18 1 Llapan Leví aylluntin sacerdotekunaqa, manan wakin Israel runakuna hinachu hallp'ata chaskinqaku, aswanpas Señor Diosman haywankichis chay sacrificiokunawanmi ofrendakunawanmi kawsanqaku. 2 Manan llaqtamasinku hinachu hallp'ata chaskinqaku, Señor Diosmi paykunaq herencianqa, Señor Diospa nisqanman hina. 3 Qankuna torotapas borregotapas sacrificiota haywaspaqa, sacerdotekunamanmi qonkichis qharminta, qhaqllinta, qheqentawan. 4 Hinallataq trigomanta vinomanta aceitemantawan ñawinninta, ovejaykichis ñawpaq rutusqaykichis millmatawan qonkichis. 5 Diosniykichis Señor Diosmi llapa aylluykichismanta Leví aylluta akllakurqan paypas mirayninpas Señor Diospa sacerdoten kaspa tukuy tiempo servishanallankupaq. 6 Israel suyupi mayqen llaqtamantapas, mayqen Leví runapas, Diosniykichis Señor Diospa akllakusqan cheqasman riyta munanqa chayqa, rillanqan. 7 Chayaspataq Señor Diospa sutinpi servinqa, imaynan wakin Leví llaqtamasin Señor Diosta servishanku hinata. 8 Chaymi paypas wakin Leví llaqtamasinkuna hina may chhikatachus mikhunata chaskinqaku, chay chhikallatataq chaskinqa. Familianmanta herencia chaskisqanqa sapaqmi kanqa. 9 Diosniykichis Señor Dios qosunkichis chay hallp'aman haykuspaykichisqa, aman chay llaqta runakunaq millay mana chanin ruwaynintaqa ruwankichischu. 10 Aman qankuna ukhupiqa mayqenpas churiykichista ususiykichista ruphachina sacrificiota hina haywankichischu. Amallataq watuqpas, suerte qhawaqpas, ch'askata qhawaqpas, layqapas, 11 mana allin espiritukunata rimachiqpas, wañuqpa alman rimachiqpas qankuna ukhupiqa kanqachu. 12 Chay hina ruwaqkunataqa sinchitan Señor Diosqa cheqnikun, chay hawan chay suyu runakunatapas qayllaykichismanta wikch'unqa. 13 Tukuypipas chanintapunin Diospa ñawpaqenpi kawsankichis. 14 Hap'ikapunkichis chay suyu runakunaqa layqakunatan watuqkunatan kasunku, qankunataqa Diosniykichis Señor Diosmi chay hina ruwanaykichista hark'asunkichis. 15 Diosniykichis Señor Diosmi qankuna ukhumanta ñoqa hina huk profetata sayarichinqa, qankunataq payta kasunkichis. 16 Chaytapunin qankunaqa Horeb orqo k'uchupi huñuykusqa kashaspa mañakurqankichis: Diosninchis Señor Diospa kunkantaqa manan huktawan uyarisunmanchu, manataq kay hatun nina rawraytapas rikusunmanchu, mana chayqa wañusunmi, nispa. 17 Chaymi Señor Diosqa niwarqan: Allinmi rimasqanku. 18 Ñoqan llaqta-masiykikuna ukhumanta qan hina huk profetata sayarichisaq. Ñoqan payta rimaykusaq, paytaq runakunaman tukuy kamachisqay simikunata willanqa. 19 Kamachisqay simiykunata chay profeta rimaykushaqtin, pipas mana kasuqtaqa ñoqa kikiymi huchachasaq. 20 Ichaqa huk profeta sutiypi rimanqa mana ñoqa kamachishaqtiy chayqa, wañuchinkichismi, hinallataq wak dioskunaq sutinpi rimaq profetakunatapas wañuchinkichis, nispa. 21 Ichapaschá yuyaykuwaqchis: ¿Imaynapitaq yachaykuman mana Señor Diospa siminkunatachu rimasqantari? nispa. 22 Huk profeta: Señor Diospa simintan rimashani, ninqa, manataq rimasqan hunt'akunqachu chayqa, manan Señor Diospa siminchu, aswanpas chay profetaqa hatunchakuyta munaspan yuyaykusqallanta riman. Amataq payta manchakuychischu.
Prev
Play
Next
Volume
Speed
0.7511.251.52