1 1 Luruungo lwe bakuuka ba Yesu Kristo, umwitsukhulu wa Daudi, umwitsukhulu wa Ibulayimu. Khukhwama khu Ibulayimu khukhwoola khu Daudi, luruungo nilwo luno. 2 Ibulayimu asaala Isaaka, Isaaka wasaala Yakobo, Yakobo wasaala Yuda ni babandaaye. 3 Yuda wasaala Perezi ni Zela mu mukhasi Tamali, Perezi wasaala Kezironi, Kezironi wasaala Ramu, 4 Ramu wasaala Aminadabu, Aminadabu wasaala Nahasoni, Nasoni wasaala Salumoni, 5 Salumoni wasaala Bowazi mu mukhasi Rakabu, Bowazi wasaala Obedi mu mukhasi Ruse, Obedi wasaala Yese, 6 ni Yese naye wasaala Daudi umuyinga. Daudi asaala Solomoni, mu mukhasi uwaba mukha Uriya. 7 Solomoni wasaala Rekobowamu, Rekobowamu wasaala Abiya, Abiya wasaala Asa, 8 Asa wasaala Yekosofati, Yekosofati wasaala Yolamu, Yolamu wasaala Uziya, 9 Uziya wasaala Yosamu, Yosamu wasaala Akazi, Akazi wasaala Kezekiya. 10 Kezekiya wasaala Manase, Manase wasaala Amoni, Amoni wasaala Yosiya. 11 Yosiya wasaala Yekoniya ni babandaaye mu bifukhu byeesi bawuyisibwa khuutsya i Babuloni. 12 Lwanyuma lwe khuwuyisibwa khuutsya i Babuloni, Yekoniya wasaala Seyaluteli, Seyaluteli wasaala Zerubabeli, 13 Zerubabeli wasaala Abiudi, Abiudi wasaala Eliyakimu, Eliyakimu wasaala Azoli, 14 Azoli wasaala Zadoki, Zadoki wasaala Akimu, Akimu wasaala Eliudi, 15 Eliudi wasaala Eliyazari, Eliyazari wasaala Matani, Matani wasaala Yakobo, 16 Yakobo wasaala Yosefu, uwaba umuseetsa wa Mariya, maayi wa Yesu, ulaangiwa Kristo. 17 Kiryo kimiboolo kyoosi khukhwama khu Ibulayimu khukhwoola khu Daudi, kili likhumi na kine. Ni khukhwama khu Daudi khukhwoola khu khuwuyisibwila i Babuloni, kimiboolo likhumi na kine. Ni khukhwama nga ni baawuyisibwila i Babuloni nakyo kimiboolo likhumi na kine, khukhwoola khu khusaalikha khwa Yesu Kristo. 18 Khusaalikha khwa Yesu Kristo khwaba musaambo yino: Maayi weewe Mariya n'aba nga ashikanikhisibwa ni Yosefu, nga bashiili khuyilana ta, anyoolekhana nga ali shisoombo sh'Omwoyo Umukhosefu. 19 Ne lwekhuba Yosefu umuseetsa weewe aba umusaani umukwalaafu, walekha khukana amuwambise kamaŋaanyu mu bandu ta, aryo kila ambaasa khumulekha mu shimoonyo. 20 Ne n'amala khukhwambaasa aryo, malayika w'Omukasya wamubonekhela mu marooro, nga amuloma ari, “Yosefu, umwana wa Daudi, ukharya khuyila Mariya nga umukyelema woowo ta, lwekhuba shisoombo sheesi ali nasho shili sh'Omwoyo Umukhosefu. 21 Alisaala umwana umusiinde, ni nawe ulimutwiikha lisiina uri Yesu, lwekhuba niye uliwonesa babandu beewe khukhwama mu byonako byaawe.” 22 Bino byoosi byabawo khukhwoolelesa bibyalomewa n'Umukasya mu muŋoosi biri; 23 “Bona umukhaana ukhaamanya umuseetsa aliba shisoombo asaale umwana umusiinde, balimutwiikha lisiina bari Emanueli”, lilimanyisa liri, Wele ali ni nafwe. 24 Yosefu n'asisimukha mwiilo, wakhola sheesi malayika w'Omukasya amuloma, wayila Mariya ingo nga umukyelema weewe. 25 Ne niye s'etubaasakho ni naye ta khukhwoolesa n'asaala umwana weewe umusiinde, ni Yosefu wamutwiikha lisiina Yesu.
Prev
Play
Next
Volume
Speed
0.7511.251.52