1 1 Iyan heini kes guǥud te kepuun ni Jesu Kristu. Kevuwazan si Jesu Kristu ni Hadì David dengan. Ne si David, kevuwazan ni Abraham. 2 Ne si Abraham, amey ni Isaak, ne si Isaak, amey sikandin ni Hakub. Ne si Hakub, anak din si Huda wey is menge suled din. 3 Ne si Huda, iyan esawa zin si Tamar, ne iyan menge anak dan si Piris wey si Sara. Ne si Piris, amey ni Isrum, ne si Isrum, amey ni Aram, 4 ne si Aram, amey ni Eminadab, ne si Eminadab, amey ni Nasun. Ne si Nasun, amey ni Salmun, 5 ne si Salmun, iyan esawa zin si Rahab, ne iyan anak dan si Buus. Ne si Buus, ne amey ni Ubid. Ne iyan iney ni Ubid si Rut. Ne si Ubid, amey ni Isai. 6 Ne si Isai, ne amey ni Hadì David. Ne si David, amey ni Sulumun (iyan iney ni Sulumun kes esawa zengan ni Uriya). 7 Ne si Sulumun, amey ni Rubuam, ne si Rubuam, amey ni Abyas. Ne si Abyas, amey ni Asa. 8 Ne si Asa, amey ni Husepat. Ne si Husepat, amey ni Huram, ne si Huram, amey ni Usyas, 9 ne si Usyas, amey ni Hutam. Ne si Hutam, ne amey ni Akas. Ne si Akas, amey ni Isikyas. 10 Ne si Isikyas, ne amey ni Menasis. Ne si Menasis, ne amey ni Amun. Ne si Amun, iyan amey ni Husyas; 11 ne si Husyas, iyan anak din si Hikunyas wey is menge suled din. Iyan haazà timpu he mid-uwit te menge tigBebilunya is menge tig-Israyil pehendiyà te Bebilunya. 12 Ne hein mid-uwit en is menge tig-Israyil ziyà te Bebilunya nevuwad si Hikunyas ne iyan anak din si Selatyil. Ne amey si Selatyil ni Surubebil. 13 Ne si Surubebil, amey ni Abyud, ne si Abyud, ne amey ni Iliyakim. Ne si Iliyakim, amey ni Asur. 14 Ne si Asur, amey sikandin ni Saduk. Ne si Saduk, amey ni Akim. Ne si Akim, amey ni Ilyud, 15 ne si Ilyud, amey ni Iliasar. Ne si Iliasar, amey ni Matan, ne si Matan, iyan amey ni Hakub. 16 Ne si Hakub, iyan amey ni Jose he iyan esawa ni Maria. Ne si Maria, iyan iney ni Jesus he migeraran he Misiyas, he ke và dà egkeǥiya, kes mibpilì te Megbevayà he ibpahadì. 17 Sepulù wey heepat he lapis te kevuwazan ebpuun dà te kegkevuwad ni Abraham taman ki David. Ne ebpuun maan te kegkevuwad ni David taman te ked-uwita te menge tig-Israyil pehendiyà te Bebilunya, sepulù wey heepat daan he lapis. Ne puun dutun taman te ked-enaka ki Jesu Kristu, sepulù ded daan wey heepat he lapis. 18 Iyan heini ǥuǥud te keaǥi te ked-enaka ki Jesu Kristu. Nekeǥunan is iney zin si Maria te maama he egngezanan ki Jose. Iyan, te wazè dan pa meked-esawa, netuenan ni Maria he meǥingey sikandin pinaaǥi te ǥehem te Waǥas he Mulin-ulin. 19 Ne si Jose, kenà sikandin edsuwey te kesuǥuan he imbilinbilin ni Moises, ne tenged kayi, kenè din edleusen te ed-esawa si Maria, iyan, kenè din daan egkesuatan he meeled-eled si Maria, umba ed-isipen din he edhusayen dà heini te meeles. 20 Ne zutun te kemulu zin pa ed-isipa is iring kayi, mibpeteǥeinep kandin is belinsuǥuen te Nengazen. Ne ke sikandin te, "Sikew Jose, is kevuwazan ni Hadì David, kenè ka melenew he ebpengesawa ki Maria su meǥingey sikandin pinaaǥi te ǥehem te Waǥas he Mulin-ulin. 21 Maama is id-anak din ne ngezani nu ki Jesus, he ke và dà egkeǥiya, Menluluwas, su iyan sikandin edlibri te menge etew he edsunud kandin wey kenè en sikandan siluti tenged te menge salè dan." 22 Umba nehitavù heini is langun diyà te ki Maria wey si Jose su egketuman is migkaǥi zengan te Nengazen pinaaǥi te ebpeneuven din he migkaǥi te, 23 "Ebmeǥingey is raǥa ne id-anak din is maama, ne iyan ngazan te vatà si Imanwil," he ke và dà egkeǥiya, nekeamur is Megbevayà kenitew. 24 Ne zutun nepukew si Jose. Ne midtuman din haazà is sambag kandin te velinsuǥuen te Nengazen ne mid-esawa zin si Maria. 25 Iyan, wazè din si Maria uvayi taman te wazè pa mekeanak. Ne hein in-anak en haazà is batà, migngezanan ni Jose ki Jesus.
Prev
Play
Next
Volume
Speed
0.7511.251.52