1 1 Gɔŋɔ wa dela Yesu Krista tuunhom. A dela Abraham yaaŋa la David yaaŋa. 2 Abraham dayɔa n daa de Isaak, te Isaak dayɔa dɛna Yakob, te Yakob dayɔa dɛna Yuda la a keendoma la a yebehe. 3 Yuda dayɔɔhe daa dela Perez la Zera. Ba ma daa dela Tamar. Perez dayɔa dela Hezron, te Hezron dayɔa dɛna Aram, 4 te Aram dayɔa dɛna Aminadab, te Aminadab dayɔa dɛna Nason, te Nason dayɔa dɛna Salmon, 5 te Salmon dayɔa dɛna Boaz. A ma dela Arahab. Boaz dayɔa n de Obed. Te a ma dɛna Arut. Obed dayɔa n de Yesse, 6 te Yesse dayɔa dɛna Naba David la. David dayɔa n de Solomon se'em te a ma dela Uria pɔga. 7 Solomon dayɔa n daa de Arehoboam, te Arehoboam dayɔa dɛna Abiya, te Abiya dayɔa dɛna Asa, 8 te Asa dayɔa dɛna Yehosapat te Yehosapat dayɔa dɛna Yoram, te Yoram dayɔa dɛna Uzia, 9 te Uzia dayɔa dɛna Yotam, te Yotam dayɔa dɛna Ahaz, te Ahaz dayɔa dɛna Hezekia, 10 te Hezekia dayɔa dɛna Manase, te Manase dayɔa dɛna Amon te Amon dayɔa dɛna Yosia, 11 te Yosia dayɔa dɛna Yekonia la a keendoma la a yebehe, sɛba teŋa nɛreba te ba daa nyɔkɛ keŋɛ Babilon teŋa poan saŋse'a la. 12 Ban daa nyɔgere nɛreba se'em ma'an kena Babilon teŋa poan la n daa tole la Yekonia dayɔa n daa de Sealtiel, te Sealtiel dayɔa dɛna Zerubabel, 13 te Zerubabel dayɔa dɛna Abiud, te Abiud dayɔa dɛna Eliakim, te Eliakim dayɔa dɛna Azor, 14 te Azor dayɔa dɛna Zadok, te Zadok dayɔa dɛna Akim, te Akim dayɔa dɛna Eliud, 15 te Eliud dayɔa dɛna Eleazar, te Eleazar dayɔa dɛna Mattan, te Mattan dayɔa dɛna Yakob, 16 te Yakob dayɔa dɛna Yosef, se'em n di' Mari, se'em n dɔgɛ Yesu la, se'em te ba yi'ira Krista la. 17 Abraham saŋa wa paɛ David saŋa yaabdoma pia la banaahe n daa boe. Te David saŋa me wa paɛ saŋse'a te ba daa nyɔgera nɛreba kena Babilon teŋa poan la, yaabdoma pia la banaahe n daa boe. Nɛreba nyɔnka saŋa la wa paɛ se'em te Na'ayenɛ loe la me saŋa, yaabdoma pia la banaahe me n daa boe. 18 Yesu Krista dɔgɔm poan la daa pin'ilom la wana. A ma yu'urɛ dela Mari. Mari nɛreba yeti ba dekɛ en bo la Yosef te a dɛna a pɔga. Yenɛ Sea n bahɛ te Mari yee sea ge te Yosef ka naɛ la en. 19 Te a sera Yosef dɛna tontɔɔdaana daa ka bɔta te a bahɛ te nyanɛ di' en, daa yeti a lebehe en baanlam. 20 En tɛn'ɛhe wana wa, Na'ayenɛ soŋora tɔgɛ bo en a zaanheŋɔ poan yele en yeti, David dayɔa Yosef, da zɔ' dabeem la ho di' ho pɔga Mari. Bisɛka te ka tara la dela Yenɛ Sea la paŋa poan. 21 A wan dɔgɛ bodibila te ho segɛ a yu'urɛ Yesu. Se'ere n sɔe la a wan fan' a nɛreba bahɛ ba yelebe'ero poan. 22 Wana wa daa eŋɛ te la pa'alɛ Na'ayenɛ n tɔgɛ se'em bo a nɔtɔgɔha la te a me dekɛ tɔgɛ la dela sera, 23 Pɔgɔsa'a kanherɛ wan nyɔkɛ poorɛ dɔgɛ bodibila, segɛ ka yu'urɛ Emanuel. 24 Yosef n daa ta ihege a gɔɔme la, a eŋɛ Na'ayenɛ soŋora la n yele en sɛla la, di' Mari, 25 ge ka nɛ ka soŋen, ge te a dɔgɛ bodibila la. Te Yosef segɛ a yu'urɛ Yesu.
Prev
Play
Next
Volume
Speed
0.7511.251.52