1 1 'Injoine tope nu siopumae ni Yesuse Karisuse sanu jinanjia'omae nu Siopu ma iantaga'onye topotanggunge sala nu maanusia. Luulu monopea'e tope nu siopunyomae la'e babali 'Abarahame neapiapima'e nodua'e ponosia'anange i Daude. 'Injopa, la'e babali Daude, neapiapima'e nodua'e i Yesuse. Joojoo tope 'injoine, momatasa'e i Yesuse tututu la'e babali 'Abarahame ma teule tutuu la'e babali Daude, ponosia'anange 'ulenge luulumae, tuuturu'e sanu jinanjia'omae nu Siopu. 2 Luulu monopea'e tope nu unga langkai sotoo neapiapima'e la'e i 'Abarahame nodua'e ponosia'anange i Daude. Luulu tope ni 'Abarahame, 'injopa sotoo unganye, topenye i 'Isake. Sotoo unga ni 'Isake, i Yakube. Unga ni Yakube, i Yehuda ma tuainye. 3 'Antage unga ni Yehuda, dootoo unganye, i Perese ma i Sera. Siina nu unga 'injoo'e i Tamare. 'Injopa sotoo unga ni Perese, topenye i Hesone, ma sotoo unga ni Hesone, i Raame. 4 Sotoo unga ni Raame, i 'Aminadabe, ma sotoo unga ni 'Aminadabe, i Nahasone. 'Injopa sotoo unga ni Nahasone topenye i Samone, 5 ma sotoo unga ni Samone topenye i Boase. Siina ni Boase i Rahabe. I Boase sotooa unganye i 'Obede, ma siina ni 'Obede, i Ruute. Unga ni 'Obede, sotoo i 'Isai, 6 'injopa sotoo unga ni 'Isai, i Daude, sanu nebali ponosia'anange li babo'onyome ligaungu ompogangu too 'Isaraele. Unga ni Daude, sotoo topenye i Salomo. Siina ni Salomo, luulu silapi ni 'Uria. 7 Unga ni Salomo, sotoo i Reabeame. Unga ni Reabeame sotoo i 'Abia. Sotoo unga ni 'Abia, i 'Asa, 8 ma unga ni 'Asa, sotoo i Yosapate. Unga ni Yosapate, sotoo i Yorame. 'Injopa unga ni Yorame, sotoo i 'Usia. 9 I 'Usia, sotoo unganye i Yotame, ma sotoo unga ni Yotame, i 'Ahase. Unga ni 'Ahase, sotoo i Hisikia. 10 Unga ni Hisikia sotoo topenye Manase. I Manase, unganye sotoo i 'Amone, ma sotoo unga ni 'Amone, i Yosia. 11 'Injopa unga ni Yosia, i Yekonya ma kangkai tuainye. Joojoo 'injoo'e tope nu too siopumae ni Yesuse la'e ponosia'anange i Daude, neapiapima'e nodua'e uatunye kampungu too 'Isaraele sinolodangu too ma lijimo ampa'u 'inoni na'o pinebotuangu too nu Babele. 12 Mongomoe 'injoine tope nu siopumae ni Yesuse, la'e uatu siopunyomae pe'ipomoiai li Babele, nodua'e uatu peembu'a ni Yesuse. Unga ni Yekonya, sotoo i Seatiele, ma unga ni Seatiele sotoo i Serubabele. 13 'I Serubabele, sotoo unganye i 'Abihude. Sotoo unga ni 'Abihude topenye i 'Eliakime, ma i 'Eliakime sotoo unganye i 'Asore. 14 Sotoo unga ni 'Asore, topenye i Sadoke. 'Injopa unga ni Sadoke, sotoo topenye i 'Akime. Sotoo unga ni 'Akime, topenye i 'Eliude, 15 ma unga ni 'Eliude sotoo topenye i 'Eleasare. 'Injopa unga ni 'Eleasare, sotoo topenye i Matane, ma i Matane sotoo unganye i Yakube. 