1 1 Señor Diospa kamachin Moisespa wañukapusqan qhepatan, Señor Diosqa Moisespa yanapaqnin Nunpa churin Josueta nirqan: 2 –Kamachiy Moisesmi wañukapun, ahinaqa qanpas Israel runakunapas wakichikuychis Jordán mayuta chimpaspa qankunaman qonay hallp'aman haykunaykichispaq. 3 Chaypin qosqaykichis llapan chayasqaykichis hallp'ata imaynan Moisesman prometerqani hinata. 4 Chay hallp'aykichismi kanqa wichay lado Líbano orqo-orqomanta uray lado ch'inneqkama, hinallataq inti lloqsimuy lado hatun Eufrates mayumanta inti haykuy lado lamar-qochakama, chaypi kaq Het runakunaq hallp'anpas qankunaqmi kapunqa. 5 Kawsashaqtiykiqa manan pipas atipasunkichu, imaynan Moiseswanpas kasharqani hinallataqmi qanwanpas kasaq, ahinaqa manapunin saqerparisqaykichu manallataqmi wikch'usqaykipaschu. 6 Kallpachakuy, allin qhari kay, qanmi ñawpa taytaykichisman qonaypaq prometesqay hallp'ata kay llaqtaman rakinki. 7 ¡Kallpachakuy! ¡Allinta sayay! Kamachiy Moisespa qosqasuyki kamachikuykunata llapantapuni hunt'ay, amapunin chaykunamantaqa t'aqakunkichu pañamanpas lloq'emanpas, chay hinapin allillan kasunki may purisqaykipipas. 8 Kamachikuy simi qelqamantaqa rimashallankipunin, chaytaqa tuta-p'unchaymi yuyaymanallankipuni qelqaq kamachikusqanman hinapuni ruwanaykipaq. Chay hinapin tukuy ima ruwasqaykipas allinkama kasunki. 9 Qhawariy, ñoqan kamachiyki, kallpachakuspa qhari hinapuni sayay. Ama manchakuychu, amataq pisi kallpayaychu, ñoqa Diosniyki Señor Diosqa qanwanpunin kashasaq maytaña riqtiykipas, nispa. 10 Hinan Josueqa Israel umalli runakunata kamachirqan: 11 –Riychis llapan runakunaman, kamachimuychistaq qoqawata ruwakunankupaq. Kinsa p'unchaymanta hinan Jordán mayuta chimpasunchis, Diosninchis Señor Diospa qowananchis hallp'ata hap'ikapunanchispaq, nispa. 12 Hinallataq Josueqa Rubén ayllu runakunata, Gad ayllu runakunata, Manasés kuskan ayllu runakunatapas nirqan: 13 –Señor Diospa kamachin Moisespa nisqasuykichis simita yuyariychis, paymi nirqan: “Diosniykichis Señor Diosmi kay hallp'ata qosunkichis mana kuyuq tiyanaykichispaq”, nispa. 14 Jordanpa kay ladonpi Moisespa qosqasuykichis hallp'apin saqenkichis warmiykichista, wawaykichista, uywaykichiskunatapas. Allin maqanakuq qharikunallan maqanantinkama, wakin ayllukunaq ñawpaqenta mayuta chimpankichis, paykunata yanapanaykichispaq. 15 Señor Dios mana kuyuqta tiyachinankama imaynan qankunatapas tiyachirqasunkichis hinata, yanapallankichistaqmi Diosniykichis Señor Diospa qonan hallp'ata hap'ikapunankukama. Chaymantataq kutimpunkichis Moisespa qosqasuykichis kay hallp'aykichista hap'ikapunaykichispaq, nispa. 16 Paykunataq Josueta nirqanku: –Arí, llapan kamachiwasqaykikutan ruwasaqku, maytaña: Riychis, niwaqtiykikupas risaqkun. 17 Imaynan Moisestapas tukuy kamachiwasqankuta kasurqayku ahinallataqmi qantapas kasusqaykiku. Ñoqaykuqa munaykun Diosniyki Señor Diosllapuni qanwan kananta, imaynan Moiseswanpas karqan hinata. 18 Kamachikusqaykita mana kasukuqkunapas qan contra sayariqkunapas wañuchisqan kanqaku. Chhaynaqa, kallpachakuy, qhari hinapuni sayay, nispa.
Prev
Play
Next
Volume
Speed
0.7511.251.52