WBT Version NT Maatteeo 1

Hĩbaangĩ cĩg Yeesu

(Tigiil ꞌLuuka 3:23-38)

1 Baa arrittiaa Yeesu Krĩstõ halaangatõõ cĩ habu Daavide* hĩ halaangatõõ cĩ Abũrahamĩ.* Nẽ ꞌthaarriok cĩg hĩbaangĩ cĩgĩnnĩg ko cieegi.*

2 Baa ĩĩn Abũrahamĩ maaꞌnyĩ Iꞌthaakõ,*

nẽ ĩĩ Iꞌthaakõ maaꞌnyĩ Yakobo.*

Nẽ ĩĩ Yakobo maaꞌnyĩ ꞌJuuda hĩ ꞌgõtõõnõgĩ.

3 Ma ho, ikia ittira ꞌJuuda ꞌPẽrẽth hĩ ꞌThẽẽra, ꞌcĩg baag haĩ aattĩnĩĩng ꞌTamar,

baa ĩĩn ꞌPẽrẽthĩ maaꞌnyĩ Hethoronĩ,

nẽ ĩĩ Hethoronĩ maaꞌnyĩ Ramĩ,4 nẽ baa ĩĩn Ramĩ maaꞌnyĩ Ammĩnadabĩ,

nẽ ĩĩ Ammĩnadabĩ maaꞌnyĩ Nahathõnĩ,

nẽ ĩĩ Nahathõnĩ maaꞌnyĩ ꞌThalmõnĩ,

5 nẽ ĩĩ ꞌThalmõnĩ maaꞌnyĩ ꞌBõathĩ,

ꞌcĩ baa haĩ aattĩnnĩ Rahab. Baa ĩĩn ꞌBõathĩ maaꞌnyĩ Obeede ꞌcĩ baa haĩ aattĩnnĩ ꞌRuuth,

nẽ Obeede baa ĩĩn maaꞌnyĩ ꞌJeeꞌthe.

6 Baa ĩĩn ꞌJeeꞌthe maaꞌnyĩ habu Daavide.

Nẽ baa ĩĩn Daavide maaꞌnyĩ ꞌThõlõmõõnẽ, ꞌcĩ baa ĩĩn ngaannia ngaa cĩ eet ꞌcĩ haĩ Uria.

7 Nẽ baa ikia ittira ꞌThõlõmõõnẽ ngeerĩnĩ ꞌcĩ haĩ Rehoboam,

ꞌcĩ baa ĩĩn maaꞌnyĩ Abija.

Nẽ ittira Abija ngeerĩnĩ ꞌcĩ haĩ Atha,

8 Ikia tarĩ ittira Atha ngeerĩnĩ ꞌcĩ haĩ ꞌJehothavat,

nẽ ꞌJehothavatĩ ĩĩn maaꞌnyĩ ꞌJehoramĩ.

Ma nĩngaata ittira ꞌJehoramĩ ngeerĩnĩ ꞌcĩ haĩ Uthia,

9 Nẽ ikia ittira Uthia ngeerĩnĩ ꞌcĩ haĩ ꞌJotham,

ꞌcĩ baa aku ĩĩn maaꞌnyĩ Ahathĩ.

Nẽ baa ĩĩ Ahathĩ maaꞌnyĩ Heꞌthekia,

10 Ma nĩngaata, ikia ittira Heꞌthekia ngeerĩnĩ ꞌcĩ haĩ Manaaꞌthe,

ꞌcĩ baa ĩĩn maaꞌnyĩ buulenit ꞌcĩ haĩ Amon.

