1 1 Judá suyupi rey Uzías, rey Jotam, rey Ahaz, rey Ezequías ima kamachikusqanku watakunapin, Señor Diosqa Amozpa churin Isaiasman Judá suyumanta Jerusalenmantawan kaykunata rikuchirqan. 2 Hanaq pachapas kay pachapas, uyariychis, ñoqa Señor Diosmi nini: Wawakunatan uywakurqani hatun kanankukama, paykunataq ichaqa ñoqa contra sayarirqanku. 3 Toroqa reqsinmi dueñonta, asnopas rikunmi uywaqninpa qarananta, Israel llaqtaymi ichaqa mana reqsiwanchu, manataq entiendenpaschu, nispa. 4 ¡Ay, ikiraqmi! ¡Imaraqmi! Kay suyupi huchasapa runakuna kankichis, hucha q'epi llaqta, mana chanin miraykuna, waqllisqa runakuna. Señor Diosmantan karunchakapunkichis, Israelpa Ch'uya Diosnintan pisichankichis, paytan saqerparipunkichis. 5 ¿Imanaqtinmi sinchi mana kasukuq kankichis? ¿Aswan muchuchinatachu munankichis? Umaykichispas lliwmi k'irisqa, cuerpoykichispas lliwmi nanasqa. 6 Umamanta chakikaman mana qhalichu kashan, aswanpas lliwmi k'irisqa, punkillisqa, lliq-nisqa kashan. Manan pipas hampisunkichischu, manan wataykusunkichispaschu, manan nanayniykichistapas aceitewan llamp'uyaykachisunkichispaschu. 7 Suyuykichisqa purunyachisqan kapushan, llaqtaykichiskunapas ninawan kanaykusqan kapushan. Wak llaqta runakunan qhawashaqtiykichis chakra llank'asqaykichista hoqaripushan, paykunan lliwta ch'usaqyachipushan. 8 Sión llaqtallañan qhepapun, uvas chakrapi kashaq ch'uklla hina, pepino chakrapi ch'uklla hina, awqakunaq muyuykusqan llaqta hina. 9 Tukuy-atiyniyoq Señor Dioschus mana pisillatapas puchuchiwasunman karqan chayqa, Sodoma llaqta Gomorra llaqta hinan kashasunman karqan. 10 Sodoma umallikuna, Señor Diospa siminta uyariychis, Gomorra llaqta runakuna, Diosninchispa yachachikuyninta makilla uyariychis. 11 Señor Diosmi nin: Qankunaqa askha sacrificiokunatan haywawankichis, ¿Chayta munanaypaqchu yuyankichis? ¡Manan! Anejo ruphachisqa sacrificioykichiswanqa amisqañan kani, wirayachisqa animalkunaq wiranwanpas amisqañan kani, torillokunaq borregokunaq, cabrakunaq, yawarnintapas millakunin. 12 Ñoqaman asuykuq hamuwaspaykichismi yupaychana wasi patioykunata animalkunawan saruchinkichis, ichaqa, ¿pitaq chaykunata mañarqasunkichis? 13 Amaña apamuwaychischu mana serviq ofrendakunata. Incienso q'osñitapas manan munanichu. Mosoq killa fiestaykichispas, samana p'unchay huñukuyniykichispas, wak fiestaykichiskunapas millaymi, manan muchuyta atiniñachu. 14 Mosoq killa fiestaykichista hatun fiestaykichistapas cheqnikunin, chaykunaqa llasa q'epi hinan ñit'iykuwan, muchuspaypas sayk'upuniñan. 15 Makiykichista mast'arispa mañakuwaqtiykichispas manan qhawarimusqaykichischu, anchataña mañakuwaqtiykichispas, manan uyarisqaykichischu. Qankunaqa runa wañuchiqkunan kankichis, 16 chayrayku mayllikuychis, ch'uyanchakuychis. Mana chanin ruwayniykichiskunata ñawpaqeymanta wikch'uychis. ¡Amaña mana allinkunata ruwaychischu! 17 Allinkaq ruwayta yachaqaychis, chaninchay ruwayta munaychis, sarunchasqa runakunata yanapaykuychis, mana tayta-mamayoqpaq chaninchayta ruwaychis, viudata juzganapi yanapaychis, nispa. 18 Señor Diosqa nillantaqmi: Hamuychis, parlasunchis. Sansaq-puka hinaña huchaykichis kashan chaypas, rit'ita hinan yuraqyachisaq, sani-puka hinaña huchaykichis kashan chaypas, yuraq millmata hinan yuraqyachisaq. 19 Uyariwaspa kasukunkichis chayqa, hallp'aq allinnin poqochisqan rurukunatan mikhunkichis, 20 mana kasukuq k'ullullapuni kankichis chaymi ichaqa, awqa-tinkuypi hukpaqkama wañuchisqa kankichis. Ñoqa Señor Diosmi chayta nini, nispa. 21 ¿Imaynataq hunt'aq llaqta kashaspayki, rabona warmiman hina tukupunki? Ñawpaqqa llapa runaykikunan chanin-kayman hinapuni kawsarqanku, cheqaqkaqtataq ruwarqankupas, kunantaq ichaqa runa wañuchiqkunallaña kapushanku. 22 Qolqeykipas qhoqasqa fierro hinan kapun, vinoykipas unuwan chhaqrusqan kapun. 23 Kamachikuqniykikunapas mana kasukuqmi kanku, suwakunawan wakiqmasintinmi kanku, llapallankun lluk'iykusqa chaskiytaqa imata hinaraq munashanku, sumaq sonqo qoykunatataqmi munankupas. Mana tayta-mamayoqkunapaqpas manan chaninchayta ruwankuchu, viudaq uyarichikusqantapas manallataqmi kasurparinkuchu. 24 Chaymi Tukuy-atiyniyoq Señor Diosqa, Israelpa Munayniyoq Diosninqa nin: ¡Chaykamalla! Ñoqa contra sayariqkunataqa muchuchisaqmi, awqaykunamanqa aynita kutichisaqmi. 25 Qan contran sayarisaq, hinaspa qhoqayasqa fierrota ch'uyanchanku chay hinatan ch'uyanchasqayki, tukuy qhelli kayniykimantan pichasqayki. 26 Ñawpaqkaq juezkuna hina juezkunatan qankunapaq churasaq, yuyaychaqniykikunapas qallariypi hinan kanqa. Chaykuna qhepatataq sutichasunkiku: Chanin Llaqta, Hunt'aq Llaqta, nispanku. 27 Ñoqan chaninchay ruwaq kani, chaymi Sión llaqtata qespichisaq, ñoqan kuskachaqqa kani, chaymi Jerusalenpi tiyaqkunata ñoqaman kutirikamuwaqtinku qespichisaq. 28 Mana kasukuq k'ullukunata, huchasapakunatan ichaqa, ñut'utaraq ruwasaq, saqerpariwaqniykunapas wañunqakun. 29 Encina sach'akunata yupaychasqaykichismantan p'enqakunkichis, ídolo yupaychanapaq akllakusqaykichis huerta hawan p'enqachisqa kankichis. 30 Encina sach'aq urmaq raphin hinan kankichis, mana unuyoq huerta hinan kankichis. 31 Allin kallpasapa qharipas mullpha ichhu hinan kapunqa, ruwasqankunapas phinchikillamanmi tukunqa, hinaspan kuska ruphapunqa, manataq pipas thasnuq kanqachu, nispa.
Prev
Play
Next
Volume
Speed
0.7511.251.52