1 1 Yesus Kristus beiyimek nang yila', Abraham bek ab uboka, Daud dubnya bek ab uboka, ulumek nang si ara ban. Anasa Abraham bek aba' ara, Daud be ulumok salek enyek uboka Yesus beibek nimi yila' era ban: 2 Abraham bedya me nera Ishak, Ishak bedya me nera Yakub, Yakub bedya me nera Yehuda beb alja' hem yab eb, 3 Yehuda bedya mab era Peres beb Zerah beb (sikja' genong gera Tamar ge ulumok), dara Peres bedya me nera Hezron be ulumok, alja me nera Ram, 4 Ram bedya me nera Aminadab, Aminadab bedya me nera Nahason, Nahason bedya me nera Salmon, 5 Salmon bedya me nera Boas (Boas eiling gera Rahab), Boas bedya me nera Obed (Obed eiling gera Ruth), Obed bedya me nera Isai, 6 Isai bedya dara, Daud be dubnya beibuk. Wera ono' Daud bek aba' ara, Yehuda sokok nimi henga gouboka Babel heikek beil bisik salek ulumek nimi si dara, ban: Daud bedya me nera Salomo (alja genong gera men dara Uria bedya domok), 7 Salomo bedya me nera Rehabeam, Rehabeam bedya me nera Abia, Abia bedya me nera Asa, 8 Asa bedya me nera Yosafat, Yosafat bedya me nera Yoram, Yoram bedya me nera Uzia, 9 Uzia bedya me nera Yotam, Yotam bedya me nera Ahas, Ahas bedya me nera Hizkia, 10 Hizkia bedya me nera Manasye, Manasye bedya me nera Amon, Amon bedya me nera Yosia, 11 Yosia bedya me nera Yekhonya beb al kabo nang eb beibsuk. 12 Wera ono' Yehuda sokok nimi Babel heikek henga gouboka bobogeisik salek eba' ara, Yesus beibeka' wenyek nimi yila' era ban: Yekhonya bedya me nera Sealtiel, Sealtiel bedya me nera Zerubabel, 13 Zerubabel bedya me nera Abihud, Abihud bedya me nera Elyakim, Elyakim bedya me nera Azur, 14 Azur bedya me nera Zadok, Zadok bedya me nera Akhim, Akhim bedya me nera Eliud, 15 Eliud bedya me nera Eleazar, Eleazar bedya me nera Matan, Matan bedya me nera Yakub, 16 Yakub bedya me nera Yusub. Dara, Yusub bedya gel gera Maria. Anya ban Maria gedya danyek, Yesus bera beibuk. Yesus bera ono' Kristus aboka si silimek. 17 Anasa wera Abraham bek ab uboka Daud bek hiboka likimek nang yila' era hiboka dara, meija dubuka' badya nimi yila' likemek. Dara ono' Daud bek ab uboka, Yehuda sokok nimi Babel heikek henga gouboka bo bisik salek era, nimi yila' denga meija' dubuka' badya likimek. Anya Yehuda sokok nimi Babel heikek bo bilisik salek eb uboka, Kristus sokok beibek salek era, ono' nimi yila' denga meija' dubuka' badya likek. 18 Yesus Kristus beibuka' ara ban unuwoka beibuk. Yesus alja genong gera Maria, dara Maria gera Yusub bedya moloblomok. Sikda anam dobdanggurek salek, Maria gera Geisinya adya me bobok. 19 Yusub bera Imik Neyung ak pelemoknya bek adya, alja moloblomok gel ge me boboka dara, Maria gera nimi hnoum laga lobnamna dara, alya dablyek senewoka, gelelinga lobnamna senewoka ganya lomok sunumok. 20 Yusub bera wen senewoka anam unu seinibgiga balamok salek, alda lendara mabok. Wera lendara pik uboka, Imik Neyung lero adya alak, "Anda Yusub Daud nang yila'anya o, Maria gedya' mon lomok sam mamla me nera Imik Neyung Geisinya adya me bomla' anasa, dobdanarum ak lok ganya bonggom, mem. 21 Maria gera eimik nengma ak beibnamla. Ban me nenedya alja nimi sikja malya una' ak ab blebnesila' anasa, alja si Yesus ak aboka sibnelam," hyok. 22 Ban nidya' unuwoknya nera, Imik Neyung adya alja ununumna' len nang pik uboka lemoka' anyek gigiwolula' aboka nera uboka' ara, 23 "Nenya meka' dobnenggumeija' goubenya gel gedya me boboka beibnamla dara, me nenedya si nera Immanuel, aboka sibnemak." (Immanuel ara Ibrani yub bok, nunja yub edya dara, "Imik Neyung ara nub neika' ulumab," alamak.) 24 Wera Yusub bera alda maboka bukok dara, Imik Neyung lero adya alak lendar pik wenyamoknya nera nidya' gigiwoka unuwok. Dara Maria geb dobdarek. 25 Bok Maria gera Yesus anam beibnenggumok salek, Yusub bera Maria gek ara meka' boka' denewanggumok. Anya wera Maria gera bomok me nera beibuk dara, Yusub bedya me si ara Yesus aboka sibok.
Prev
Play
Next
Volume
Speed
0.7511.251.52