1 1 Luaa ñ'oom na matseijndaa'ñena' tsjaaⁿ nn'aⁿ na tuiiñe Jesucristo, na wjaac'oomna' David ñequio Abraham na jndyowicantyjoo' joona na tue'cañoomna' jom. 2 Abraham, jom tsotye Isaac, Isaac tsotye Jacob, Jacob tsotye Judá ñequio ntyjee tsaⁿ'ñeeⁿ. 3 Judá ñequio yuscu na jndyu Tamar, ndana Fares ñequio Zara. Fares tsotye Esrom, Esrom tsotye Aram. 4 Aram tsotye Aminadab, Aminadab tsotye Naasón, Naasón tsotye Salmón. 5 Salmón ñequio yuscu Rahab, ndana Booz, Booz ñequio scoom'm Rut, ndana Obed, Obed tsotye Isaí. 6 Isaí tsotye David tsaⁿ na tyoluiiñe rey, David to'ñoom scuu' ts'oo Urías, t'oom ndana Salomón. 7 Salomón tsotye Roboam, Roboam tsotye Abías, Abías tsotye Asa. 8 Asa tsotye Josafat, Josafat tsotye Joram, Joram tsotye Uzías. 9 Uzías tsotye Jotam, Jotam tsotye Acaz, Acaz tsotye Ezequías. 10 Ezequías tsotye Manasés, Manasés tsotye Amón, Amón tsotye Josías. 11 Josías tsotye Jeconías ñequio ntyjee tsaⁿ'ñeeⁿ. Joona tuiindyena tiempo quia ty'e nn'aⁿ Israel na pra̱so ndyuaa Babilonia nc'e na ticanaⁿndye nn'aⁿ Israel ndia' ñ'eⁿ nn'aⁿ ndyuaa'ñeeⁿ. Ty'echo naⁿ'ñeeⁿ joona na tyondye'ntjomtyeⁿna. 12 Jnda̱ teinom na ty'echo nn'aⁿ Babilonia nn'aⁿ Israel ndyuaana, tuiiñe jnda Jeconías ndyuaa'ñeeⁿ. Jndyu tsaⁿ'ñeeⁿ Salatiel, Salatiel jom tsotye Zorobabel. 13 Zorobabel tsotye Abiud, Abiud tsotye Eliaquim, Eliaquim tsotye Azor. 14 Azor tsotye Sadoc, Sadoc tsotye Aquim, Aquim tsotye Eliud. 15 Eliud tsotye Eleazar, Eleazar tsotye Matán, Matán tsotye Jacob. 16 Jacob tsotye José, José saa' María. Ndo' María'ñeeⁿ na seincueⁿ Jesús na cwiluiiñe Cristo. 17 Jnda̱a̱' canchoo'ñequiee ndii' tsjaaⁿ na jndyowicantyjoo', jnaⁿna' Abraham, tue'cañoomna' hasta David. Ndo' cwiicheⁿ canchoo'ñequiee ndii' tsjaaⁿ na jndyowicantyjoo', jnaⁿna' David, tue'cañoomna' tiempo quia na ty'e nn'aⁿ Israel na pra̱so ndyuaa Babilonia. Ndo' cwiicheⁿ canchoo'ñequiee ndii' tsjaaⁿ na jndyowicantyjoo', jnaⁿna' quia ty'echo nn'aⁿ Babilonia nn'aⁿ Israel, tue'cañoomna' hasta xjeⁿ na tuiiñe nquii na cwiluiiñe Cristo. 18 Luaa waa na tuiiñe Jesucristo. Quia waacheⁿ ñomcaa' tsoñeeⁿ María ñequio José, ndo' cwii tjo̱o̱cheⁿ na nntjomndyena, teitquioo' na majndeiiñe María cantyja najndeii Espíritu Santo. 19 Ndo' José, tsaⁿ na nluiiñe saa' María, jom ts'aⁿ na ñequii'cheⁿ tyocantyjaa' ts'om na nts'aa yuu na maty'iomyana'. Tical'ue ts'oom na nlui'jnaaⁿ'ñe tsaⁿ'ñeeⁿ, jo' chii seitioom na cwe' ñemaaⁿ' nntyuii' ñomca. 20 Yocheⁿ na luaa' matseitioom, tsoom'm ndaa na teitquioo'ñe cwii ángel cwentaa' Ty'o̱o̱ts'om nnoom. Tso tsaⁿ'ñeeⁿ: —'U José na cwiluiindyu' tsjaaⁿ David na jndyowicantyjoo' tinty'ue' na nnco'ñom' María na nluiiñê scu'. Ee cantyja najndeii Espíritu Santo jo' na jndeiiñê. 21 Nntseincueⁿ cwii yu'ndaa na tsaⁿs'a. Ndo' 'u nntseicajndyu' juu Jesús. Ee na tseixmaaⁿ na nncwji'n'maaⁿñê nn'aⁿ na m'aⁿ cantyja 'naaⁿ'aⁿ. Nntseicanoom'm jnaⁿ na la'xmaⁿ naⁿ'ñeeⁿ. 22 Cha'tso nmeiⁿ' tuii cha catseicanda̱a̱'ñena' ñ'oom na seineiⁿ Ty'o̱o̱ts'om ñequio ñ'oom 'ndyoo profeta. 23 Tso tsaⁿ'ñeeⁿ: Queⁿ'yo' cwenta, nndeiiñe cwii yuscundyua. Nntseincueⁿ cwii tyochjoo ndo' njndyu Emanuel. Ñ'oom Emanuel matsona': Ty'o̱o̱ts'om m'aaⁿ ñ'eⁿndyo̱ jaa. 24 Jnda̱ na lcwii ts'om José na tsoom'm ndaa, quia jo' seicana̱a̱ⁿ ñ'oom na sa̱'ntjom ángel cwentaa' Ty'o̱o̱ts'om, to'ñoom María na scoom'm. 25 Sa̱a̱ ticatjomndyena na mandiñoom' hasta quia jnda̱ seincuii scoom'm yu'ndaa'ñeeⁿ. Quia jo' José seicajñoom yu'ndaa'ñeeⁿ Jesús.
Prev
Play
Next
Volume
Speed
0.7511.251.52