1 1 Ame na rɔ möyï 'bu löbu 'ba Yësu Kurïsïtö kupö Dawidi kupö Abarayama. 2 Abarayama na köyö Yisika, Yisika na köyö Yakoba, Yakoba na köyö Yuda ni ti löndö bo ga. 3 Yuda na köyö Pereze ni ti Zera ame mönnï na rɔ Tamara ne. Pereze na köyö Ezerona, Ezerona na köyö Rami. 4 Rami na köyö Aminadaba, Aminadaba na köyö Nasona, Nasona na köyö Salamono. 5 Salamono na köyö Bɔwaza ame ma mo rɔ Raba ne. Bɔwaza na köyö Obede ame ma mo rɔ Ruta ne. Obede na köyö Yisayi. 6 Yisayi na köyö Dawidi bɔ dɔliŋɔ. Dawidi na köyö Solomo ame ma mo rɔ makuru'bë pötö Uriya ne. 7 Solomo na köyö Rebama, Rebama na köyö Abiya, Abiya na köyö Asa. 8 Asa na köyö Yesopata, Yesopata na köyö Yorama, Yorama na köyö Uzïya. 9 Uzïya na köyö Yotama, Yotama na köyö Aza, Aza na köyö Ezikiya. 10 Ezikiya na köyö Manase, Manase na köyö Amona, Amona na köyö Yosiya. 11 Yosiya na köyö Yekoniya ni ti löndö bo ga mï kada 'ba tinda'ba bilaka kari Babele. 12 Di pötö tinda'ba bilaka kari Babele na Yekoniya köyö Salatele, Salatele na köyö Zerobabele, 13 Zerobabele na köyö Abiyuda, Abiyuda na köyö Elekima, Elekima na köyö Azora, 14 Azora na köyö Zadoka, Zadoka na köyö Akimi, Akimi na köyö Eliyuda, 15 Eliyuda na köyö Elezara, Elezara na köyö Matana, Matana na köyö Yakoba, 16 Yakoba na köyö Yesepa ame bo na rɔ më'dë 'ba Mariya ma 'ba Yësu ma kïdëkï rɔ Kurïsïtö ne. 17 Tine 'bu löbu ma kisaki di zi Abarayama ŋbö kömö zi Dawidi ëdï pili 'butë dɔmosowɔ. Kina ma kisaki di zi Dawidi ŋbö kömö mï kada 'ba tinda'ba bilaka kari Babele ëdï pili 'butë dɔmosowɔ. Kina ma kisaki di mï kada 'ba tinda'ba bilaka kari Babele ŋbö kömö zi Kurïsïtö ëdï gbï pili 'butë dɔmosowɔ. 18 Tine töyö Yësu Kurïsïtö na kɔzɔ a nime te. Ɔdɔ kïlïbö ma bo Mariya 'deni 'dɔ togbe mo zi Yesepa tine gba kinza lïjë kodɔ'bɔ dönnï dë lɔko ari kikali rönï lɔko ɔmɔ 'deni ti tigɔ 'ba Nyï Kɔtɔ Laka. 19 Tine më'dë nï Yesepa rɔ bɔ lende laka, kina bo o'dɔkɔ dë 'dɔ tuburu lɔko kɔmɔ bilaka ma konzi. Kina bo komeri ŋgï 'dɔ tope lɔko lowo. 20 Kina ɔdɔ bo ko'dɔ meri mo 'deni tara tine, Bɔko'ba i'di nyï ko'de ŋgï dɔ bo kina malayika 'ba Bɔko'ba kilende zi bo, iya te, “Yesepa kupö Dawidi, kinza kere dë di bi togba Mariya zïyï liŋɔ rɔ 'ja 'bï. Römöyï kole nima mïnï ne Nyï Kɔtɔ Laka na ki'di lɔko kɔmɔ. 21 Lɔko ti köyö kole kina ti kïdëkï möyï mo rɔ Yësu. Römöyï bo na ti kɔmɔ bilaka abo ga yaga di mï lende kënyë 'bënnï ga.” 22 Wa naga nime o'dɔ rönnï 'deni 'dɔ këdï kɔzɔ wa ma tönë ga Bɔko'ba ki'di bɔ kumë lende abo ga kiya 'deni mɔlo ne tara. Ame kiya te, 23 “Nyiti mɔtɔ gba rɔ yïtö ti kɔmɔ 'deni köyö kole. Kina ti kïdëkï möyï mo rɔ Imanuwëlë.” Ame 'jɔ 'ba lende 'ba möyï nima iya te, “Bɔko'ba ëdï tize.” 24 Kina ɔdɔ Yesepa koŋgɔ bi tine bo ogbe Mariya ŋgï kɔzɔ ma malayika 'ba Bɔko'ba kiya zi bo. 25 Tine Yesepa ni inda'ba dönnï dë titi ti Mariya ŋbö lɔko köyö kole. Kina bo ki'di möyï mo ŋgï rɔ Yësu.
Prev
Play
Next
Volume
Speed
0.7511.251.52