1 1 Kayqa Hilciaspa churin Jeremiaspa parlasqasnin. Benjamín ayllu suyupi Anatot llajtamanta. Payqa sacerdote ayllumanta karqa. 2 Tata Diosqa Jeremiasman parlarqa, Amonpa churin Josías chunka kinsayoj watastaña Judá naciompi kamachishajtin. 3 Chantá Jeremiasman parlallarqataj Josiaspa churin Joacim Judapi rey kashajtin, jinallataj Josiaspa ujnin churin Sedequías, chunka ujniyoj watas Judapi kamachishajtin, maypachachus Jerusalenpi tiyakojkuna llajtankumanta waj nacionman presos apasqa karqanku, chay phishqa kaj killapi. 4 Tata Diosqa noqaman parlawaspa, niwarqa: 5 Mamaykej wijsallampiraj kashajtiyki, ñapis qantaqa rejserqaykiña. Manaraj nacekushajtiyki, ñapis t'aqarqaykiña, nacionespa profetanku kanaykipaj, nispa. 6 Noqatajrí kuticherqani: Ay Señor Tata Dios, noqaqa waynallaraj kani, nitaj sumajta parlaytapis atinichu, nispa. 7 Chantá Tata Diosqa niwarqa: Ama niwaychu waynallaraj kasqaykita. Qanqa rinayki tiyan, maymanchus kachasqayki, chayman, imatachus kamachisusqaytataj willamunki. 8 Ama paykunamanta manchachikuychu, imaraykuchus Noqaqa qanwan kasaj waqaychanasuypaj. Noqa Tata Diosmin chayta nini, nispa nerqa Tata Diosta. 9 Chaypacha Tata Diosqa makinwan simiyta llankhaykuwaspa niwarqa: 10 Noqa simiykiman nisqasniyta churani. Kunanqa atiyta qoyki reinospi, nacionespi ima, sik'inaykipaj, thuñinaykipaj, phirinaykipaj, t'unanaykipajtaj, chantá watejmanta jatarichinaykipaj, plantanaykipaj ima. 11 Tata Diosqa noqaman parlaspa, nillawarqataj: Jeremías, imatataj rikunkiri? nispa. Noqataj kuticherqani: Uj almendro k'aspita rikuni, nispa. 12 Chantá Tata Dios niwarqa: Walej chay rikusqaykeqa. Jinaqa Noqa allinta qhawashani kay tukuy nisqasniy junt'akunampaj. 13 Tata Diosqa ujtawan nillawarqataj kay jinata: Imatataj rikunkiri? nispa. Noqataj kuticherqani: Uj t'impushaj mankata rikuni, wichay ladomanta jina tijrakushajtaña, nispa. 14 Chantá Tata Diosqa niwarqa: Wichay ladomantapacha ñak'areyqa jich'akamonqa kay naciompi tukuy tiyakojkunaj patankuman. 15 Noqa Tata Dios cheqamanta nini: Wichay ladomanta chay tukuy nacionesta wajyamusaj. Reyes jamonqanku, Jerusalenman yaykuna punkusnimpitaj kamachina tiyanasninkuta churanqanku, jinallataj jatuchaj perqasnin chaypi, chantá Judajpa tukuynin llajtasnimpipis. 16 Chay castigo kanantapuni kamachisaj, saqerpayawarqanku, chay juchasapaspa contrankupi. Paykunaqa inciensota q'oshñichispa, yupaycharqanku chay mana rejsisqa dioskunata, makinkuwan chay ruwakusqankuta. 17 Qantajrí mat'ita chumpiykukuspa, kallpachakuy. Rispa, willamuy imatachus kamacherqayki, chayta. Ama paykunamanta manchachikuychu; manachayqa Noqa kikiy paykunaj ñawpaqenkupi kharkatitichisqayki. 18 Kunan p'unchay Noqa qanta churayki may sinch'i jark'achasqa llajtata jina, fierromanta ruwasqa sayantata jina, broncemanta perqa ruwasqata jina, tukuy Judá naciompa contrampi sayaykunaykipaj. Jinallataj sayaykunki reyesnimpa, kurajkunampa, sacerdotesnimpa contrankupi, chaypi tukuy kajkunaj contrankupi ima. 19 Paykunaqa qanwan maqanakonqanku; jinapis mana atipasonqankuchu, imaraykuchus Noqaqa qanwan kasaj libranasuypaj. Noqa Tata Diosmin chayta nini.
Prev
Play
Next
Volume
Speed
0.7511.251.52