4 1 K’atek’uri’, ixloq’alaj taq achalaxik, ri ix ix nuki’kotemal, ri ix ix utojb’alil nuchak; chk’oji’ b’a’ ichuq’ab’ pa ri Ajawxel, ixloq’alaj taq achalaxik. 2 Sib’alaj kinta’ chrech ri Evodi’a e xoquje’ chrech ri Sintike, qas utz b’a’ uk’aslemaxik chkib’ana’ chkib’il kib’ pa ri Ajawxel. 3 Xoquje’, kinta chawech ri at at Sisigo, che qas at jun wachi’l, kinta’ chawech arech qas che’apatanij b’a’ ri ixoqib’ ri’, rumal rech che ri e’are’ ek’o wuk’ aretaq chi’ xinkoj nuchuq’ab’ che utoq’ob’isaxik uwach ri utzalaj tzij; jacha’ xkib’an ri Klemente e ri enik’aj chik che xechakun wuk’, che ri kib’i’ tz’ib’atalik pa ri uwujil ri k’aslemal. 4 Chixki’kot b’a’ ronojel taq q’ij pa ri Ajawxel, kinkamulij ub’ixik weri’ chiwech: chixki’kot b’a’. 5 Chketa’maj b’a’ chi nimalaj konojel winaq ri ch’uch’ujalaj inojib’al. Naqaj chik k’o wi ri Ajawxel. 6 Mamayow ik’u’x ruk’ ronojel jastaq uwach e aretaq chi’ k’o jun irajawaxik, chixch’aw b’a’ ruk’ ri Dyos, chita’ b’a’ chrech ri kiwaj e chixmaltyoxin chrech. 7 K’atek’uri’, ri nimalaj rutzil ri Dyos che are nim chuwach ronojel no’jib’al, are are’ ri’ ri kchajin na ri iwanima’ e ri ichomanik pa ri Kristo Jesus. 8 K’atek’uri’, e’achalaxik ronojel ri k’olik che qastzij, che qas nimalaj, che qas suk’il, che qas ch’ajch’oj, che qas kme’l anima’ e che ronojel ri utzil e ronojel nim uq’ijil, ronojel wa’ weri’ qas chik’ama’ b’a’. 9 Ronojel ri jastaq uwach che xiweta’maj, ri xik’amo, ri xito e ri xiwilo xas pa ri in, qas chib’ana’ b’a’. Xa jek’uri’ ri Dyos che rech ri nimalaj utzil qas kk’oji’ ri iwuk’ ri ix. 10 Sib’alaj xinki’kotik pa ri Ajawxel rumal rech che xinna’taj chiwech, qas xinichomaj, k’atek’ut xuwi man ixkowininaq ta che uk’utik chnuwach. 11 Man kinb’ij ta weri’, rumal rech che ri in xa in meb’a’, ri in xinweta’maj kink’asik pa ronojel ri kinriqitaj na wi. 12 Ri in weta’m kink’aslemanik ruk’ xuwi jub’iq’ e ruk’ k’i jastaq. Pa ronojel q’ij e pa ronojel k’olib’al, ri in xinweta’maj kinwa’ik e xinweta’maj kinriq wi’jal, xinweta’maj kink’asi’ ruk’ taq ri numeb’il e pa ri nuch’analik. 13 Ri in ronojel kinkowin chech pa Ri Jun, che are kya’ow ri nuchuq’ab’. 14 K’atek’ut, ri ix utz ri xib’ano che xiwuk’aj ri k’axk’ol xinriqo. 15 Ri ix iweta’m, ix ajfilipo: Aretaq chi’ xmajtaj ub’ixik ri utzalaj tzij, aretaq chi’ xinya kan ri Masedoni’a, man k’o ta jun komon tyox che xuya nik’aj pwaq chwech, xaq xuwi ri ix, 16 ri ix, aretaq chi’, ri in in k’o pa ri Tesalonika, kamul xitaq ub’i chwech ri jastaq che rajawaxik chwech. 17 Ri in, man xa ta kintzukuj we taq sipanik ri’; xane are kintzukuj ri utzil che kunimarisaj ri iwutzilal ri ix. 18 Kamik ri’, ri in k’o ronojel jastaq uwach wuk’ che ri rajawaxik chwech, e kto’taj na; xas kk’u’xnik ri k’o wuk’ chi aretaq chi’ ri Epafrodita xuya chwech ri toq’ob’isab’al iwach xitaq uloq chwech che utzalaj uxlab’al, jelikalij tab’al toq’ob’ che kuk’am ri Dyos e che sib’alaj utz chuwach. 19 E ri Dyos, kuya na ri’ chiwech, ronojel ri jastaq uwach che rajawaxik na chiwech, ruk’ nimalaj ujachanik e ruk’ nimalaj uq’inomal pa ri Kristo Jesus. 20 Ri q’ijil chrech ri Dyos, Qatatxel, chub’eq’ij chub’esaq! Amen. 21 Chiya’a’ jun rutzil kiwach ri etyoxlaj taq winaq pa ri Kristo Jesus. Ri e’achalaxik che ek’o wuk’ ri in kkiya’ apanoq jun rutzil iwach ri ix. 22 Konojel ri etyoxlaj taq winaq, kkiya’ apanoq jun rutzil iwach, are sib’alaj enab’e kkitaq apan jun rutzil iwach ri ejun ja winaq ek’o pa ri rachoch ri Sesar. 23 Ri usipanik ri Ajawxel Jesus Kristo kuxta b’a’ pa ri iwuxlab’al ri ix.
Prev
Play
Next
Volume
Speed
0.7511.251.52