Ikia ũꞌthũwanõõ Amõnĩ nẽ ittira ngeerĩnĩ ꞌcĩ haĩ ꞌJothia,

11 nẽ ꞌJothia ikia ittira nyahaappan ꞌcĩ haĩ ꞌJekoniia hĩ ꞌgõtõõnõgĩ, korrioohĩĩ ꞌcĩg baag attĩnganẽẽkĩ habuui cĩ Babiloonnia eet cĩg ꞌJudeei hõõt ĩĩcĩ looc cĩ Babiloonnia.*

12 Ma baa ũũhĩ habuui cĩ Babiloonnia eet cĩg ꞌJudeei looccaa cĩ Babiloonnia,

ũũk ittira ꞌJekoniia ngeerĩnĩ ꞌcĩ haĩ Thealtieele,

nẽ ittira Thealtiẽẽlĩ ngeerĩnĩ ꞌcĩ haĩ ꞌTherubbabel,

13 nẽ ittira ꞌTherubbabelĩ ngeerĩnĩ ꞌcĩ haĩ Abiud

ꞌcĩ baa aku arrita Eliaakim,

maaꞌnyĩ nyahaappan ꞌcĩ haĩ Athor.

14 Ikia ittira Athorĩ ngeerĩnĩ ꞌcĩ haĩ Thadok,

nẽ baa ĩĩ Thadohĩ maaꞌnyĩ nyahaappan ꞌcĩ haĩ Akim,

ꞌcĩ baa hikia hittira ngeerĩnĩ ꞌcĩ haĩ Eliud.

15 Nẽ baa ikia aꞌnyak Eliudĩ ngeerĩnĩ ꞌcĩ haĩ Eleathar,

nẽ ikia ittira Eleatharĩ ngeerĩnĩ ꞌcĩ haĩ Matthan,

ꞌcĩ baa hikia haꞌnyak buulenit ꞌcĩ haĩ Yakobo,

16 nẽ Yakobo ikia ittira Yothebo,* ꞌcĩ baa hikia hũꞌthũwan Maria ꞌcĩ hikia hĩĩ aattĩ Yeesu ꞌcĩ haĩ Krĩstõ.

17 Nẽẽthĩ, baa ĩĩn maajiha vẽlẽk ꞌcĩg iꞌthianaanĩ hĩ Abũrahaamõ hõdõlan Daavide õmmõtõ hĩ ꞌwec nẽ iꞌthianaanĩ hĩ Daavide ĩꞌthõng hõdõlan korriook baag õõĩ eeta cĩg Ĩꞌthĩraẽlĩ looccaa cĩ Babiloonnia, õmmõtõ hĩ ꞌwec buúk. Ma ngaati, iꞌthiattaaĩ maajiha õmmõtõ hĩ ꞌwec tarĩ ĩꞌthõng hõdõlan ꞌtirriaanĩt cĩ Krĩstõ.

ꞌTirriaanĩt cĩ Yeesu Krĩstõ

(Tigiil ꞌLuuka 2:1-7)

18 ꞌGõõl ꞌcĩ baa arrittiaanĩ Yeesu Krĩstõ cieeni: Baa aaĩ bũhẽẽcĩ umwaa ꞌcĩ haĩ Maria ꞌcĩ ẽlẽmmõõ* hĩ eet ꞌcĩ haĩ Yothebo cĩ hattũũg cĩ habu Daavide. Ma baa nga hũrũmtĩ hõdẽĩ, ikia ummuddia thõõth ꞌcĩ aĩ, aꞌnyak Maria loholeec ꞌcĩ arrittiaa Loriiaa ꞌcĩ Ẽllẽẽmĩthĩ.* 19 Nẽ hĩnĩngĩtĩ baa ĩĩn Yothebo eet ꞌcĩ abũnnaa nẽ hõllõngaa adiim aaꞌnyĩk Maria ngaaoni lothippita, ikia ummuk nẽẽ ꞌgõõl ꞌcĩ occa ũũnnĩkĩ Maria, ꞌgõõlaa ꞌcĩ aitiõõ hõllõngaa aga eeta.

