1 1 Kisang tin to pasikngin epo a-Yesus Krais tin me mi khuuknginin tin ta a-Dewit men u a-Dewit men me mi khuuknginin tin ta Abraham men kut tumen wala pok ti: 2 Abraham khuuk sun Aisak, u Aisak ko khuuk a-Yakop, u a-Yakop ko khuuk a-Yuda hi po ehuro hi kut tumen; 3 ma a-Yuda ko khuuk sun a-Peres ngong a-Sara kha toni ngong e-Tamar men, ma a-Peres ko khuuk sun a-Hesron, u a-Hesron ko khuuk a-Ram kut tumen; 4 ma a-Ram khuuk sun a-Minadap, u a-Minadap ko khuuk a-Nason, u a-Nason ko khuuk a-Salmon kut tumen; 5 ma a-Salmon ko khuuk a-Boas, men tonin e-Rahap, khama a-Boas khuuk sun a-Obed, men tonin e-Rut, u a-Obed khuuk sun a-Yesi, 6 u a-Yesi ko khuuk sun a-Dewit tin sinkhaung ta hi Israel men kut tumen. Ma a-Dewit tin sinkhaung men ko khuuk sun a-Solomon, men kho ma tonin men ung ta a-Yuraia. 7 Ma a-Solomon ko khuuk sun a-Rehoboam, u a-Rehoboam ko khuuk sun Abia, u Abia ko khuuk sun Asa kut tumen; 8 ma Asa ko khuuk sun a-Yehosapat, u a-Yehosapat ko khuuk a-Yoram, u a-Yoram ko khuuk a-Usia, 9 u a-Usia ko khuuk sun a-Yotam, u a-Yotam ko khuuk sun Ahas, u Ahas ko khuuk sun a-Hesekaia kut tumen; 10 ma a-Hesekaia ko khuuk sun a-Manasa, u a-Manasa ko khuuk sun Amon, u Amon ko khuuk sun a-Yosaia kut tumen. 11 A-Yosaia men ko khuuk sun a-Yekonaia hi po ehuro hi minan tin po nolo me espo sun Israel li wo hi maik hi Babilon men. 12 Po Israel li ung wo mulusngin Babilon kho, anima a-Yekonaia ko khuuk sun a-Sealtiel, u a-Sealtiel ko khuuk a-Serubabel kut tumen; 13 ma a-Serubabel ko khuuk Abiut, u Abiut ko khuuk a-Eliakim, u a-Eliakim ko khuuk Asor kut tumen; 14 ma Asor ko khuuk sun a-Sadok, u a-Sadok ko khuuk Akim, u Akim ko khuuk a-Eliut kut tumen; 15 ma a-Eliut ko khuuk sun a-Eleasa u a-Eleasa ko khuuk a-Matan, u a-Matan ko khuuk a-Yakop kut tumen. 16 A-Yakop men ko khuuk a-Yosep, men titien e-Maria tin ko khuuk a-Yesus ko, po sikian yan Mesaia men. 17 Tumen ma po mosop tin ung e khuuk wal hosingin epo Abraham ma me pol epo a-Dewit men men khuuknginin khum ta u mnal me nuk wo sun tumen (14); ma hosingin epo a-Dewit ma me pol minan tin po nolo me kan kan sun Israel ma po espo sun lik li Babilon men men khuuknginin khum ta u mnal me nuk wo sun kut tumen (14); ma hosingin epo po Israel tin li ung wo mulusngin Babilon men ma me pol epo Mesaia tin ko khuukngin men men khuuknginin khum ta u mnal me nuk wo sun maksin kut tumen (14). 18 Kut ma khuukngin tin ta a-Yesus tin Mesaia men men ko put plo nginan ti: men po soop tonin e-Maria to a-Yosep kho, ma wulong ku sup me klap wal kho som, men po pon ta wut tin kuman po sun hoin epo Emiun Auluungin men. 19 Si a-Yosep tin titien men, men wungin tan siik, ma yang min epo wut ku manngin wan to mara po masang to sun wala akomen, tumen ma yang taku mang ta wut li kaunngin engun. 20 Takuma yang in e maran ira wungin tin imen kut, ih, tihngin ta yang tin Akono men ta ko plo nginan ta sun mi enun yolngin ta, ma tihngin sakal taku, “Yosep, ngon tin khuuknginin ta a-Dewit men, e in aku e lem epo ngon tin ku wa e-Maria si ung tap men asin, epo po hoin tin wut kuman pon men men me epo Emiun Auluungin kha imen. 21 Ma wut ku khuuk Wirun, men ku e sik yang yan a-Yesus, epo yang men kuli palolo po masang to sun wala tin tan men epo lasin ta po.” 22 Kut ma wungin tin mosop imen si kut epon men ku wungin si enun ung hut tin yang tin Akono men pok put mi wo pokngin tin imen taku, 23 “Wom hul, wut wala wahin ta tin iso pong epo po masang men kuli iso kumaan, ma wut ku khuuk Wirun ta, men ku ko, po sikia yang yan ‘Imanuel,’” men sinsin ti, “Got in to it.” 24 Li klet ma a-Yosep phip si, men yang ira wungin tin tihngin ta yang tin Akono men wo ta yang epon men, ma yang wa titien me ung ta yang. 25 Ma yang ku nuk to wut som weh li pol minan tin wut khuuk Wirun tin muk men ko. Ma yang sikia sun yan a-Yesus.
Prev
Play
Next
Volume
Speed
0.7511.251.52