1 1 Okutonda obuzaale bwa Yesu Kristo, omwijukuru wa Daudi, omwijukuru wa Abburahamu. 2 Abburahamu akazaara, Isaaka, Isaaka yazaara Yakobbo, Yakobbo yazaara Yuda n'abagenzi be. 3 Yuda yazaara Perezi na Zeera, nyinabo nuwe Taamali; Perezi akazaara Hezirooni, Hezirooni yazaara Ramu. 4 Ramu akazaara Aminadabbu, Aminadabbu yazaara Nahasooni, Nahasooni yazaara Salumoni. 5 Salumoni akazaara Bowazi, nyina nuwe Rahabbu; Bowazi yazaara Obedi, nyina nuwe Lusi; Obedi yazaara Yese, 6 Yese yazaara Daudi Omukama. Daudi yazaara Solomoni hali ogu ow'akaba ali muka Uriya. 7 Solomoni akazaara Rehobbowamu, Rehobbowamu yazaara Abiya, Abiya yazaara Asa. 8 Asa yazaara Yehosafaati, Yehosafaati yazaara Yoramu, Yoramu akazaara Uziya. 9 Uziya yazaara Yotaamu, Yotaamu yazaara Ahazi, Ahazi yazaara Hezekiya, 10 Hezekiya yazaara Manaase, Manaase yazaara Amosi, Amosi yazaara Yosiya. 11 Yosiya akazaara Yekoniya n'abagenzi be, omu biro baanyagiirwemu okutwarwa Bbabbulooni. 12 Obu baamazire kutwarwa Bbabbulooni, Yekoniya akazaara Seyalityeri, Seyalityeri yazaara Zerubaabeli, 13 Zerubaabeli yazaara Abiyudi, Abiyudi yazaara Eliyakimu, Eliyakimu yazaara Azoori. 14 Azoori akazaara Zadoki, Zadoki yazaara Akimu, Akimu yazaara Eliyudi. 15 Eliyudi akazaara Eryeza, Eryeza yazaara Mataani, Mataani yazaara Yakobbo. 16 Yakobbo ogu nuwe yazaire Yosefu iba Mariya, nyina Yesu arukwetwa Kristo. 17 Nahabweki okuruga hali Abburahamu okuhika hali Daudi haroho bwijukuru ikumi na bbuna; okuruga hali Daudi okuhika ha kutwarwa Bbabbulooni naho haroho obwijukuru ikumi na bbuna; kandi okuruga ha kutwarwa Bbabbulooni okuhika ha kuzaarwa kwa Kristo, nabwo bwijukuru bundi ikumi na bbuna. 18 Eby'okuzaarwa kwa Yesu Kristo bikaba biti: Mariya nyina, obu akaba ajumbiirwe Yosefu, akazooka aina enda ya Mwoyo Ahikiriire. 19 Yosefu iba, habw'okusangwa ali musaija ahikiriire, atagonze kumuhemura omu bantu, baitu yacwamu kumuleka omu nsita. 20 Obu akaba naakyateekereza ebi, malaika wa Mukana yamubonekera omu kirooto naagamba ati: “Yosefu, mwijukuru wa Daudi, otatiina kugabura Mariya mukazi waawe, habwokuba atwaire enda habw'amaani ga Mwoyo Ahikiriire. 21 Alizaara omwana omwojo, olimuruka ibara lye Yesu, habwokuba nuwe alijuna abantu be ebibi byabu.” 22 Ebi byona bikabaho nukwo bihikirize MUKAMA ebi yagambiire omu kanwa k'omurangi ati: 23 “Omwisiki empikirre alitwara enda, azaale omwana omwojo, kandi alyetwa ibara Emanueli.” (Amakuru gaalyo: Ruhanga ali na itwe.) 24 Yosefu obu yasisiimukire, yakora malaika wa MUKAMA eki yamugambiire, yagabura Mariya; 25 kandi atamumanye atakazaire omwana omwojo. Yosefu yamuruka ibara lye Yesu.
Prev
Play
Next
Volume
Speed
0.7511.251.52