20 Ma baa nga ammuk nẽẽ thõõth icci, ikia uduhaak ĩnõõnnõ aajĩlõ* cĩ Makayyiookto honoothittatõõ ĩĩnnĩk, “Ẽlẽ Yothebo ngeertĩ Daavide, ma hiteelli ngaatĩ aꞌthũwanĩĩ Maria hĩĩ ngaa cunni, hĩnĩngĩtĩ ĩĩn loholeec cĩ aꞌnyak Maria ho, loholeec ꞌcĩ aku hĩ Lori ꞌcĩ Ẽllẽẽmĩthĩ. 21 Ũũkca hatĩ nẽẽ loholeec ꞌcĩ maacĩ. Kateek hatĩ ĩnõõnnõ ꞌthaar ꞌcĩg haĩ Yeesu, hĩnĩngĩtĩ ẽẽla hatĩ nẽẽ eet cĩgĩnnĩg ꞌthẽccanẽẽtĩĩ cĩggĩĩng.”

22 Baa adĩmanni thooꞌthioha cieeg vẽlẽk hoti, hátĩ hidticattĩ thooꞌthioha cĩg Makayyiooktak baag aduha põrõvẽtaacĩ* aĩ, 23 “Ũũkca hatĩ bũhẽẽcĩ ꞌcĩ nga hatagguutho hĩ eet ko, loholeec ꞌcĩ maacĩ nẽ hatĩ hĩĩtõ ꞌthaar cĩgĩnnĩg Emmanuele,” Nĩngĩtĩ aĩ, “Aaĩ Nyekuci hĩ ngagĩĩta.”†

24 Ma baa ĩtĩnga Yothebo ũꞌnyaahĩ, ikia ĩdĩman nẽẽ thõõth baa aduhaak ĩnõõnnõ aajĩlõ cĩ Makayyiookto nẽ ũũhĩ Maria hĩĩ ngaa cĩnnĩ. 25 Nẽẽthĩ, baa nga hatagguutho Yothebo hĩ ĩnõõnnõ ĩꞌthõng hũtũhũa nẽẽ loholeec. Nĩngĩtĩ akannẽẽkĩ Yothebo loholeec ꞌthaar ꞌcĩg haĩ Yeesu.

