1 1 Kaytan Señor Diosqa Petuelpa churin Joelman rimaykurqan. 2 Kurak runakuna, kayta uyariychis, suyuntinpi llapa tiyaqkunapas, maki uyariychis. ¿Hayk'aqllapas kay hinataqa rikurqankichischu? ¿Hayk'aqllapas kay hinataqa taytaykichiskuna rikurqankuchu? 3 Kayta wawaykichisman willaychis, wawaykichispas wawankuman willachunku, wawankupas qhepa mirayman willachunku. 4 Langosta kurun wakwamuspa q'omerkunata mikhurqan, chaykunaq puchuntataq uña langostakuna mikhurqan, chaykunaq puchuntataq hatun langostakuna mikhurqan, chaykunaq puchuntataq wak langostakuna tukuparqan. 5 ¡Yaw, machaqkuna, rikch'ariychis, waqaychis! ¡Yaw, vino ukyaqkuna, anchiychis! ¡Manañan upi vinoykichis kanqañachu! 6 Kallpasapa askhallaña soldadokuna hinan suyuyman langostakuna hunt'aykamurqan, kirunkuqa orqo leonpa kirunkuna hinaraqmi, waqsankupas china leonpa waqsankuna hinaraqmi. 7 Uvas chakraytan purunyachirqan, higos sach'aykunatan khaskarqan, llapallantan qaranta k'utuspa kumparqan, k'allmankunapas yuraq k'aspin kapushan. 8 Llaqtay runakuna, waqaykuychis, imaynan sipasqa novion wañuqtin qhasqa p'achawan churakuspa waqan hinata. 9 Manañan rurupas vinopas kapunchu Señor Diosman wasinpi haywanapaq, Señor Diospa kamachin sacerdotekunan khuyayta waqaykushanku. 10 Campon purunyachisqa kashan, chakrakunan sonqo nanay kashan, manañan trigo cosecha kapunchu, uvas yurakunan ch'akipun, olivo sach'akunan naq'epun. 11 Manañan cosechanapaq kapunchu, trigopas cebadapas chinkapunmi, chayrayku, chakrayoqkuna, llakikuychis, uvas chakrayoqkuna, waqaykuychis. 12 Uvas yurakunan ch'akipun, higos sach'akunan naq'epun, granada mallkipas, palmera sach'apas, manzana sach'apas, campopi llapa sach'apas ch'akipunmi. Runakunapas manañan kusikapunkuñachu. 13 Yaw, sacerdotekuna, yana p'achawan lutokuychis, yupaychana wasi altarpi serviqkuna, anchiychis. Diosniypa kamachinkuna, yupaychana wasiman haykuychis, qhasqa p'achantin waqaspa chaypi illariychis. Manañan rurupas vinopas kapunchu Diosniykichispa wasinpi haywanaykichispaq. 14 Diospa qayllanpi ayunanapaq llaqta runakunata kamachiychis, Diosmanta mañakunapaq runakunata huñuykuychis Diosniykchis Señor Diospa wasinman hamunankupaq, kurak runakunatapas suyuntinpi llapa tiyaqkunatapas waqyaychis, hinaspa Señor Diosmanta mañakuychis. 15 ¡Imayna manchakuyraqmi! ¡Señor Diospa muchuchinan p'unchaymi sispaykamushan! ¡Tukuy-atiyniyoqpa thuninan manchay p'unchaymi chayamushan! 16 Qhawashaqtinchismi mikhunata qechupuwarqanchis, Diosninchispa wasinpiqa manañan kusikuypas, q'ochukuypas kanñachu. 17 Tarpusqa muhupas k'urpa ukhupin ismupun, manañan cosechanapaq trigo kapunchu, chaymi mikhuy waqaychanakuna kumpasqa kapushan, taqekunan thunisqa kapushan. 18 Khuyaytan uywakuna waqanku, khuyaytan waka t'aqakuna purinku manaña q'achu kapusqanrayku, ovejakunapas tulluyapushanmi. 19 Señor Diosnilláy, qanmanmi waqyakamuyki, ninan q'achu pampata ruphaykapun, ninan campopi llapa sach'ata q'olaykapun. 20 Salqa animalkunapas qanmanmi qaparimusunkiku huch'uy mayukuna ch'akipusqanrayku, q'achu pampakunata nina ruphaykapusqanrayku.
Prev
Play
Next
Volume
Speed
0.7511.251.52