16 I Yakube, sotoo unganye i Yusupe, silapi ni Maria, ma i Maria nembu'aa'e i Yesuse sanu tinopea'e i Karisuse sanu jinanjia'omae nu Siopu, mai molapasa'e sala nu maanusia. 17 La'e i 'Abarahame, nemabaloma'e, bia sompulu ma apaapi, 'injopa na'omoe nodua'e ponosia'anange i Daude. 'Injopa la'e i Daude nemabaloma'e sompulu ma apaapi nodua'e too 'Isaraele na'o pinebotuangu too nu Babele. 'Injopa la'e uatu li Babele nodua'e peembu'a ni Yesuse Karisuse sanu jinanjia'omae nu Siopu, teule sompulu ma apaapi. 18 'A'aiine umaumanonge daadaange peembu'a ni Yesuse Karisuse. Siina ni Yesuse, i Maria ma liio tinangka'ome ni Yusupe. Soula laupe netepongkaia lijimo, i Maria nababo'ompongome, pa saba'onye bui la'emae baraka'u Nyaa nu Siopu. 19 Tanda iotouangi i Yusupe i Maria nababo'ompongome, liio menintuge jalangonye baa moudute lalapiangu jimo, pa laupe nootoinye unga li 'ompongi Maria bui la'emae saba'u baraka'u Nyaa nu Siopu. I Yusupe too paila'e ambo'e ma soula palaruunye moudute lalapiangu jimo, seilunye monyonyoyo'e, baa i Maria lauje nope'esilinye li tolo nu toogoote. 20 Tandaa i Yusupe mengintuge li pikirange baa moudute laalapiangu jimo, liio no'otulu. No'otuluma'e liio, nongupi. I Yusupe nongupi, nodua'omae sotoo mala'ikati Tuhane, nai nogombo'a'e liio, lelenye, “Li'oe Yusupe, babali Daude, 'inyaa momundura nyaame. Polapima i Maria, pa unga li 'ompongonye, la'e saba'u baraka'u Nyaa nu Siopu.” 21 Lelenye, “Modua'a wulana'onye, i Maria moguungaa'e unga langkai. Ma unga nopoguungaa'onyomae, ambo'onya notopea'oome i Yesuse. 'Injooma unga pe'itopea'e i Yesuse, pa 'odua'angu tope injoo'e, too molapasa'e sala, ma liio modua'omae, mai molapasa'e sala nu too tinania'ome nu Siopu liioa togunye.” 22 'A'aii'e pinogombo'a'u mala'ikate kangkai i Yusupe. Ma joojoo 'injoo'e, neteturu'e gombo'u Siopu pe'itulisonye topobambale gombo'onye 'ulenge luulumae. Pa tinulisonye, lelenye, 23 Unga laga sanu laupe kinangkaiangu langkai, nopoguungaa'onyomae unga langkai. Ma unga 'injoo'e, notopei nu jimo 'Imanuele. Pa antu'u tope 'injoo'e, Siopu Alata'ala nai kangkai li'ite. 'Injoo'a gombo'u Siopu pe'itulisonye topobambale gombo'onye 'ulenge luulumae. Ma gombo'e 'injoo'e, upouponge nebali uatu i Maria tinangka'ome ni Yusupe. Ma soula laupe kinangkaiangi Yusupe, nababo'ompongome ma unganye uatu nembu'a, tinopea'onye i Yesuse. 24 Nelampame mala'ikati Tuhane, i Yusupe nembaungome ma nonuru'e gombo'e pinejaia'omae nu mala'ikate liio. 'Injopa i Maria pinolapime ni Yusupe ma 'inoninye labongonyoma'e. 25 Dua'e pinembu'aa'u unga li 'ompongi Maria, lijimo laupe nopongkelunge kangkai, bui nepipiaraangome. Tandaa nembu'amae unga li 'ompongi Maria, tinopea'ome ni Yusupe, i Yesuse.
Prev
Play
Next
Volume
Speed
0.7511.251.52