1 1 Ahabpa wañukapusqan qhepatataq Moab suyu runakunaqa kacharisqa-kayta munaspa Israel contra sayarirqan. 2 Ocoziasqa Samariapi kaq wasinpi altos wasi ventanamanta urmaykuspan sinchita k'irikurqan. Chaymi runakunata kacharqan: –Riychis, Ecronpa diosnin Baal-zebubta tapukamuychis kay k'iriymanta qhaliyasaqchus manachus chayta, nispa. 3 Señor Diospa angelninmi ichaqa Tisbe llaqtayoq Eliasta nirqan: –Phaway Samaria reypa kachasqankunawan tupaq, hinaspa tapuykunki: ¿Manachu Israelpi Dios kan chaytaq Ecronpa diosnin Baal-zebubman tapukuq rinkichis? nispa. 4 Hinaspa ninki, wiraqochaykichis Ocoziastan Señor Diosqa nin: Manañan puñunaykimanta sayarinkiñachu, aswanpas wañunkipunin, nispa. Hinan Eliasqa rirqan. 5 Kachasqakunataq reyman kutipurqanku, hinan reyqa paykunata tapurqan: –¿Imanaqtintaq kutirqamunkichis? nispa. 6 Paykunataq kutichirqanku: –Huk qhariwanmi tupayku, hinan niwanku: “Kachamuqniykichis reyman kutiychis hinaspa nimuychis”, Señor Diosmi nin: ¿Manachu Israelpi Dios kan chaytaq Ecronpa diosnin Baal-zebubman qanri tapukuqta kachanki? Chaymi manaña puñunaykimanta sayarinkiñachu, aswanpas wañunkipunin, nispa, nispaykichis. 7 Hinan reyqa tapuykurqan: –¿Imaynataq kasqa tupaspa rimapayaqniykichis qhariqa? nispa. 8 Paykunataq kutichirqanku: –Chay qhariqa millma qarawan p'achasqa, qara chumpiwan chumpiykusqan kasqa, nispa. Hinan reyqa nirqan: –¡Chayqa Tisbe llaqtayoq Eliasmi! nispa. 9 Chaymi Eliasman kacharqan huk capitanta phisqa chunka soldadonkunatawan, hinan payqa wicharqan Eliaspa kasqan orqota. Eliastaq orqo puntapi tiyasharqan, hinan capitanqa nirqan: –Dios sonqo runa, qantan rey kamachisunki uraykamunaykipaq, nispa. 10 Eliastaq kutichirqan: –Dios sonqo runachus kani chayqa, hanaq pachamanta nina uraykamuchun, hinaspa qantapas phisqa chunka soldadoykikunatapas ruphachun, nispa. Kaq ratotaq hanaq pachamanta nina uraykamuspa phisqa chunka soldadokunantinta ruphaykurqan. 11 Reyqa Eliasman kachallarqantaq huk capitanta, phisqa chunka soldadonkunatawan, hinan payqa rispa nirqan: –Dios sonqo runa, qantan rey kamachisunki usqhaylla uraykamunaykipaq, nispa. 12 Eliastaq kutichirqan: –Dios sonqo runachus kani chayqa, hanaq pachamanta nina uraykamuchun, hinaspa qantapas phisqa chunka soldadoykikunatapas ruphachun, nispa. Kaq ratotaq hanaq pachamanta nina uraykamuspa phisqa chunka soldadokunantinta ruphaykurqan. 13 Reyqa kachallarqantaqmi kinsa kutipiña huk capitanta phisqa chunka soldadonkunatawan. Hinan chay capitanqa Eliaspa ñawpaqenpi qonqoriykukuspa, payta nirqan: –Dios sonqo runa, valekuykin khuyapayawanaykikuta, ñoqapas kay phisqa chunka kamachiykikunapas kawsanaykupaq. 14 Yachanin ñawpaqkaq hamuq iskay capitankunata phisqa chunka soldadokunantintakama hanaq pachamanta nina uraykamuspa ruphasqanta. Chay hinaqa, khuyapayaykuway kawsayniyta, nispa. 15 Hinaqtinmi Señor Diospa angelninqa Eliasta nirqan: –Ama manchakuychu, paywan uraykuy, nispa. Hinan Eliasqa paywan uraykurqan reyman qayllaykunanpaq. 16 Reytataq nirqan: –Señor Diosmi nin: Manapas Israelpi Dios kanmanchu hina Ecronpa diosnin Baal-zebubman tapuqta kachasqaykiraykun, manaña puñunaykimanta sayarinkichu, aswanpas wañunkipunin, nispa. 17 Hinan reyqa wañupurqan Señor Diospa Eliaswan willachisqanman hina. Ocoziaspaqa manan churin karqanchu, chaymi rantinpi wawqen Joram kamachikuyta qallarirqan, Josafatpa churin Joram iskay watata Judapi kamachikushaqtin. 18 Ocoziaspa wakin ruwasqanmanta willakuyqa Israel Reykunaq Willakuynin Qelqapi qelqasqan kashan.
Prev
Play
Next
Volume
Speed
0.7511.251.52