1 1 Anda in liStaan in mga kakoyayan IsoKiristo. Siyo kay Dabid kasokponan, kasokponan din Abraam. 2 In kay Abraam bodang Isaak, in kay Isaak bodang Akob, in kay Akob bodang Oda, osai in kansiyo mga belag. 3 Kalbas in kay Oda bodang Paris osai Sara, Tamar in inang. In kay Paris bodang Isrom, in kay Isrom bodang Aram. 4 In kay Aram bodang Aminadab, in kay Aminadab bodang Naason, in kay Naason bodang Salmon. 5 In kay Salmon bodang Boos, Raab in inang. In kay Boos bodang Obid, Root in inang. In kay Obid bodang Isi. 6 In kay Isi bodang Dabid in poon lakoy. In kay Dabid bodang Solomon, in inang in kay Oriyas batang babai. 7 In kay Solomon bodang Robowam, in kay Robowam bodang Abiyas, in kay Abiyas bodang Asa. 8 In kay Asa bodang Osapat, in kay Osapat bodang Oram, in kay Oram bodang Osyas. 9 In kay Osyas bodang Otam, in kay Otam bodang Akas, in kay Akas bodang Isikyas. 10 In kay Isikyas bodang Manasis, in kay Manasis bodang Amos, in kay Amos bodang Osyas. 11 In kay Osyas bodang Ikonyas osai in kansiyo mga belag. Ina pag betek in mga kasokponan Israil biyaba sa Babilonya. 12 Paka kalbas in siro biyaba sa Babilonya in kay Ikonyas bodang Salatil, in kay Salatil bodang Sorobabil. 13 In kay Sorobabil bodang Abiyod, in kay Abiyod bodang Iliyakim, in kay Iliyakim bodang Asor. 14 In kay Asor bodang Sadok, in kay Sadok bodang Akim, in kay Akim bodang Iliyod. 15 In kay Iliyod bodang Iliyasar, in kay Iliyasar bodang Matan, in kay Matan bodang Akob. 16 In kay Akob bodang Osi in kay Mariya lalaki. Mariya in inang Isos, in piyagawit Kiristo. 17 Na sogod kay Abraam anggan kay Dabid, na labing opat ka kasokponan. Sogod wakay kay Dabid anggan siro biyaba sa Babilonya na labing opat din ka kasokponan. Sogod wakay siro biyaba sa Babilonya anggan kay Kiristo na labing opat din ka kasokponan. 18 In IsoKiristo biyodang kataw tai. Mariya in batay kansiyo inang, osai Osi, siro batay wa taybalang. Kamay siro ikkay piyalalay, Mariya mana bonting wa. In kapwan bonting in Betek pag Abyan. 19 Osi in kansiyo batay lalaki, siyo osai ka mangyan betek in ogali. Matang kansiyo riyemrem siyo batay wa pasoway kay Mariya, kamay kansiyo piyagtago matang Mariya yewed arikoyan. 20 In kansiyo kay piyagpanremrem ina, siyo manaynep, apo papangkit sa kansiyo osai ka angil batang sa Kapwan. Keyen, Laki Osi, kasokponan Dabid, ayaw agkalimo palalay kay Mariya, angkataw in kapwan in kansiyo piyagbonting in Betek pag Abyan. 21 Siyo batay mamodang kaliyakiyante. Isos in kaimo taboyen ngaran angkataw siyo in batay agpamaboway sa kansiyo mga mangyan, agkowa kansiro mga daet. 22 Ina boo mipangwat matang mibaloy in siyabi in Kapwan. Kansiyo poropita in agsabi keyen, 23 Batay bonting osai ka daraga, kalbas siyo batay mamodang kaliyakiyante. Siyo batay piyagawit Imanowil, in beet siyabi keyen kantam sarig in Diyos. 24 Paka Osi mipolaw, siyo maniwala sa siyabi in angil batang sa Kapwan. Mariya kansiyo wa piyaanggat, 25 kamay siro yewed kay maylalay, anggan miboslot wa in bodangte kaliyakiyan. Kansiyo ngani tiyaboy ngaran Isos.
Prev
Play
Next
Volume
Speed
0.7511.251.52