*1:1 Daavide:Baa ẽbẽra Nyekuci Daavide hikia hĩĩ habu cĩ Ĩꞌthĩraẽlĩ nẽ uduha ĩĩ, aku hatĩ habuui cobbi lõhõlẽẽnĩĩ cĩg lõhõlĩ cĩgĩnnĩg, hikia haggam looc hĩĩ habu ũdũt. Baa habu tĩho Yeesu Krĩstõ. Tigiil thõõth icci ꞌBuuhaa cĩ Tegellwaanu 132:11-12. Baa arũgĩ Daavide irkiꞌnyia ꞌcĩg occa ũũppan aalib hõdẽĩ, baa nga hittirria Yeesu. Tigiil thõõth cĩnnĩ ꞌBuuhaa ꞌcĩ ĩĩn 1 ĩcĩ Thamueele 16-30; 2 Thamueele 1-24; 1 Habueet 1-2. *1:1 Abũrahaamõ:Baa avvĩ Nyekuci ĩnõõnnõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. *1:1 Yeesu Krĩstõ:ꞌThaara ꞌcĩg haĩ Yeesu ho, aĩ ẽẽlanneet Nyekuci. ꞌThaara ꞌcĩg haĩ Krĩstõ ho, aĩ ẽbẽra Nyekuci eet hĩĩ habu. *1:2 Iꞌthaakõ:Baa ĩĩn ciee ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35. *1:2 Yakobo:Baa ĩĩn nẽẽ ngeertĩ loholeec cĩ Abũrahamĩ, ꞌcĩ baa aꞌnyak lõhõlĩ ꞌcĩg maacĩg õmmõtõ hĩ ꞌramma. Baa ẽgẽẽran Nyekuci ꞌthaar cĩgĩnnĩg nẽ akateek ꞌthaar ꞌcĩg kaĩ Ĩꞌthĩraẽl. Haĩ lõhõlĩ cĩg lõhõlĩ cĩgĩnnĩg lõhõlĩ cĩg Ĩꞌthĩraẽlĩ nẽ korrioohĩĩ baag Yeesu, baa avvĩ eeta ĩhõõggõ anneek eet cĩg ꞌJudeei. Tigiil thõõth cĩnnĩ ꞌBuuhaa cĩ ꞌThianaattõ 25-50. *1:11 Babiloonnia:Urutaa cĩ korriook baag Nõõa, etehenyit eeta ꞌcieeth ꞌcĩ uuni Babela, ꞌcĩ baa hiita hĩĩttĩk eeta uruta Babiloonnia. Ma urutaa cĩ irkiꞌnyia ꞌcĩg mẽẽlĩg, ikia ũũhĩ habuui Nabukadaneetharĩ eet cĩg Ĩꞌthĩraẽlĩ ũgĩ ĩĩcĩ ꞌlooc cĩ Babiloonnia, baa ĩꞌthaan nẽẽ ꞌJeruꞌthalẽm, irkiꞌnyiaannĩĩ baag ĩĩn ꞌmiiaꞌnya ꞌtur hĩ hẽẽn tũkĩramma (570), baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 11; 2 Habuẽẽt 24-25; Danieele 1:1-7. *1:16 Yothebo:Baa ĩĩn Yothebo ciee maac cĩ Maria aattĩ Yeesu. Baa hũnũũk, baa aaĩ Yothebo umwaa ꞌcĩ baa ĩĩn ngeertĩ Yakobo ꞌcĩ baa ammĩnan maaꞌnyia gẽrrẽẽt nẽ utuuyyiõõĩ ꞌgotoonoggia hũũk hĩĩ appahaca eetinii cĩg Ijjibi. Tigiil thõõth cĩnnĩ ꞌBuuhaa cĩ ꞌThianaattõ 30-50. *1:18 Thõõth ꞌcĩ aĩ ẽlẽmmõõ:Aĩ thõõth ciee nyattaalaa cĩ ꞌJudeei nẽẽ, aruk ẽẽtĩ tĩĩn ꞌgolli ngaaõ, nga hiita hũrũmtĩ hĩ maac hõdẽĩ. *1:18 Lori ꞌcĩ Ẽllẽẽmĩthĩ:Ĩĩn Lorii ꞌcĩ Ẽllẽẽmĩth Lori cĩ Nyekuci. Aĩ Yeesu, ĩĩn Nyekuci Maaꞌnyĩ, ne ĩĩ nẽẽ Ngeertĩ Nyekuci. Aĩ thõõth ciee, ĩĩn Maaꞌnyia Nyekuc nẽ ĩĩ Ngeerĩnĩ Yeesu Nyekuc. Nẽ ĩĩ Lorii ꞌcĩ Ẽllẽẽmĩth Nyekuc. Nẽ tarĩ ĩĩtõ Maaꞌnyia hĩ Ngeerĩnĩ hĩ Lori ꞌcĩ Ẽllẽẽmĩth vẽlẽk, Nyekuc Hõdẽẽthõng. Tigiil ꞌBuuk cĩ Yõaannẽ 1:1-18; 8:41-42; Dtiicanĩ cĩg ꞌThooyyiahu 5:3-4. *1:20 Aajĩlẽẽt:Ĩĩn aajĩlẽẽta loriẽẽt ꞌcĩg arũmĩ hĩ Nyekuc hẽẽtahujjieen nẽ aitiõõ ĩhõõggõ eleeti tõõ. Ĩꞌthõõa Nyekuci ĩhõõggõ waathinnioohĩĩ ũgẽẽgĩ hiita haꞌnyaktaak nyeemuut cĩ Nyekuci eet loota nĩnga. *1:22 Põrõvẽtaac:Ĩĩn põrõvẽtaacĩ eet ꞌcĩ athĩkna nyeemuut hĩ Nyekuc nẽ ikia uduhaak eeta. †1:23 Tigiil ꞌBuuk cĩ Iꞌthaia 7:14

Didinga New Testament

Maatteeo 1