1 1 Señor Diosmi Moisesta waqyaspa Dioswan Tupana Karpamantapacha payta rimapayarqan: 2 –Israel runakunata nimuy: Pipas qankuna ukhumanta Señor Diosman ofrendata haywanqa chayqa, qonqan wakatapas ovejatapas. 3 Ofrendachus ruphachinapaq waka kanqa chayqa, mana imanasqa orqon kanqa. Dioswan Tupana Karpaman haykunapin haywanqa Señor Dios payta chaskinanpaq. 4 Ruphachinapaq sacrificioq patanmanmi makinta churaykunqa, hinan paypaq chaskisqa kanqa huchankunata pampachananpaq. 5 Chaypin torillotaqa nak'anqa, Aaronpa churin sacerdotekunataq yawarta haywanqaku, hinaspan Dioswan Tupana Karpaman haykunapi kashan chay altar muyuriq qhataman yawarta hich'aykunqaku. 6 Chaymantataq ruphachinapaq nak'asqata ch'utinqa, hinaspan chayta moqonarqarinqa. 7 Aaronpa churin sacerdotekunataq altar patapi ninata hap'ichinqaku, hinaspan nina pataman llant'ata churaykunqaku. 8 Hinamantataq paykunaqa moqonasqa aychakunata, umanta, ch'unchul wiranta, altarpi nina pataman wachuchaykunqaku. 9 Ch'unchulkunatapas chakan aychakunatapas haywaqmi mayllinqa, hinan sacerdoteqa altar patapi llapallanta ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan. 10 Ofrendachus ruphachinapaq ovejapas cabrapas kanqa chayqa, mana imanasqa orqotan haywanqa. 11 Chaytan Señor Diospa ñawpaqenpi altarpa wichay ladonpi nak'anqa. Aaronpa churin sacerdotekunataq altar muyuriq qhataman yawarninta hich'aykunqa. 12 Chay nak'asqatan haywaqqa moqonarqarinqa, sacerdotetaq moqonasqa aychakunata, umantawan, ch'unchul wiratawan altarpi nina pataman wachuchaykunqa. 13 Ch'unchulkunatapas chakan aychakunatapas haywaqpa mayllisqantañan sacerdoteqa llapallanta haywaspa altar patapi ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan. 14 Señor Diospaq ofrendachus ruphachinapaq phalaq animal kanqa chayqa, kullkutapas otaq urpi malqotapas haywanqa. 15 Chaytan sacerdoteqa altarman apamunqa, umanta p'itirparispan altarpi ruphachinqa, yawarnintataq altar qhataman sut'uchinqa. 16 Hinaspanmi enqhentapas chaypi kaqtawan horqonqa, chaytataq altarpa inti lloqsimuy ladonman wikch'uykunqa, usphaq kasqanman. 17 Chaymantataqmi iskaynin raphra tupayta kichanqa, ichaqa manan iskayman ch'eqtanqachu. Sacerdotetaq chayta altar patapi ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan.
Prev
Play
Next
Volume
Speed
0.7511.251.52