1 1 To in Kiristo Hisos manga hasokfonan gis hagorangan, gin Dabid fag Gorangon hasokfonan, ka yadi gin Abraham fag hasokfonan. 2 In Abraham anak is Isaak, in Isaak anak is Hakob. In Hakob manga anak is Hoda, hanggan it manga fadwasay. 3 Da Faris da Sara in Hoda manga anak san Tamar. In Faris anak is Isrom hanggan in Isrom anak is Aram. 4 In Aram anak is Aminadab, in Aminadab anak is Naason. In Naason anak is Salmon. 5 Is Boos in Salmon anak san Rahab, ginya madi is Obid in Boos anak san Rot. In Obid anak is Hisi. 6 In Hisi anak is Dabid kawan bali gorangon fag Dabid. Ginya madi is Salomon in Dabid anak san Oriyas babay hyabi. 7 Ginyan Salomon anak is Roboam. In Roboam anak is Abiyas. In Abiyas anak is Asa. 8 In Asa anak is Hosafat hanggan in Hosafat anak is Horan. In Horan anak is Osiyas. 9 In Osiyas anak is Hotan. In Hotan anak is Akas. In Akas anak is Isikyas. 10 In Isikyas anak is Manasis. In Manasis anak is Amos. In Amos anak is Hosiyas. 11 In Hosiyas manga anak is Hikoniyas hanggan it manga fadwasay. Gis nanya fag masohod ka manga taga Babilonya igpilit wagtaban in Israil manga ha sokfonan has Babilonya. 12 Nondiya has Babilonya, in Hikoniyas anak is Salatiyal. In Salatiyal anak is Sorobabil. 13 In Sorobabil anak is Abiyod. In Abiyod anak is Iliyakim. Ginyan Iliyakim anak is Asor. 14 In Asor anak is Sadok. In Sadok anak is Akim. Ginyan Akim anak is Iliyod. 15 In Iliyod anak is Iliyasir. In Iliyasir anak is Matan. In Matan anak is Hakob. 16 Ginya madin Hakob anak is Hosi, kawa ka nababay in Mariya fag Hosi. To fag is Mariya kan Hisos ina. To fag is Hisos kawasta faglwangon, in Diyos-natogon-Famawi. 17 It kahologan, gin Abraham balin Dabid, safolo ha ofat ik hasokfonan taw, ginya madi, gin Dabid balis tagpilit wagtaban in Israil manga hasokfonan taw has Babilonya, safolo ha ofat, ginya safolo yadi ha ofat ik hasokfonan taw gistag pilit wagtaban has Babilonya balin Diyos-natogon-Famawi. 18 Kito is Kiristo Hisos nonsagaya. Is Mariya, kambali aba in Hisos ina, hanggan is Hosi, intohoyan talsawa aban. Dapat is Mariya danwa gabosog nyawa idyan saya in Hosi. To fag madolaw ka Maliyaw fag Falad nafatimawa. 19 Is Hosi, kan Mariya bato indoganon, mahoway, idwa kasayag fahaya in Mariya, yakanga hanya gayfan domayo lamang in Mariya, nyawadwa ha toltolan. 20 Is Hosi gisip wa gisip wa hanya baliwa. Ginya madi, sadi ginan, hanya no matoyogan, nalag kagfon intam it anghil sadi. Ka anghil nalwang han Hosi kiti, Hosi, in Dabid hasokfonan, haw fag idwa kadalag dagos han Mariya, kawa hanya gabosog maskin ka Maliyaw fag Falad nafatimawa. 21 Ka anak nomsagaya aban, ama wan. Haw fangayanan hanya is Hisos, maskin hanya ka bomawi it sakop fag manga taw git manga ogali dwat. 22 To fagayo inlag kitonya kaarakitay im-anod in Diyos fwayong git fangampang kitay, 23 Fandog ngay, sadik dayaga kadya hansaya ama, imbali gabosog, ginyat anak nomsagaya ama wan. Ta lomwang, Tos Imanyowil, it kahologan, Is Diyos sawantam. 24 Ginyas Hosi nonfolaw, intanog kagfon intam it anghil fwayong, nataban wan Mariya, naano hanya. 25 Dapat is Hosi idyan saya in Mariya hanggan wansagaya ka anak dararag ama, kat nafangayan is Hisos.
Prev
Play
Next
Volume
Speed
0.7511.251.52