1 1 Lai grawng doeh ru Yesux Khrit, mawh kawn simex Davit, kawn simex Abraham. 2 Abraham mawh keeing Icak, Icak mawh keeing Yakop mai Yakop mawh keeing Yudax mai puxaik nawh khankix heue. 3 Yudax mawh keeing Pheret mai Zara, khaing moeng nawh Tama. Pheret mawh keeing Hezaron mai Hezaron mawh keeing Aram, 4 Aram mawh keeing Aminadap, Aminadap mawh keeing Nashon mai Nashon mawh keeing Salamon heue. 5 Salamon mawh keeing Bawzax pa pon khaing moeng nawh Rakhap mai Bawzax mawh keeing Obet, pa pon khaing moeng nawh Ruthax mai Obet mawh keeing Yessie, 6 Yessie mawh keeing simiang Davit. Davit mawh keeing Sawlamon ka bun pa hoik mawh moeng Uriyax phao ka heue. 7 Sawlamon mawh keeing Robom mai Robom mawh keeing Abiyax mai Abiyax mawh keeing Asapha heue. 8 Asapha mawh keeing Yehoshaphat, Yehoshaphat mawh keeing Yoram mai Yoram mawh keeing Oziyax heue. 9 Oziyax mawh keeing Yotham, Yotham mawh keeing Akhat mai Akhat mawh keeing Hezakiyax. 10 Hezakiyax mawh keeing Manashe, Manashe mawh keeing Amon mai Amon mawh keeing Yosiyax heue. 11 Yosiyax mawh keeing Yekhawniyax mai puxaik nawh khankix, yam mawh bawg yam giex laung ka kix ka veng Babulon heue. 12 Khaix hoik giex laung kix ka daux veng Babulon, Yekhawniyax mawh keeing Shalatilax mai Shalatilax mawh keeing Zerubabelax heue. 13 Zerubabelax mawh keeing Abyut, Abyut mawh keeing Eliakim mai Eliakim mawh keeing Azaw heue. 14 Azaw mawh keeing Sadut, Sadut mawh keeing Akhim mai Akhim mawh keeing Elut. 15 Elut mawh keeing Elazax, Elazax mawh keeing Mathan mai Mathan mawh keeing Yakop heue. 16 Yakop mawh keeing Yosiep pa mawh mex Marix, pa keh Yesux ka, pa kok mawh Khrit heue. 17 Mawh kheu in jah ka Abraham tom hoek ka Davit koe kao pon ju mai jah ka Davit tom hoek yam giex laung ka daux veng Babulon koe kao pon ju mai jah ka yam giex laung ka daux veng Babulon tom sidah hoek ka Cao Khrit koe kao pon ju heue. 18 Grawh grawng pa keh ka Yesux Khrit mawh nin heue. Yam hoik chawk miex Nawh, Marix mai Yosiep paox tix, ka ang kiex bax dex dawd mai paox tix, nawh koe kaux kheu Khuan Singax Singeh heue. 19 Mawh kheu mex nawh Yosiep, mawh pui rahsee mai ang rhawm kieh plakngai Marix laux, nawh keud sang briex ti tik ka nawh heue. 20 Yam keud nawh yuh nan, jhak heue, nawh yaox kawncau cie Siyiex lih bleeh ka nawh ka daux camaox ah nin, "Yosiep kawn Davit eue, paw lhat ti teei moeng maix Marix, kheu kaux pa koe daux nawh mawh kheu Khuan Singax Singeh heue. 21 Nawh tak keh kawn Simex mai maix tak kok ceu kaux Nawh mawh Yesux,mawh kheu Nawh tak sang taoh pui cie Nawh khaing phimap kix heue." 22 Ceu in khawmuik hoik mawh sonsang naog gumlox Simiang pa krai Cao jhai pa ah nin, 23 "Jhak heue, bunkrih tak koe kaux mai keh kawn Simex, mai kix tak kok ceu kaux Nawh mawh "Emanoelax.Phan toe dee bleeh Emanoelax, mawh Siyiex ot tau mai ex" heue. 24 Yam siduad Yosiep khaing it, nawh yuh awm hoik nhie kawn cau cie Siyiex nawh yuh mai teei moeng tix heue. 25 Viang mawh nan nawh ang dex mai Marix, ka ang nyang keh kawn Ai mai nawh kok ceu kaux nawh mawh Yesux heue.
Prev
Play
Next
Volume
Speed
0.7511.251.52