1 1 Je̱ Jesucristo je̱ jyu̱jpit jayu, je̱'e̱ tse'e je̱ Abraham, je̱'e̱ tse'e je̱ David. Jidu̱'u̱m tse'e ñaske̱'xidi: 2 je̱ Abraham tse'e je̱ myajntk je̱ Isaac; je̱ Isaac tse'e je̱ myajntk je̱ Jacob; je̱ Jacob tse'e je̱ myajntk je̱ Judá je̱ts je̱ y'uts je̱ y'ajch; 3 je̱ Judá je̱ts je̱ ta̱'a̱xta̱jk Tamar, je̱'e̱ tse'e je̱ myajntkta je̱ Fares je̱ts je̱ Zara; je̱ Fares tse'e je̱ myajntk je̱ Esrom; je̱ Esrom tse'e je̱ myajntk je̱ Aram; 4 je̱ Aram tse'e je̱ myajntk je̱ Aminadab; je̱ Aminadab tse'e je̱ myajntk je̱ Naasón; je̱ Naasón tse'e je̱ myajntk je̱ Salmón; 5 je̱ Salmón je̱ts je̱ ta̱'a̱xta̱jk Rahab, je̱'e̱ tse'e je̱ myajntk je̱ Booz; je̱ Booz tse'e je̱ myajntk je̱ Obed; je̱ Obed tse'e je̱ myajntk je̱ Isaí; 6 je̱ Isaí tse'e je̱ myajntk je̱ yakkutojkpa David; je̱ yakkutojkpa David je̱ts je̱ ta̱'a̱xta̱jk juu' ve'e ijt je̱ jamya'aju Urías je̱ ñu̱da̱'a̱x, je̱'e̱ tse'e je̱ myajntk je̱ Salomón. 7 Je̱ Salomón tse'e je̱ myajntk je̱ Roboam; je̱ Roboam tse'e je̱ myajntk je̱ Abías; je̱ Abías tse'e je̱ myajntk je̱ Asa; 8 je̱ Asa tse'e je̱ myajntk je̱ Josafat; je̱ Josafat tse'e je̱ myajntk je̱ Joram; je̱ Joram tse'e je̱ myajntk je̱ Uzías; 9 je̱ Uzías tse'e je̱ myajntk je̱ Jotam; je̱ Jotam tse'e je̱ myajntk je̱ Acaz; je̱ Acaz tse'e je̱ myajntk je̱ Ezequías; 10 je̱ Ezequías tse'e je̱ myajntk je̱ Manasés; je̱ Manasés tse'e je̱ myajntk je̱ Amón; je̱ Amón tse'e je̱ myajntk je̱ Josías; 11 je̱ Josías tse'e je̱ myajntk je̱ Jeconías je̱ts je̱ y'utsa̱ta̱jk, van'it ku ve'e je̱ israeejlit jayu ake̱e̱'y yakvo̱o̱vdi je̱m babilóniait y'it jo̱o̱tm. 12 Tá̱vani tse'e je̱ israeejlit jayu ake̱e̱'y yakvo̱vda vye'na, je̱tse'e jyaa'knañaske̱'xijidi: je̱ Jeconías tse'e je̱ myajntk je̱ Salatiel; je̱ Salatiel tse'e je̱ myajntk je̱ Zorobabel; 13 je̱ Zorobabel tse'e je̱ myajntk je̱ Abiud; je̱ Abiud tse'e je̱ myajntk je̱ Eliaquim; je̱ Eliaquim tse'e je̱ myajntk je̱ Azor; 14 je̱ Azor tse'e je̱ myajntk je̱ Sadoc; je̱ Sadoc tse'e je̱ myajntk je̱ Aquim; je̱ Aquim tse'e je̱ myajntk je̱ Eliud; 15 je̱ Eliud tse'e je̱ myajntk je̱ Eleazar; je̱ Eleazar tse'e je̱ myajntk je̱ Matán; je̱ Matán tse'e je̱ myajntk je̱ Jacob; 16 je̱ Jacob tse'e je̱ myajntk je̱ José, je̱ María je̱ ñu̱yaa'y. Je̱ María tse'e je̱ Jesús je̱ tyaak. Je̱ Jesús tse'e je̱ Cristo, juu' ve'e je̱ Nte'yam vyinko̱o̱n je̱tse'e yakkutojknit. 