1 1 O gaykoj lo Jeju Kris ŋo̰n Dabit, ŋo̰n Abraham. 2 Abraham oj Ijak, Ijak oj Jakob, Jakob oj Juda ta̰ ku no̰nd’a̰ ge. 3 Juda ḭ ku Tamar oji Pere ta̰ Jara. Pere oj Esrɔm, Esrɔm oj Aram. 4 Aram oj Aminadab, Aminadab oj Naaso̰, Naaso̰ oj Salmo̰. 5 Salmo̰ ḭ ku Rahab oji Boaj. Boaj ḭ ku Rutu oji Obɛd. Obɛd oj Ijay. 6 Ijay oj mbay Dabit. Mbay Dabit ḭ ku ninya̰ Uri oji Salmo̰. 7 Salmo̰ oj Roboam, Roboam oj Abia, Abia oj Asa. 8 Asa oj Jojapat, Jojapat oj Joram, Joram oj Ojias. 9 Ojias oj Joatam, Joatam oj Akaj, Akaj oj Ejekias. 10 Ejekias oj Ma̰na̰se, Ma̰na̰se oj Amo̰, Amo̰ oj Jojias. 11 Jojias oj Jekonias ta̰ no̰nd’a̰ ge dɔrɛ̰ŋlo ti ha̰ uay’n Ijraɛlge aui’n se’d ɓe ti ŋa Babilɔn. 12 Goti ha̰ aui ku Ijraɛlge ɓe ti ŋa Babilɔn ti, Jekonias oj Salatiɛl. Salatiɛl oj Jorobabɛl. 13 Jorobabɛl oj Abiud, Abiud oj Eliakim, Eliakim oj Ajor. 14 Ajor oj Sadok, Sadok oj Akim, Akim oj Eliud. 15 Eliud oj Eliajar, Eliajar oj Mata̰, Mata̰ oj Jakob. 16 Jakob oj Jujɛp, ŋa Mari. Rua oj Jeju, ha̰ kɔ́ɗi’a Kris. 17 Tɛn ula gaya jenṵ dɔ Abraham ti tee’n dɔ Dabit ti gaykoj ḭ dɔɔgida ḭ sɔ́. Gaykoj ḭ dɔɔgida ḭ sɔ́ ula gaya dɔ Dabit ti kɛ̰́m dɔrɛ̰ŋlo ti ha̰ aui’n ku Ijraɛlge ɓe ti ŋa Babilɔn. Ta̰ gaykoj ḭ dɔɔgida ḭ sɔ́ dɔrɛ̰ŋlo ti ha̰ aui’n ku deg Babilɔn ti kɛ̰́m dɔrɛ̰ŋlo ti lo Kris. 18 O goɗob ha̰ oji’n Jeju Kris. Ko̰’a̰ ḭ Mari ha̰ Jujɛp ua dɔ’a. Kete ta̰ kada a ndii na̰a ti, Mari o̰m ŋo̰n goɗob kula ti lo Ndilŋanda. 19 Jujɛp, ŋau’a, ḭ dee ŋaɗoɗo. Rua ndig kel kutege ko̰m deg ti kéré ho̰. Rua taɗ kutɔ kinya̰’a̰ loo kuya ti. 20 Titi’n rua nd’taɗ’n, ŋakaukula mad lo Mbayɓe tee waraŋ dɔ’a ti ku ni. Rua ele: Jujɛp, ŋo̰n Dabit, ot ɓol kua ninya̰’i Mari ku ro’i ti. Ŋo̰n ha̰ rua o̰mo̰ ɗe goku ro Ndilŋanda ti. 21 Rua a koj ŋo̰n ŋa diŋa. A kunday tɔ’a Jeju. Kutɔ rua a kaj deg lo’n ge dɔ majkage ti lo’dé. 22 Nya̰ no̰ kéré a̰nd ɓe kutɔ kada a tɔl ta nya̰ ha̰ Mbayɓe el goɗob ti lo ŋatuɓanduLuɓa. 23 Rua ele: O, ŋoma̰d ŋa dɔkuɗuru a ko̰m ŋo̰n, ta̰ a koj ŋo̰n ŋa diŋa. A kadi’a tɔ Ema̰nuɛl, ha̰ el hɛn Luɓa ḭ se’jé. 24 Jujɛp ndolo ta̰ rua ɗa nya̰ ha̰ ŋakaukula lo Mbayɓe el’a. Rua ua ninya̰’n ku ro’n ti. 25 Rua ger’a dɛ̰ ti ho̰ kɛ̰́m kada a koj’n ŋo̰n deɗ’n ŋa diŋa. Rua unda tɔ’a Jeju.
Prev
Play
Next
Volume
Speed
0.7511.251.52