.7511.251.52