17 Ax makmajkts naske̱'e̱xats je̱'e̱ ve'e vye'na ku ve'e je̱ Abraham ku̱jx yakmacho̱va̱tsa̱a̱'n je̱ts je̱ David ku̱jx paat; makmajkts naske̱'e̱xavats je̱'e̱ ve'e ku ve'e je̱ David ku̱jx yakmacho̱va̱tsa̱a̱'n je̱ts van'it ku̱jx paat ku ve'e je̱ israeejlit jayu ake̱e̱'y yakvo̱o̱vdi je̱m Babilonia; makmajkts naske̱'e̱xavats je̱'e̱ ve'e ku ve'e van'it ku̱jx yakmacho̱va̱tsa̱a̱'n je̱ts van'it ku̱jx paat ku ve'e je̱ Cristo kye'x. 18 Jidu̱'u̱m tse'e je̱ Jesucristo kye'x. To'k xa ve'e je̱ jayu y'ijt juu' ve'e José du̱xa̱a̱j. Pú̱kani tse'e du̱jayep vye'na to'k je̱ kiixa̱ta̱'a̱x juu' ve'e María du̱xa̱a̱j, je̱'e̱ juu' ve'e u̱x'o̱o̱k je̱ Jesucristo tyaaki. Ka̱k'apu̱kna ve'e cha̱a̱nada vye'na, van'it tse'e je̱ Espíritu Santo je̱ Nte'yam je̱ mya̱kkin ka̱jx du̱yaktaajñ je̱ María ónu̱k ma̱a̱t. 19 Ax je̱ José, tu̱vts je̱'e̱ ve'e je̱ jyáyuvin je̱ jyoojntykin y'ijt. Ku ve'e du̱'ix je̱ts ónu̱k ma̱a̱tani ve'e je̱ María, ax ka'a tse'e du̱'uktso̱jkni je̱tse'e du̱ma̱a̱ttsa̱a̱nat, ni ka'a tse'e du̱tso̱jkpa je̱tse'e ku̱du̱yaktso̱'o̱tyuujn, je̱'e̱ ka̱jx tse'e du̱'ukvinmaajy je̱ts ayu'utsji ve'e ku̱du̱maso̱o̱kni. 20 Namvaate'e je̱ José ve'em du̱vinmay, van'it tse'e to'k je̱ Ma̱ja̱ Vintsá̱n je̱ y'aangeles yak'ixji je̱ kuma'aj ka̱jx juu' ve'e jidu̱'u̱m na̱'mu̱xju: ―José, je̱ David je̱ chaan je̱ kyo̱o̱j, kadi mtsa̱'a̱ga je̱tse'e je̱ María xma̱a̱ttsa̱a̱nat, ku̱x je̱ Nte'yam je̱ kyutojku̱n ka̱jxe'e je̱ Espíritu Santo yaktaajnji ónu̱k ma̱a̱t. 21 Yakke̱'e̱xupe'e to'k je̱ pi'k mix ónu̱k, Jesuusts je̱'e̱ ve'e mtukxa̱a̱jap ku̱x je̱'e̱ ve'e du̱tuknu̱vaatsnup je̱ jyayu je̱ tyó̱kinda. 22 Je̱'e̱ ka̱jx tse'e ve'em jyajty je̱tse'e tyoojnji je̱ Ma̱ja̱ Vintsá̱n je̱ y'ayook, ve'em ax jo'n vyaajñ to'k juu' ve'e ijt je̱ Nte'yam je̱ y'ayook ko̱jtsnajxpa. Jidu̱'u̱m tse'e vyaajñ: 23 Onu̱k ma̱a̱t tse'e tyánu̱t to'k je̱ kiixa̱ta̱'a̱x, je̱'e̱ tse'e to'k je̱ pi'k mix ónu̱k du̱yakke̱'e̱xup. Emanuel tse'e yaktukxa̱a̱jap. (Jidu̱'u̱mts je̱'e̱ ve'e je̱ Emanuel kya̱tsa̱pítsum, u̱u̱'m ma̱a̱tta ve'e je̱ Nte'yam.) 24 Ku ve'e je̱ José jyo̱tvij, ve'em tse'e du̱tuujn ax jo'n je̱ Ma̱ja̱ Vintsá̱n je̱ y'aangeles ña̱'mu̱xji, mya̱a̱ttsu̱u̱ni'ukvaan tse'e je̱ María; 25 ax ka'a tse'e ti ka̱ts du̱tukma̱a̱tjayejp van'it paat ku ve'e je̱ pi'k mix ónu̱k du̱yakke'x, Jesuusts je̱'e̱ ve'e tyukxa̱a̱jidu.
Prev
Play
Next
Volume
Speed
0.7511.251.52