1 1 Kinsa chunka watapi, tawa kaj killampi phishqa kaj p'unchaynimpi, nacionninkumanta waj nacionman preso apasqa runaspa chawpinkupi kasharqani, Quebar nisqa mayu kantupi. Chaypacha cieloqa kicharikorqa, Diostataj mosqoypi jina rikorqani. 2 Rey Joaquinta presochaspa apasqankumanta phishqa wataña kashajtin, tawa kaj killamanta, phishqa kaj p'unchaynimpi, 3 noqa, Buzij churin sacerdote Ezequielman Tata Diosqa parlamuwarqa caldeospa jallp'ankupi, Quebar Mayu kantupi. Chantá Tata Diosqa makinwan llankhaykuwarqa. 4 Chaypacha rikorqani wichaynejmanta uj jatun muyoj wayrata jamushajta. Chantá uj jatun phuyumanta nina larway jina llojserqa, muyuynimpitaj sinch'i k'anchay karqa. Chay nina chawpipi uj llosq'ochasqa broncepis kanman jina lliphipisharqa. 5 Kikin chay chawpipitaj tawa kawsajkuna runaman rijch'akoj kasharqanku. 6 Sapa ujninku tawa uyasniyoj, tawa lijrasniyojtaj karqanku. 7 Cheqan chakisniyoj karqanku, chakisninkutaj torilloj chakisnin jina karqanku, sillusninkutaj lliphipisharqa llosq'ochasqa bronce jina. 8 Tawantin ladosninkupi lijrasninku urapi runa makisniyoj karqanku, uyasninkutaj tawantin ladosman qhawarisqa karqanku. 9 Lijrasninkoqa purajmanta tinkunasqa karqanku. Purispaqa, mana kutirejchu kanku, manachayqa cheqanta ñawpajllaman rej kanku. 10 Chay tawa kawsajkunaj uyasninkoqa sapa ujninkojta kay jina karqa: Ñawpajnimpi kajqa runa uya, paña ladopi kajqa león uya, lloq'empi kajtaj toro uya, qhepampi kajtaj anka uya. 11 Iskay lijrasninku pataman oqharisqa karqanku, chaykunataj puntapura tinkunasqa karqanku, iskaywantaj cuerponkuta qhataykorqanku. 12 Sapa uj cheqanta ñawpajman purej kanku mana qhepaman kutirispa, Diospa Espíritun maymanchá pusaj, chayman. 13 Chay kawsajkunaqa nina brasas k'ajarishajman rijch'akorqanku, chayrí k'anchanasman. Chantá ninaman rijch'akojqa risharqa, jamusharqataj paykunaj chawpinkupi. Ninaqa k'anchashaj karqa, nina chawpimantataj lliuj lliujkuna llojsisharqa. 14 Chay kawsajkunataj kayman jaqayman usqhay usqhayta correykachasharqanku lliuj lliujpis kankuman jina. 15 Qhawashallaspapunitaj, repararqani chay kawsajkunaj sapa ujpa ladompi pampapi uj rueda kashasqanta. 16 Tawantin ruedasqa kikin kikillan karqanku, topacio nisqa valorniyoj rumi jinataj lliphipisharqanku. Rijch'akullarqataj sapa uj ruedaj chawpimpi waj ruedapis kanman jina. 17 Purinankupaj, tawantin ladoman kutirej kanku mana tijrakuspa. 18 Chay tawa ruedaspa arosninkoqa jatuchaj mancharina jina karqanku, sapa arotaj ñawiswan tukuy muyuyninkupi junt'a karqa. 19 Chay kawsayniyojkuna purejtinkoqa, ruedaspis puririllarqankutaj paykunawan khuska. Paykuna pampamanta pataman oqharikojtinkutaj, ruedaspis oqharikullarqankutaj. 20 Chay kawsajkunata maymanchus Diospa Espíritun puririchej, chaynejllamantaj ruedaspis oqharikoj paykunawan khuska, imaraykuchus chay kawsayniyojkunaj kawsayninkoqa ruedaspipis kashallarqataj. 21 Kawsajkuna purejtinkoqa, ruedaspis puririllajtaj kanku. Paykuna sayapojtinku, ruedaspis sayallajtaj kanku. Chay kawsajkuna pampamanta pataman oqharikojtinkoqa, ruedaspis pataman oqharikullarqankutaj paykunaj qhepankuta, imaraykuchus chay kawsayniyojkunaj kawsayninkoqa ruedaspipis kashallarqataj. 22 Chay kawsajkunaj umasninku patapi lliphipej cristalmanta cielowan jina qhatasqa karqa. 23 Chay qhatasqaj urampi chay kawsajkunaj lijrasninkoqa cheqan aysarisqa karqanku, ujkunaqa ujkunawan tinkunasqa, chay iskaynin lijrasninkuwantaj sapa ujpis cuerponkuta qhatakorqanku. 24 Uyarerqanitaj purejtinku lijrasninkoj sonasqanta mayupi manchay ashkha yakuta jina, chayrí Tukuy Atiyniyoj Diospa qhaparisqanta jina, manachayrí ashkha soldadospa ch'ajwasqankuta jina. Sayaspataj, lijrasninkuta urayk'ucherqanku. 25 Sayaspa lijrasninkuta urayk'uchejtinku, chay cielo jina qhatasqa patamanta uj sonay uyarikorqa. 26 Chay qhatasqaj patampitaj uj kamachina tiyanata jina rikorqani, zafiro nisqa valorniyoj rumimanta ruwasqaman rijch'akojta, chay kamachina tiyanapitaj rikorqani uj runaman rijch'akojta tiyasqa kashajta. 27 Chay runaman rijch'akojpata ñañu wasanmanta pataman llosq'ochasqa bronceta jina rikorqani lliphipishajta, ninawan muyuykusqatataj. Ñañu wasanmanta uramantaj ninata jina rikorqani. K'anchaywan muyuykusqataj karqa. 28 Imaynatachus k'uychi phuyus chawpipi p'unchay paramojtin rikhurin, ajina lliphipirishaj muyuynimpi karqa. Chay jina karqa Tata Diospa jatun kaynimpa k'anchaynin mosqoypi jina rikusqayqa. Chay jinata rikuspa, pampakama k'umuykorqani, chaypitaj uj parlamojta uyarerqani.
Prev
Play
Next
Volume
Speed
0.7511.251.52