[Bible] MATEU 1

S-tadeꞌe Jesús

(Lc 3.23-38)

1 Jaꞌa yodotuni ndidaa xayii Jesucristu, ia kúu xayii David xiꞌin xayii Abraham.

2 Abraham kúu s-tata Isaac, Isaac s-tata Jacob, Jacob s-tata Judá xiꞌin ndidaa xani tsa. 3 Judá kúu s-tata Fares xiꞌin Zeraj nduu nu yaꞌa kaku Tamar, Fares s-tata Esrom, Esrom s-tata Aram. 4 Aram s-tata Aminadab, Aminadab s-tata Naasón, Naasón s-tata Salmón. 5 Salmón xiꞌin Rahab kúu s-tadeꞌe Booz, Booz xiꞌin Rut kúu s-tadeꞌe Obed, Obed s-tata Isaí. 6 Isaí s-tata rey David, san rey David kúu s-tata Salomón san j-nana tsa kúu ña kúu d̶eꞌe Urías.

7 Salomón s-tata Roboam, Roboam s-tata Abías, Abías s-tata Asa. 8 Asa s-tata Josafat, Josafat s-tata Joram, Joram s-tata Uzías. 9 Uzías s-tata Jotam, Jotam s-tata Acaz, Acaz s-tata Ezequías. 10 Ezequías kúu s-tata Manasés, Manasés s-tata Amón, Amón s-tata Josías. 11 Josías s-tata Jeconías xiꞌin ndidaa xanii tsa, kuenta ntsaka ñaꞌan xi ndidaa ñayii kuu ñuu Israel kuan sáꞌan Babilonia. †

12 Kuenta ío tsa Babilonia, Jeconías kúu s-tata Salatiel, Salatiel s-tata Zorobabel. 13 Zorobabel s-tata Abiud, Abiud s-tata Eliaquim, Eliaquim s-tata Azor. 14 Azor s-tata Sadoc, Sadoc s-tata Aquim, Aquim s-tata Eliud. 15 Eliud s-tata Eleazar, Eleazar s-tata Matán, Matán s-tata Jacob; 16 Jacob kúu s-tata José, xee María, ña káku ñaꞌan xi Jesús ia kuu Cristu.

17 San uxi kumi generación yaꞌia ntsa kuenta ío Abraham xiꞌin ntsa kuenta ío David; san uxi kumi ka tuku generación, ntsa kuenta io David xiꞌin ntsa kuenta saa ndidaa ñayii Israel Babilonia; san uxi kumi ka tuku generación, ntsa kuenta ío ndidaa ñayii Israel Babilonia xiꞌin ntsa káku Jesús ia kuu Mesías.

Duꞌua kída sa káku Jesucristu

(Lc 2.1-7)

18 Sa káku Jesucristu duꞌua kída: María j-nana Jesucristu sa io sa tandaꞌa ña xiꞌin José, † doko vita ñaꞌan ka koo tsa nduu tsa, san sa saꞌa Espíritu Santu ñoꞌon ña daꞌa. 19 José tsa ku kuu xee ña, kuu tsa en ñayii guaꞌa, san ti nchu kadavaa ñaꞌan tsa xan, san sani-ini tsa sa dandoo ñaꞌan yuꞌu tsa xan. 20 Neni sani-ini tsa jaꞌa, san en x-ángel Ndios nanuu en viaꞌna san sadaa s-tsa:

—José, d̶aꞌa David, ma yuꞌu yo san ma kani-ini yo andu d̶aꞌa xi kuu daꞌyiki ñoꞌon d̶eꞌe yo María, kuan sa saꞌa Espíritu Santu ñoꞌon nu daꞌa. ※21 San koo en d̶aꞌayee yiki nu; san danani ñaꞌan yo Jesús xi ia, † kuan nuyaꞌa kada nu sa nakoo Ndios sa kaꞌnu-ini sa saꞌa x-kuachi ñayii kuu xaꞌan ia. †

22 Ndidaa jaꞌa táꞌan ndasa na xino táꞌan sa káꞌan Ndios kuenta kachi profeta tsandaꞌa ia:

23 Vita san nudeꞌe ii koꞌon nu daꞌa san koo en d̶aꞌayee yiki nu,

san danani ñaꞌan Emanuel jnu, †

sa nchukachi: Ndios io ia xiꞌin ndo ndidaa ndo.

24 Kuenta ndikuu xanaa José, kída tsa kuenta táꞌvichiion x-ángel Ndios, san tandaꞌa tsa nduu tsa María. 25 Doko ti teñaꞌan tsa xan ntsa káku ña daꞌyiki diꞌna nuu, san danani ñaꞌan tsa JESÚS xi ia. †

†1.11 2R 24.14-15; 2Cr 36.10; Jer 27.20 †1.18 Lc 1.27 ※1.20 Jesús sa nchu kachi,ia kida sa nanitaꞌvi. †1.21 Lc 1.31 †1.21 Sal 130.8 †1.23 Is 7.14 †1.25 Lc 2.21

Apasco-Apoala Mixtec 2016 Edition

MATEU 1