2012 Edition NT मत्ती 1

1 एह यीसू मसीह के बंसावली अय- यीसू ह दाऊद के बंस के रिहिस अऊ दाऊद ह अब्राहम के बंस के रिहिस। 2 अब्राहम के बेटा इसहाक रिहिस; इसहाक के बेटा याकूब रिहिस; याकूब ह यहूदा अऊ ओकर भाई मन के ददा रिहिस; 3 यहूदा के बेटा फिरिस अऊ जोरह रिहिन; ओमन के दाई के नांव तामार रिहिस; फिरिस के बेटा हिस्‍त्रोन रिहिस, अऊ हिस्‍त्रोन के बेटा राम रिहिस। 4 राम के बेटा अम्‍मीनादाब रिहिस; अम्‍मीनादाब के बेटा नहसोन अऊ नहसोन के बेटा सलमोन रिहिस। 5 सलमोन के बेटा बोअज रिहिस; बोअज के दाई के नांव राहाब रिहिस; बोअज के बेटा ओबेद रिहिस, अऊ ओबेद के दाई के नांव रूत रिहिस; ओबेद के बेटा यिसै रिहिस। 6 यिसै के बेटा राजा दाऊद रिहिस; दाऊद के बेटा सुलेमान रिहिस; सुलेमान ह ओ माईलोगन ले पईदा होईस, जऊन ह पहिली उरियाह के घरवाली रिहिस। 7 सुलेमान के बेटा रहबाम रिहिस; रहबाम के बेटा अबियाह रिहिस, अऊ अबियाह के बेटा आसा रिहिस। 8 आसा के बेटा यहोसाफात रिहिस; यहोसाफात के बेटा योराम रिहिस, अऊ योराम के बेटा उजियाह रिहिस। 9 उजियाह के बेटा योताम रिहिस; योताम के बेटा आहाज रिहिस, अऊ आहाज के बेटा हिजकियाह रिहिस। 10 हिजकियाह के बेटा मनस्‍से रिहिस; मनस्‍से के बेटा आमोन रिहिस, अऊ आमोन के बेटा योसियाह रिहिस। 11 बंधुआ होके बाबूल देस जाय के बेरा म योसियाह के बेटा यकुन्‍याह, अऊ ओकर भाईमन रिहिन। 12 बंधुआ होके बाबूल जाय के पाछू यकुन्‍याह के बेटा सालतिएल रिहिस, अऊ सालतिएल के बेटा जरू‍ब्बाबिल रिहिस। 13 जरू‍ब्बाबिल के बेटा अबीहूद रिहिस; अबीहूद के बेटा इल्‍याकीम रिहिस, अऊ इल्‍याकीम के बेटा अजोर रिहिस। 14 अजोर के बेटा सदोक रिहिस; सदोक के बेटा अखीम रिहिस, अऊ अखीम के बेटा इलीहूद रिहिस। 15 इलीहूद के बेटा एलियाजर रिहिस; एलियाजर के बेटा मतान रिहिस, अऊ मतान के बेटा याकूब रिहिस। 16 याकूब के बेटा यूसुफ रिहिस; यूसुफ के घरवाली मरियम रिहिस, जेकर ले यीसू जनमिस, जऊन ला मसीह कहे जाथे। 17 ए किसम ले अब्राहम ले दाऊद तक जम्‍मो चौदह पीढ़ी होईस, अऊ दाऊद ले लेके बाबूल म बंधुआई म जावत तक चौदह पीढ़ी, अऊ बंधुआई ले लेके मसीह तक चौदह पीढ़ी होईस । 18 यीसू मसीह के जनम ए किसम ले होईस। यीसू के दाई मरियम के मंगनी यूसुफ के संग होय रिहिस, पर एकर पहिली कि ओमन दूनो पति-पत्‍नि के रूप म एक संग होतिन, मरियम ह पबितर आतमा के जरिये पेट म पाय गीस। 19 काबरकि मरियम के होवइया पति यूसुफ ह एक धरमी मनखे रिहिस अऊ ओह मरियम ल मनखेमन के आघू म बदनाम करे नइं चाहत रिहिस, एकर खातिर ओह ओला चुपेचाप छोंड देके बिचार करिस। 20 पर ओकर ए बिचार करे के पाछू, परभू के एक स्‍वरगदूत ह ओला सपना म दिखिस अऊ ओ स्‍वरगदूत ह ओला कहिस, “हे यूसुफ, दाऊद के संतान, तेंह मरियम ल अपन घरवाली के रूप म घर ले जाय बर झन डर, काबरकि जऊन ह ओकर गरभ म हवय, ओह पबितर आतमा के तरफ ले अय। 21 ओह एक बेटा ल जनम दिही अऊ तें ओकर नांव यीसू रखबे, काबरकि ओह अपन मनखेमन ल ओमन के पाप ले छुटकारा दिही ।” 22 ए जम्‍मो बात एकर खातिर होईस कि जऊन बात, परभू ह अगमजानी के जरिये कहे रिहिस, ओह पूरा होवय: 23 “देखव, एक कुवांरी ह गरभ म होही, अऊ ओह एक बेटा ला जनम दिही, अऊ ओकर नांव ‘इ‍मानुएल’ रखे जाही, जेकर मतलब होथे- परमेसर हमर संग ।” 24 जब यूसुफ ह नींद ले जागिस, त ओह वइसनेच करिस जइसने परभू के स्‍वरगदूत ह ओला हुकूम दे रिहिस अऊ ओह मरियम ला अपन घरवाली के रूप म अपन घर ले गीस। 25 पर जब तक मरियम ह बेटा ल जनम नइं दीस, तब तक यूसुफ ह ओकर करा नइं गीस। अऊ ओह ओकर नांव यीसू रखिस।

2012 Bharatiya General Conference Mennonite Church

मत्ती 1